又到Switch迷嘅最興奮時刻喇～2022年有多款作品都即將推出系列續作，當然唔小得仲有屬於角落生物嘅超療癒新Game啦！而今次介紹嘅遊戲，冇論單打定同朋友玩都咁適合呀！想知有啲乜野Game值得入手就記得碌落去睇吓喇！
圖片來源：妞新聞、網上圖片、巴哈姆特｜撰文：Debbie
2022年5款Switch新遊戲 (1) : 《打工人 The Company Man》
呢個適宜社畜玩嘅舒壓遊戲係嚟自發行商 Leoful 和馬來西亞獨立工作室 Forust 設計，辦公室冒險遊戲《打工人（The Company Man）》將會喺 2022 年初嘅全球 Nintendo Switch 平台上推出。
《打工人》是一款動作平台遊戲，其靈感係嚟自於熱門美劇《辦公室》！玩家將會飾演一位年輕上班族。由於對公司運作方式唔滿意所以就想推翻老闆成為CEO！玩家可以係遊戲裡面化身鍵盤戰士，發送電子郵件攻擊同事，亦都可以從人力資源部到市場部各個部門之間奔跑跳躍，利用咖啡回血復活！睇落個故事都幾有趣，唔知玩起上嚟又會係點呢？
《打工人 Company Man》
上線日期：2022 年初
2022年5款Switch新遊戲 (2) : 《瑪利歐＋瘋狂兔子希望之星 MARIO+RABBIDS SPARKS OF HOPE》
由廣受好評嘅《瑪利歐+瘋狂兔子 王國之戰》為基礎創作嘅續作新品《希望之星》，會再度展開宇宙規模大冒險！玩家需要幫扭曲咗嘅行星恢復秩序，並透過回合制戰術同創新作戰系統嚟到操控角色迎戰敵人。實際嘅發行日期就未有公怖，不過今年就肯定有得玩㗎喇！
相信大家對Mario系列嘅遊戲都唔陌生，題材亦不外乎大冒險以及多人嘅派對遊戲！今次玩家可以喺冒險過程中探索奇怪居民同好笑嘅秘密，而喺拯救銀河系嘅時候，亦都可以令眾多小夥伴加入旅程。每個 Spark 都有獨特力量同個性，而英雄們可以喺戰鬥中使用佢哋特殊能力取得優勢，期待今次嘅故事發展！
《瑪利歐＋瘋狂兔子希望之星 MARIO+RABBIDS SPARKS OF HOPE》
上線日期：2022 年
2022年5款Switch新遊戲 (3) : 《角落小夥伴在房間角落旅行》
大人細路都咁鍾意嘅人氣角色《角落生物》終於有一個多人派對GAME喇！而今次嘅GAME同MARIO PARTY非常類近，玩家將會變成角落生物喺各式各樣嘅地圖入面玩大富翁。假設你已經率先抵達目的地/停咗喺獎勵格又或者成為小遊戲嘅冠軍，你就可以得到哩數，大量收集到嘅嗰一位就可以成為優勝者！
呢款遊戲適合所有年齡層嘅朋友，連小編都相當期待啊。遊戲畫風唔單止可愛仲有好多得意造型滿足一班角落粉！大富翁遊戲入面仲有30種唔同類型嘅小遊戲等緊你，連小編都忍唔住要入手喇！
《角落小夥伴在房間角落旅行》
上線日期：2022年1月20日
2022年5款Switch新遊戲 (4) : 《薩爾達傳說曠野之息2》
自從2017年《薩爾達傳說》首作面世之後，有好多人都期待咗續作好耐好耐，而喺最近嘅2021年E3頒獎典禮入面仲獲選為最受期待嘅任天堂遊戲添！任天堂 E3 2021 線上發表會 Nintendo Direct 期間亦公開咗續作《薩爾達傳說：曠野之息2》的最新宣傳影片，並預告將於 2022 年發售。希望晤好受疫情影響而延期發售啦，畢竟粉絲們都等咗4年有多喇！
《薩爾達傳說曠野之息2》
上線日期：2022年
2022年5款Switch新遊戲 (5) : 《瘟疫傳說：安魂曲》
同樣地，《瘟疫傳說：安魂曲》係《瘟疫傳說：無罪》嘅續篇作品，以 14 世紀瘟疫橫行嘅中古法國為背景，描寫家姐艾蜜西亞同細佬雨果呢對畀宗教裁判追殺嘅年幼姊弟所經歷嘅冒險。經歷重重苦難考驗而成長嘅二人，喺逃離被破壞嘅家園之後去咗南方新地區，希望展開新生活同控制雨果身上詛咒。
續作同以往一樣，除咗有殘暴嘅戰鬥動作仲有更遼闊嘅開放場景，當然就係有更多嘅老鼠啦（笑）。但有啲唔同嘅係，以往女主都只能夠避、擲石等動作但今次終於有武器十字弓同有近戰嘅能力，令到人物操作上有多啲變化而唔單止玩暗殺！
《瘟疫傳說：安魂曲》
上線日期：2022年
相關文章：2022一月動漫新番一覽！ 新一季進巨返嚟啦！仲有咩可以追？
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
