近排去韓國又有新平嘢尋寶！呢期韓妹同當地網民個個洗版式推介呢支韓國DAISO嘅「DAILYCOMMA固體香水膏」，瘋傳一搽出嚟高級感爆棚，甚至話同Jo Malone、Chanel大牌香味有得揮，搞到遊客同當地人都瘋搶！ 最癲係價錢只要3,000韓幣，約港幣$17就可以入手，抵到包色都唔肉赤！
圖片來源：官方圖片｜撰文：Sharon
呢款香水膏特登採用咗好似潤唇膏咁嘅4.7g旋轉設計，超級輕巧！比起一般噴霧式液體香水，佢搭飛機嗰陣唔使煩惱手提行李液體限制，又唔驚會喺袋入面意外漏液。行街隨時想補香只要輕輕搽喺手腕或者頸部就搞掂，非常方便！
系列入面最搶手嘅就係白色包裝嘅「Musk Dawn」，主打柔和舒服嘅白麝香配清新木質調！另外，仲有散發甜美優雅氣息嘅粉色玫瑰香「Dear Rose」，以及男女都啱用嘅深色木質調「Velvet Wood」。呢個價位真係無得挑剔，雖然佢留香時間相對溫和，但勝在細細支直接放入袋，出成日街拎出嚟補兩下完全零難度，十幾蚊入手完全唔肉赤，近期飛韓國嘅朋友經過記得入去望兩眼！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
