吉卜力電影 | 日本動畫大師宮崎駿憑最新作品《蒼鷺與少年》，奪得第81屆金球獎「最佳動畫」，亦是歷年來首部得獎嘅日本動畫！大家睇完電影之後，又最鍾意邊一套吉卜力作品呢？日本Line Research調查5000幾名日本人，最後得出以下排名，頭3名竟然係？
圖片來源：吉卜力官方網站| 撰文：Hedy
吉卜力電影第10位：《夢幻街少女》
由吉卜力工作室於1995年推出嘅動畫電影《夢幻街少女》，係改編自日本少女漫畫家柊葵所創作嘅少女漫畫。電影講述喜愛閱讀嘅少女月島雫，發現每次借書嘅時候，都會有人畀佢更加早借書，「天澤聖司」呢個名一直都令佢感到好奇。隨後更因為貓咪而發現一個名為「地球屋」嘅古物商店，兩人便因此相遇。天澤聖司喜愛拉小提琴，雖然年僅15歲但卻有堅定嘅夢想，亦因為夢想要前往其他國家，兩人約定再見。動畫下細膩地將青春以及兩人追尋夢想嘅感動時刻描繪。
吉卜力電影第9位：《飛天紅豬俠》
喺第一次世界大戰嘅時候，義大利空軍嘅王牌飛行員波魯克，因為中咗魔法變成咗豬嘅樣，隨後成為一名賞金獵人，專門打擊空中綁匪。呢套作品描述人到中年時候嘅感受，係一套帶有宮崎駿自傳性質嘅電影。
吉卜力電影第8位：《崖上的波兒》
大海入面有一條金魚離開咗自己嘅屋企，乘水母嚟到出面嘅世界。而小男孩宗介拯救咗一條金魚，更幫佢改名為波兒，決心要保護佢。而喺過程入面，波兒亦都慢慢愛上咗宗介，更希望可以變成人類。電影將海底世界同魔法場面精彩地展現，同時又生動描寫兩人所面對嘅難關。
吉卜力電影第7位：《哈爾移動城堡》
每次一睇《霍爾的移動城堡》，見到霍爾就令人好心動！電影描述了本來係少女嘅蘇菲，因被荒野女巫下咒，外表卻變成咗70歲嘅老人家。為咗解開呢個詛咒，就要去搵法力高強嘅年輕巫師「霍爾」，並係佢居住嘅移動城堡入面做清潔，兩人更因此譜寫了浪漫嘅愛情故事。
吉卜力電影第6位：《幽靈公主》
《幽靈公主》以日本室町時代為背景，蝦夷族嘅少年阿席達卡，為咗保護族人而遭到詛咒，所以就離開村莊到西方，更被捲入各種鬥爭世界入面。其後見到由山犬神養育長大為人類嘅幽靈公主小桑，兩人試圖透過理解並尋找方法來解決大自然同人類之間嘅紛爭。
吉卜力電影第5位：《風之谷》
《風之谷》獨特嘅敘事風格以環保為主題，講述女主角「娜烏西卡」為風之谷嘅公主，亦是代表著勇氣和智慧，以此化解人類與王蟲之間的矛盾，更著重描寫人類與大自然之間嘅關係，令人反思其中。
吉卜力電影第4位：《魔女宅急便》
《魔女宅急便》為人熟悉嘅女主角琪琪，帶媽媽嘅掃把同埋貓離開家鄉，開始新嘅生活。本來善於飛行嘅佢，透過送快遞來生活，但漸漸地法力卻因而消失。這正正描繪著青春期嘅狀況，總會對自己和人生遇到嘅問題感到困惑，透過細膩呈獻琪琪喺成長過程入面嘅心境轉折，令人感受到作品嘅溫度及所傳遞嘅信息。
吉卜力電影第3位：《天空之城》
《天空之城》裡面嘅「拉普達」，令人印象深刻。身為礦工學徒嘅巴魯，意外之下拯救了持有神秘力量護身符嘅希達，兩人便開展於「拉普達」嘅冒險，傳聞島上更藏有許多寶藏。當中嘅畫面和故事至今仍令人感動。
吉卜力電影第2位：《千與千尋》
《千與千尋》絕對係會令一眾粉絲不斷重睇嘅一套電影，故事講述10歲嘅荻野千尋同家人誤闖咗神靈世界，家人更因為食咗神靈嘅食物而變成豬，荻野千尋不斷尋找令自己同家人返回人類世界。當中裡面嘅角色生動亦有記憶點，如錢婆婆及無臉男等，令大家都深深喜愛入面嘅故事同角色。
吉卜力電影第1位：《龍貓》
可愛嘅龍貓深受小朋友同大人歡迎，更喺調查入面唔同年齡層，其支持度都係第一位，幾乎近半嘅日本人都最鍾意《龍貓》！故事講述小月同小梅意外邂逅森林守護者「龍貓」，當小月搵唔到妹妹嘅時候，更會一齊幫手。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
