香港酸菜魚推介 | 講到川菜中嘅招牌菜式，相信好多人都會話係酸菜魚，唔單止可以食到嫩滑魚肉，加上可口嘅老壇酸菜，酸酸辣辣勁開胃，撈飯食就最好不過！今次小編為大家推介香港7大正宗抵食酸菜魚，最抵人均$60就可以嘆大大碗香辣酸菜魚，即睇以下介紹啦！
圖片來源：Openrice @fafakamjai、Instagram @jhujiansuancaiyu_hk、Openrice @onmelanie、Openrice @小綿羊廚房、Facebook @廚十三老壇酸菜魚、Openrice @Jackey Lau、Openrice @yannisinhk | 撰文：Icy
香港酸菜魚推介 | 1. 友義氣．酸菜魚
「友義氣．酸菜魚」標準酸菜魚$188，份量啱晒兩至三個人開心share，有滿滿嘅新鮮海鱸魚肉，口感嫩滑，而且配菜落得毫不手軟，除咗有必食嘅酸菜，仲有萵荀、蘿蔔、芽菜、薯粉等等。大家可以自選辣度，湯汁香濃而不膩，送飯一流！
【INFO】 友義氣．酸菜魚 地址：葵涌榮芳路9號恆景商場地下G01&11A號舖 營業時間：星期一至日 11:00-23:00
香港酸菜魚推介 | 2. 築間酸菜魚
來自台灣嘅人氣過江龍餐廳「築間酸菜魚」，選址銅鑼灣開設首間海外分店，標準份量「總長酸菜魚」$208，可供一至兩個人品嚐，魚肉口感厚實啖啖肉，酸菜以獨家古法炮製，香辣湯底帶有鮮味。另外仲有多達7款湯底選擇，例如番茄、蝦湯、沙鍋、豬肚骨湯等等，惹味到令人連湯都飲埋！
【INFO】 築間酸菜魚 地址：銅鑼灣軒尼詩道489號銅鑼灣廣場一期2樓202-203號舖 營業時間：星期一至日 11:00-23:00
香港酸菜魚推介 | 3. 鼎泰酸菜魚
位於灣仔嘅鼎泰酸菜魚，招牌老壇酸菜魚好嫩滑，而且大大份有超多配料，例如豆腐、芽菜、蓮藕、紅薯寬粉等等。午市套餐連凍飲只需大約$60，湯底香濃唔算辣，啱晒唔食得辣嘅朋友，撈飯一流！
【INFO】 鼎泰酸菜魚 地址：灣仔謝斐道130-146號地舖 營業時間：星期一至六 07:00-21:00
香港酸菜魚推介 | 4. 銘興酸菜魚
位於黃埔嘅銘興酸菜魚，雖然店面睇落細細間，平平無奇咁，但酸菜魚製作得非常出色，所以吸引唔少街坊光顧。如果一個人想過下口癮，咁就要試試銘興招牌無刺老壇酸菜魚配飯，只需大約$60，魚肉滑溜入味，配有酸菜、豆卜、金菇、芽菜等配菜，夠晒飽肚。
【INFO】 銘興酸菜魚 地址：紅磡黃埔新邨德民街36號地下C號舖 營業時間：星期一至日 11:00-22:00
香港酸菜魚推介 | 5. 廚十三老壇酸菜魚
廚十三老壇酸菜魚選用新鮮鱸魚，以及來自成都嘅酸菜熬煮，酸菜經過90天醃製，充滿正宗傳統四川風味。細份酸菜魚價錢為$198，份量可供兩人品嚐。魚肉非常厚實爽滑，索飽湯汁但不失原有鮮味，加上寬粉、萵筍、豆腐、金針菇等配菜，更有飽足感！
【INFO】 廚十三老壇酸菜魚 地址：尖沙咀北京道12A號太子集團中心18樓 營業時間：星期一至日 11:30-23:00 地址：荃灣大河道100號海之戀商場3樓3017-3018號舖 營業時間：星期一至日 11:30-22:00 地址：荔枝角長義街9號D2 Place ONE 3樓308號舖 營業時間：星期一至日 11:30-22:00
香港酸菜魚推介 | 6. 十二味
十二味主打正宗川菜，招牌酸菜魚用上來自雲南嘅老埕酸菜、四川酸菜及廣東鹹酸菜炮製，口感爽脆香口。午市酸菜魚套餐價錢為$78，可選擇辣度，魚肉爽彈滑溜無腥味，湯底帶有蒜香味，非常開胃下飯。另外仲配有萵荀、雞脾菇、寬粉等等，大大份好滿足！
【INFO】 十二味 地址：分店地址
香港酸菜魚推介 | 7. 太二酸菜魚
太二酸菜魚係內地非常出名嘅酸菜魚餐廳，最近喺香港連開4間分店，大家唔使花時間北上都可以嘆正宗酸菜魚～太二酸菜魚標榜「酸菜比魚更好吃」，老壇酸菜經30天醃製，口感爽脆開胃。老壇子酸菜魚2人份價錢為$258，雖然唔可以自選辣度，但湯底濃而不油膩，食得出鱸魚嘅鮮味。
【INFO】 太二酸菜魚 地址: 九龍塘達之路80號又一城L1樓L1-18號舖 營業時間：星期一至日 12:00-21:00 地址: 九龍城啟德協調道2號AIRSIDE G樓G003號舖 營業時間：星期一至日 12:00-21:00 地址: 尖沙咀河內道18號K11購物藝術館2樓209-211號舖 營業時間：星期一至日 12:00-21:00 地址: 沙田沙田正街18號新城市廣場一期2樓249號舖 營業時間：星期一至日 12:00-21:00
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
