毛孔粗大相信係唔少女仔都會有嘅問題，除咗臉部會生粉刺同痘痘，上妝時仲容易出現卡粉、浮粉嘅情況！其實想皮膚回復細緻，唔一定要洗大錢做醫美，只要喺日常保養做啱以下呢幾步，低成本一樣可以逆轉「粗大毛孔」！
圖片來源：網絡｜撰文：Sharon
毛孔粗大主要分為以下三種類型，「出油型」皮脂腺分泌過度旺盛，毛孔就會好似排油嘅管道，油產量越多，管道自然就被撐得越大。「堵塞型」清潔唔徹底或角質代謝異常，會導致油脂同角質混合物卡喺毛孔口，將毛孔越撐越大。「老化型」隨住年紀增長，新陳代謝慢咗，骨膠原同彈性蛋白亦都慢慢流失。毛孔周圍冇咗支撐力，皮膚一dup，毛孔就會被拉長，變成好似水滴形或者Y字形嘅老化毛孔。
不過，只要平時要做好基礎保濕、適度控油，再配合抗初老護膚品同從日常飲食著手，就可以好好改善毛孔粗大嘅問題！
1. 深度清潔雙重奏：徹底卸妝+溫和潔面
要毛孔變細，首要任務係唔好畀污垢塞住佢！如果平時化妝卸得唔乾淨，殘留物就會撐大毛孔，仲會引致黑頭粉刺。
-
卸妝要徹底： 一定要用啱自己膚質嘅卸妝產品，將面上面嘅化妝品徹底清走。
-
洗面要溫和： 每天早晚用溫和嘅洗面乳洗臉，揀洗面奶最緊要性質溫和。千祈唔好以為「大力洗、過度清潔」就乾淨，咁樣反而會破壞皮膚屏障！
-
每週去角質： 建議一星期使用泥膜或去角質產品深層清潔。亦可以試下用含有水楊酸（BHA）、杏仁酸或A醇（Retinol）產品，水楊酸能深入毛孔溶解油脂；A醇則能促進皮膚代謝並刺激膠原蛋白增生。不過溫馨提示，敏感肌嘅朋友要試用產品會唔會令皮膚過敏呀！
2. 熱水蒸氣「開門」法
喺進行深層清潔或者敷 Mask 之前，小編強烈推薦大家玩下「蒸氣療法」！蒸氣可以溫和地打開毛孔，令入面嘅污垢更易被清理，之後再塗保養品亦會吸收得更加深層。
3. 加強保濕與防曬
好多人毛孔粗大，其實係因為肌膚缺水，油水失衡會讓皮膚分泌更多油脂，所以清爽嘅保濕好重要！
-
補水鎖水： 潔面後要即刻用保濕精華同面霜，鎖住水分，令肌膚細胞「泵」一聲漲卜卜，毛孔自然顯得細咗。
-
善用收斂爽膚水： 可以選用含有收斂成分、植物提取物或者微量酒精嘅爽膚水。建議用嚟局部濕敷，即時緊緻肌膚，收斂毛孔效果好顯著！
另外，紫外線（UV）會破壞皮膚嘅膠原蛋白，令皮膚鬆弛，形成「老化型毛孔」。無論陰天定晴天，出門前一定要搽足防曬霜，先可以保護肌膚免受紫外光傷害，咁樣先可以由源頭預防毛孔擴張！
單靠外塗係唔夠㗎，「內調」都好重要！小編就同大家分享5個超簡單嘅飲食習慣，由內到外幫你鎖緊毛孔，keep住彈性！
1. 多食蔬菜水果：抗氧神仙補劑！
毛孔大好多時係因為肌膚開始老化、鬆弛。水果同綠葉蔬菜入面含有滿滿嘅抗氧化劑同維他命，簡直係肌膚嘅防護罩！記得食多啲富含維他命C嘅嘢，好似橙、葡萄柚、士多啤梨同綠葉蔬菜。維他命C係合成膠原蛋白嘅必備元素，皮膚夠彈性，毛孔自然就「縮」返入去，望落細緻好多！
2. 補充足夠優質蛋白質
我哋嘅皮膚組織大部分都係由蛋白質組成㗎。如果唔夠蛋白質，肌膚修復力下降，毛孔受損就更難復原！平時餐單一定要加返啲優質蛋白質，好似雞肉、魚類、雞蛋、豆類同堅果。食得啱，皮膚自我更新同修復嘅速度就會Double UP！
3. 攝取健康脂肪
好嘅脂肪（Omega-3 脂肪酸）係皮膚水油平衡嘅關鍵！佢可以幫你抗發炎，改善粗糙暗啞。適量食啲深海魚油、亞麻籽同堅果，幫皮膚建立一層健康嘅保護膜，皮膚摸落自然滑手，毛孔都無咁明顯！
4. 飲夠水
皮膚一唔夠水，就會出現「缺水性出油」，油分塞住毛孔就會令毛孔愈撐愈大！每日一定要飲足夠嘅水。水分夠，身體排毒順暢，皮膚自然會透亮！
5. 戒口！避免食「重口味、高糖」食物
雞、珍奶等高糖、重口味食物真係肌膚殺手！呢啲油膩、辛辣同高糖分嘅加工食物，會令身體同皮膚慢性發炎，令皮脂腺瘋狂分泌油脂。控制糖分同油膩食物嘅攝取，少一分甜，皮膚就少一分「油光」，毛孔自然乖乖聽話！
要外塗保養 + 內調飲食雙管齊下，先可以擁有真正「零毛孔」，希望各位女士們都可以擁有靚靚肌膚～
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
