日本女僕Cafe相信好多人都聽過，年輕嘅少女會著上女僕嘅裝束，將顧客當作私人住宅中嘅主人一般提供服務！但最近喺日本群馬縣桐生市出現「婆婆女僕Cafe」，一班婆婆以女僕造型登場，吸引唔少顧客慕名而來，討論度相當高！
圖片來源：threads@yuichi_kubota2310、yomiuri.co.jp｜撰文：Sharon
位於日本群馬縣桐生市嘅「冥土喫茶しゃんぐりら」係一間婆婆女僕Cafe，以圍繞生死嘅概念嘅Cafe，最大特色係呢度嘅女僕全部都係65歲或以上，佢哋會著住白色蕾絲圍裙嘅女僕裝同大家見面！上菜時女僕們會對客人施展魔法唸咒語，講：「喪え喪えきゅん（希望你吃得開心）」，仲會賣萌同畀心心大家添！
Cafe門前設有象徵「三途川」（日本傳說中嘅冥河）嘅藍色繩索，廁所則被命名為「極樂淨土」。店內仲會舉辦生死相關嘅活動，包捨類似皮影戲嘅紙芝居同棺材體驗，以幽默又輕鬆嘅形式去探討生老病死嘅議題。而「冥土喫茶しゃんぐりら」創立理念係希望為老人家提供一個舒適嘅空間，從中可以搵到生活嘅意義同價值，非常有意思！
Cafe嘅兩位元祖女僕分別為66歲同65歲，起初佢哋認為「女僕咖啡廳係年輕人嘅專利」，但最終喺店長同其他店員嘅鼓勵下踏出新嘗試，慢慢享受同顧客互動，從中得到快樂同活著嘅價值！除咗伯伯級嘅顧客，仲有唔少年輕人紛紛慕名而來！大家有機會去日本嘅話，又會唔會想去呢？
【INFO】 《冥土喫茶しゃんぐりら》 地址：群馬縣桐生市本町5丁目 營業時間：08:00 - 10:00（每月第一個星期六）
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
