鍾意食鰻魚嘅朋友注意！日本鰻魚店「うなぎ四代目菊川」終於嚟到香港開設分店！呢間老店由1932年創立，係超過90年歷史嘅老字號鰻魚名店，主打招牌「一本鰻」，以一條完整嘅鰻魚送到客人面前，鮮味十足，香港嘅朋友有機會一定要嚟試下啊！
圖片來源：IG@unagi.yondaime.kikukawa_jp｜撰文：Sharon
「うなぎ四代目菊川」嘅鰻魚以大火炭燒，能保留鰻魚嘅鮮味，肉質細嫩可口、外層香脆，再加上配以秘製醬汁，口感非常豐富！小編大推招牌「一本鰻」，以一整條鰻魚送到客人面前，視覺效果相當震撼！建議大家可以跟住當地人嘅食法，第一種食法配飯享用；第二種食法配搭配料一齊食用，包括蔥花、海苔等；第三種食法則以高湯做成茶泡飯，每一個方法享用都有另一番滋味！
香港分店位於銅鑼灣利園一期，提供58個座位，餐廳環境舒適！同日本店一樣，設開放式廚房，客人可以直接欣賞到師傅烤鰻魚嘅過程。除咗招牌鰻魚，當中仲有其他小食，包括鰻魚春卷、鰻骨仙貝同炸鰻肝等。鰻魚控嘅你千祈唔好錯過，快啲約埋朋友嚟食啦！
【INFO】 《うなぎ四代目菊川》 地址：香港銅鑼灣希慎道33號利園一期L401A 營業時間：11:00-15:00；17:30 – 21:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
