鬼滅之刃展覽 | 位於東京京橋嘅全新博物館將會舉辦首個以動畫《鬼滅之刃》，聚焦以「柱」為主題嘅大型展覽！除咗有展覽睇，展出1,000幅原畫之外，亦有限定主題咖啡廳，每款嘢食睇落都超精美～即刻睇吓地址喺邊啦！
圖片來源： 官方圖片 | 撰文：Hedy
東京京橋全新博物館「CREATIVE MUSEUM TOKYO」，將於11月2日開幕，預計每年都會舉辦4場大型展覽，等大家都可以欣賞到如動漫、設計以及音樂等流行文化。而博物館將會喺開幕日，舉辦以動畫《鬼滅之刃》「柱」為主題嘅大型展覽，各位鍾意《鬼滅之刃》嘅朋友絕對唔好錯過！
鬼滅之刃展覽 | 展出1,000幅原畫
展覽將會以動畫入面鬼殺隊中最強嘅存在「柱」為主題，帶領大家進入「無限城」嘅世界，感受九位柱嘅魅力，當中包括水柱「富岡義勇」、蟲柱「胡蝶忍」、炎柱「煉獄杏壽郎」、霞柱「時透無一郎」、恋柱「甘露寺蜜璃」、風柱「不死川實彌」、蛇柱「伊黑小芭内」、岩柱「悲鳴嶼行冥」以及音柱「宇髄天元」。大家將會喺約1,200平方米嘅展廳入面睇到約1,000幅栩栩如生嘅原畫以及各種影像展品，匯聚咗五年間動畫所繪製嘅作品，仲可以透過特別嘅聲音體驗，去感受每一位嘅魅力！
鬼滅之刃展覽 | 特製9款菜式/餐飲/甜品
同場亦有以限定主題咖啡廳，以9大柱為主題製作出9款特別嘅菜式、餐飲以及甜品。每款菜式都配合咗各自嘅代表顏色，望落超吸引，就以蟲柱胡蝶忍為例，可以享用到紫薯濃湯意粉！而且每款菜式都唔算特別貴，最貴都只係港幣約$96，粉絲們必去！小編就推薦大家可以買埋樽裝飲品，可以攞嚟打卡～
+1
【INFO】 《「鬼滅の刃」 柱展 ーそして無限城へー》 日期：即日起至2025年3月2日 時間：10:00至20:00 地址：東京都中央区京橋1-7-1 TODA BUILDING 6F 價錢：成人約港幣$101；小童約港幣$51
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
