白川鄉點燈2025 | 大家聖誕節又會唔會去旅行呢～如果想感受白色聖誕節，小編就推薦大家可以去白川鄉，每年嘅點燈活動更係相當夢幻，就好似置身於童話小鎮一樣，不過只有成功預約嘅人士先可以喺晚間入場睇點燈活動～即刻睇睇有邊5大預約方法！
圖片來源：Facebook@白川郷観光協会 | 撰文：Hedy
每逢踏入冬季，被列為世界遺產之一嘅白川鄉，其點燈活動都吸引唔少旅客嚟參與～白川鄉被群山環抱，每逢冬天村民為咗防止積雪壓垮房屋，都會將屋頂建成尖銳嘅形狀，就好似一個合起嘅手，因此被稱為「合掌村」。一到冬天嘅時候，木屋都會被白茫茫嘅厚雪覆蓋，每家每戶都映照著閃爍嘅光芒，就好似置身於夢幻嘅童話世界一樣，簡直係一生人必到訪嘅地方！
白川鄉點燈2025 | 5大預約方法
由於近年來雪量較少，2025年白川鄉點燈活動將會減少至4場，並於2025年1月13日、1月19日、1月26日以及2月2日舉行，亮燈時間為下午5點半至晚上7點半！如果大家只係喺日間觀光就唔需要預約，不過就建議大家要喺下午3點之前進入～由於活動採用完全預約制，想參與夜間點燈嘅活動，就一定要喺事前預約，並且被選中，否則就只可以喺日間時段參觀～即刻睇睇白川鄉點燈2025嘅5大預約方法：
白川鄉點燈2025預約方法 | 1.住宿抽籤
大家如果想參與晚間點燈活動，就可以到白川鄉觀光協會網站跟步驟申請，大家可以由即日起到2024年10月31日晚上11時59分前報名，記得每人只可以申請一次！提交後便會通過抽選方式選出點燈活動當晚留宿嘅遊客。如果成功當選嘅話，大家就會喺2024年11月10日收到電子郵件通知～
白川鄉點燈2025預約方法 | 2. 停車位預約
如果打算自駕遊嘅旅客，就可以提前到白川鄉觀光協會網站預約停車位，但當中並不包含觀景台門票。點燈活動指定停車位嘅預約以先到先得方式進行。第二次預約將會喺2024年12月1日13:00開始，指定停車位只接受一般小型客車，每架車最多乘載10人，收費亦都會根據車上嘅人數而改變，收費為5,000日元至9,000日元（約264至476港幣）。
白川鄉點燈2025預約方法 | 3. 的士專用停車位預約
大家如果打算搭的士入去，都要先喺官方網站進行停車位預約，然後先再安排的士到Midashima停車泊車，同樣地都係唔包觀景台門票。
白川鄉點燈2025預約方法 | 4. 參加巴士觀光活動
白川鄉觀光協會同4間巴士公司合作，大家可以乘搭快速路線巴士，當中包括濃飛巴士、加越能巴士、富士地鐵巴士和北鐵巴士去參加點燈活動，當中或可能不含觀景台入場券，大家買嘅時候記得要睇清楚！
白川鄉點燈2025預約方法 | 5. 旅行社觀光團
就算以上4個方法大家都預約唔到，都可以參考由各大旅行社開辦嘅白川鄉點燈旅行團，當中包括大家最熟悉嘅klook、Trip.com等平台。
【INFO】
《白川鄉2025》
日期：2025年1月13日、1月19日、1月26日以及2月2日
點燈時間：17:30至19:30
地址：白川村荻町地區
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
