「同佢講呀！同我講做乜！」MEME圖大家就用唔少，就算冇用過都一定見過呢個看似夾硬擠出笑容嘅「強顏歡笑伯伯」Hide the Pain Harold。原來佢近日嚟咗香港，除咗喺用廣東話同大家打招呼之外，佢仲去咗好多地方打卡。唔少網民表示好開心，仲去佢Instagram留言話好想偶遇添。
圖片來源：IG@painharold、FB@Arató András、網絡圖片｜撰文：Angela
「強顏歡笑伯伯」其實係MEME圖主角「Hide the Pain Harold」，真實姓名係「András István Arató」。佢琴日（2日）喺社交網站上面分享一張身處灣仔嘅相，面露招牌笑容，照片描述仲寫：「A Hungarian in Hong Kong 🇭🇺🇭🇰❤️」（一個匈牙利人在香港）。之後又喺灣仔萬麗海景酒店打卡，如果唔係睇到佢同身後嘅紅色的士合照，都唔敢相信佢真係嚟咗香港阿！佢似乎好欣賞香港夜景，夜晚特登去灣仔會展海旁打卡，分享夜景同香港嘅城市景致。
András對香港嘅事物同文化差異好感興趣，佢開心Share喺酒店住宿嘅體驗，對於酒店被高樓大廈環繞，卻有一個小池塘感到驚訝。仲影低咗雞腳同熊仔糖，話：「如果你喜歡，早餐可以食雞腳同熊仔糖。」
之後András就坐上張保仔帆船參加活動，仲喺船上面拍片，用廣東話同大家講：「你哋好！」見佢玩得咁興奮，網民都表示好歡迎佢嚟到香港，紛紛留言話「我成日同你啲MEME㗎」、「好想同你影相」、「幾時搞Fans Meeting」。
András如何成為MEME紅人？
András係一位匈牙利人，原本係一名退休電燈工程師。某日佢分享咗一張同老婆去土耳其旅行嘅相，竟然畀Stoke Photo（圖庫相片）公司睇中用嚟做圖庫相片，仲改咗藝名「Hide the Pain Harold」。點知佢意外爆紅，網民認為佢「笑容背後好似隱藏著痛苦」而瘋狂改圖，自此成為MEME紅人「強顏歡笑伯伯」。起初佢並唔鍾意自己被改圖，但慢慢都欣然接受大家對自己嘅喜愛，依家佢想透過呢個笑容話畀大家知，就算「強顏歡笑」都可以生活得開心。
