最近準備去濟州島玩嘅朋友，行程表一定要留個位畀呢個全新爆紅嘅治癒秘境！由韓國知名遊戲公司Smilegate聯手打造嘅體驗型主題樂園 「Dolcori Forest（돌코리숲）」 已經喺西歸浦市正式開幕啦！
圖片來源：돌코리숲｜撰文：Sharon
位於濟州嘅「貓咪森林樂園」佔地約64萬平方呎，前身其實係一個閒置咗嘅小人國公園，依家融入咗濟州傳說中嘅「石貓」精靈角色，搖身一變成為隱藏喺森林入面嘅超夢幻貓咪村落！
園區保留咗以前小人國嘅世界微縮建築，再加入各式各樣嘅巨型貓咪藝術裝置。睇住一隻隻巨貓好似怪獸咁「入侵」世界名勝，畫面得意到震，絕對係瘋狂打卡位！場內仲有互動室內展區，入室內搵5隻原創貓咪主角（Dodol、Coco、Momo、Chichi 同 Shasha）玩啦！入面有超靚嘅光影互動體驗同集章任務，帶你慢慢投入佢哋嘅奇妙世界。
除咗打卡，呢度仲好啱慢活。你可以喺樹齡超過30年嘅巨樹下野餐、睇書，園區仲設有迷你火車、遙控船同木球場，大人小朋友都咁啱玩！現場更設貓奴專屬Cafe「Momo Bakery」，咖啡店嘅外觀都特別設計成貓咪背影同埋捲曲嘅貓尾巴，未行入去已經要相機食先！嚟緊去濟州島嘅朋友，記得要Bookmark呢個地方啦～
【INFO】 《Dolcori Forest (돌코리숲)》 地址：제주 서귀포시 안덕면 중산간서로 1878 (濟州特別自治道西歸浦市中山間西路 1878) 營業時間：09:00 - 18:00 門票費用：成人基本票：19,000韓元；特展套票：23,000韓元
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
