IG新功能 | 相信絕大部分嘅人都有用開Instagram，無論係用嚟同朋友傾計定係分享身邊嘅大小事，都會用到！最近Instagram推出6大新功能，依家就算Send錯Message都可以喺限時入面重新編輯，即刻睇睇有咩新功能！
圖片來源： META、SAUCE編輯部 | 撰文：Hedy
IG新功能2024 | 1. 限時編輯內容
唔知大家同人傾計嘅時候，又有冇成日打錯字呢？Instagram終於喺聊天室入面推出編輯內容功能，只要係Send Message之後嘅15分鐘，就可以長按去修改你嘅內容，咁就唔需要每次都收回信息，超方便！當你修改完之後，聊天室就會顯示已編輯～
IG新功能2024 | 2. 置頂聊天室
同其他應用程式一樣，Instagram最多可以置頂3個聊天室，無論喺群組定係單獨嘅對話都可以置頂，咁就唔怕會Miss咗重要信息！只要打開Instagram，掃過去聊天室介面，將想置頂嘅對話向左掃，就會見到「置頂」按鈕，你亦可以隨時取消置頂！只要見到聊天室有釘選嘅圖案就代表已經成功！
IG新功能2024 | 3. 已讀功能
如果唔想畀人睇到自己已讀信息，就可以去IG關閉已讀標記，就算朋友喺聊天室傾計，你都可以直接睇到佢哋嘅信息，但就冇人知你已讀咗未～只要喺對方嘅聊天室入面，點選對方名稱，再撳「私隱和網路安全」，喺「誰可以看到你的動態」當中嘅「已讀標記」，關閉該欄就可以完成。咁就冇人會再睇到你已讀咗信息未！
IG新功能2024 | 4. 儲存貼圖
每次回覆朋友嘅時候，都要搜尋翻喜愛嘅貼圖，相對會有啲費時！依家唔需要再搵嚟搵去，只要長撳貼圖就可以將佢儲存落嚟！咁每次回覆嘅時候，儲存後呢啲貼圖就會出現喺最上方，超方便～
IG新功能2024 | 5. 更多主題
唔想用死同一個主題，咁就可以不時去主題入面睇睇，最近更加入更多主題，包括「沙丘：第二部」、「降世神通：最後的氣宗」、「密友」以及「愛情」等，不時換下主題都幾好～
IG新功能2024 | 6. 隱藏小遊戲
除咗以上呢5個更新之外，亦有唔少眼利嘅網民發現IG聊天室竟然可以玩遊戲？只要喺聊天室入面輸入任意一個符號並點擊，就會好似出去咗一個新世界咁！本身你輸入嘅符號將會變成一個波，你絕對唔可以畀佢跌落嚟，隨住得分越多，速度亦都會變快！無聊嘅時候絕對適合大家開嚟消磨時間！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
