菲林相機app | 近年嚟唔少人都會選擇用菲林相機影相，但由於相機有一定嘅重量，未必每日都會隨身攜帶。但如果有重要嘅聚會，又想留低呢個開心難忘嘅時刻，小編推薦5款具質感嘅菲林相機APP畀大家，免費或者付費都有，超簡單上手！
圖片來源：SAUCE編輯部、Instagram@dazz.camera、Instagram@fimo_app、Google play |撰文：Hedy
手機影相固然方便，唔使下下帶住部相機出門口，但大家可能都會覺得手機內置嘅原相機影相差咗啲「味道」，所以好多人都會選擇唔同嘅filter，甚或使用具懷舊色調同風味嘅菲林相機APP。假如係追求復古嘅人士，不如試下呢5款相機APP！
菲林相機app | 1. Dazz Camera
對於熱愛紀錄日常生活嘅人，Dazz Camera就相當適合你，除咗影相之外，你更加可以善用裡面超多濾鏡拍片，拍低每刻重要嘅時刻，一個APP就可以同時滿足你嘅需求！除咗有基本嘅懷舊底片之外，你仲可以選擇即影即有相紙、半格相片同埋最近大熱嘅CCD Filter！黑白效果、魚眼效果以及加入日期等都可以做到，相信之後睇翻都會覺得回憶感滿滿！
【INFO】
《Dazz Camera》
Apple用戶下載連結：請按此
Android用戶下載連結：暫未推出
菲林相機app | 2. Fimo Camera
Fimo Camera嘅介面以一部黑色菲林相機為主，連同相機嘅外框、取景框、膠卷以及換卷嘅方式，其操作均仿照真實相機。盼望能細節地還原菲林相機嘅使用感受，同時色彩影調和顆粒度上，盡量貼合原廠膠卷，咁就可以帶大家體驗真實膠卷嘅色調！就連不同嘅節日例如聖誕節或情人節等，都會推出特別嘅濾鏡，令大家喺節日影相都更特別！
【INFO】
《Fimo Camera》
Apple用戶下載連結：請按此
Android用戶下載連結：請按此
菲林相機app | 3. Huji Cam
鍾意用菲林相機嘅大家，有時候唔想等咁耐先收到靚相，Huji Cam就可以做到即時收到相嘅效果。Huji Cam適合新手使用，介面簡單之餘，更係仿照即棄菲林相機，只需要撳快門以及閃光燈，就可以輕鬆影相！相機更會呈現漏光嘅效果，帶點復古之餘，更可以隨時收穫一張意想不到嘅靚相！
【INFO】
《Huji Cam》
Apple用戶下載連結：請按此
Android用戶下載連結：請按此
菲林相機app | 4. RNI Films: Photo & RAW Editor
RNI Flim有別於以上可以影相嘅菲林相機，佢最大嘅用途係畀你揀相簿原本嘅相，加入去唔同嘅濾鏡仿菲林做後製調色！如果唔想影相前就揀定Filter嘅你，絕對推薦大家下載呢個應用程式！當中更有多款熱門但已停產嘅底片如Fuji Pro 400H等選擇，唔單只可以揀自己鍾意嘅風格，仲有黑白同埋懷舊等特別色調，只要再調整埋張相嘅亮度、對比度同顆粒之後，就可以令張相變得獨一無二！
【INFO】
《RNI Films: Photo & RAW Editor》
Apple用戶下載連結：請按此
Android用戶下載連結：暫未推出
菲林相機app | 5. Flica
Flica係一款結合咗數碼相機同埋膠片感光度嘅相機，大家可以直接揀用如Kodak、Fuji等牌子嘅濾鏡，當中更有不同嘅ISO畀你選擇。而菲林當中最主要嘅顆粒，你都可以喺度選擇想要嘅強度，再加上你亦可以手動選擇白平衡、景深及曝光度等。同時你亦可以選擇加入不同效果嘅日期，或者直接將相簿嘅相套入濾鏡，相當方便！不過由於呢一款相機並非免費，如果對影相有要求嘅人士，不妨可以試下，或者等下會唔會有限時免費嘅機會！
【INFO】
《Flica》
Apple用戶下載連結：請按此
Android用戶下載連結：暫未推出
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
