京都景點2024 | 各位爸爸媽媽帶小朋友去日本嘅時候，會唔會參觀埋當地嘅水族館，帶佢哋認識更多海洋生物呢？京都水族館舉辦期間限定活動「水母·雨傘·風鈴」，將會展示出超夢幻嘅水母風鈴，仲可以近距離睇到每種水母觸手唔同嘅顏色同特徵等，簡直就係藝術品！
圖片來源：官方圖片 | 撰文：Hedy
大家都可以喺京都水族館見到種類繁多嘅海洋生物例如企鵝、海豹以及魚類等，更可以喺360度全景水族館欣賞水母，好吸引呀！鍾意水母嘅大家絕對唔可以錯過今個夏天所舉辦嘅「水母·雨傘·風鈴」活動，今次活動係京都水族館自2021年成立以來舉辦嘅第4次夏季限定活動，今年除咗展示由24種水母為主題嘅170個水母風鈴之外，亦都喺2樓平台新增咗水母京和傘展示空間！
京都水族館 | 1. 170個水母風鈴
水母風鈴由新潟縣玻璃專門店TAKUGLASS所製作，透過飼育員嘅視覺，將唔同品種嘅水母細節重現，例如觸手嘅顏色、形狀、長度以及特徵等，融合精湛工藝打造而成！大家絕對要落足眼力欣賞呢170個獨一無二嘅水母～
京都水族館 | 2. 水母京和傘
除咗水母風鈴之外，今年亦新增水母京和傘展示空間，由創業於日本江戶末期嘅京和傘老字號商店日吉屋所製造！以日本傳統傘紋為裝飾，同時亦融入咗18種水母嘅水墨畫，每款京和傘嘅尺寸不一，極具美感！大家都可以透過2樓露台空間影相～
京都水族館 | 3. 傍晚亮燈
活動期間每日下午5點以後，都會亮燈，柔和嘅燈光點亮每款獨特嘅水母風鈴以及京和傘，營造出同日頭完全唔同嘅氣氛，超推薦大家過嚟體驗。水母風鈴嘅搖擺就好似為大家奏出涼爽嘅夏日風情咁。
京都水族館 | 4. 水母風鈴限量發售
京都水族館每年都會限量發售水母風鈴，總共有透明、藍色、粉色以及紫色四種顏色。每一個都係手工製，所以每款水母風鈴嘅形狀、顏色同聲音都係獨一無二。每個由TAKU GLASS出售，每個大約係港幣$190！
【INFO】 《京都水族館「水母·雨傘·風鈴」》 日期：2024年5月30日至9月30日 開放時間：10:00至18:00 入場費用：成人約港幣$120；高中學生(16至18歲）約港幣$90；初中及小學生（6至15歲）約港幣$60；小童（3至5歲）約港幣$40 地址：京都市下京區観喜寺町 35-1梅小路公園
