鴨脷洲洪聖傳統文化節2025 | 每年農曆二月，鴨脷洲街坊同慶公社都會舉辦慶祝洪聖誕活動，鴨脷洲洪聖傳統文化節將會去到3月17日，公眾都可以一齊參與唔同活動，包括水燈祈福、龍舟拜廟、賀誕巡遊、神功戲等，即刻入內文睇吓有咩玩啦！
圖片來源：官方圖片 | 撰文：Hedy
香港雖然好細，但大家有冇深入了解過鴨脷洲嘅歷史同文化呢？鴨脷洲洪聖傳統文化節就絕對係一個好機會帶大家認識吓，一齊參加洪聖傳統文化導賞團，穿梭鴨脷洲探索。鴨脷洲洪聖傳統文化節2025以「匯聚傳承」為主題，由即日起至2025年3月17日隆重舉行，無論係本地漁民、市民定係國際遊客都可以參與一連串嘅精彩活動！
洪聖傳統文化節活動 | 1. 洪聖古廟廟宇導賞團
洪聖傳統文化節係南區一個極富地方特色信仰嘅大型傳統文化活動， 每年洪聖爺寶誕， 大批居民準備各類祭品酬謝神恩， 鴨脷洲洪聖古廟外會特別熱鬧， 至今鴨脷洲洪聖古廟已逾百年歷史！廟入面保存咗唔少珍貴嘅歷史文物，所以華人廟宇委員將於3月8日至3月9日，特設2場洪聖古廟廟宇導賞活動，邀請大家一齊參觀歷史悠久嘅洪聖古廟， 探索古廟背後嘅歷史故事丶欣賞廟內珍貴嘅歷史文物等等！
洪聖傳統文化節活動 | 2. 首次舉辦國際高椿舞獅邀請賽
鴨脷洲洪聖傳統文化節將首次舉辦國際高椿舞獅邀請賽並於2025年3月15日舉行， 邀請到中國內地， 馬來西亞， 新加坡， 越南等合共13隊頂尖醒獅隊伍來港， 與香港隊一較高下， 爭奪首屆高椿之王寶座！各地醒獅競技精英將於高達2至3米嘅梅花樁陣中大顯身手與默契，大家都可以喺現場睇精彩刺激嘅表演～
洪聖傳統文化節活動 | 3. 賀誕神功戲演出
今年繼續由名伶蓋鳴暉嘅鳴芝聲劇團敲響鑼鼓於2025年3月8日至3月12日期間， 為大家演出《六國大封相》 、《龍鳳爭掛帥》、《唐明皇》、《 牡丹亭驚夢》、《紫釵記》 以及《帝女花》等共11個經典戲寶！
【INFO】 《賀誕神功戲》 日期：2025年3月8日至3月12日（星期六至星期三） 時間：13:30至17:00；18:45至22:30 地點：鴨脷洲公園足球場 – 大戲棚 票價：$380、$230、$120
洪聖傳統文化節活動 | 4. 水燈晚會
水燈晚會為節慶嘅重要儀式，象徵祈福納祥、送走災厄、迎接美好，於水燈上注入願望， 祈求洪聖爺保佑來年一切遂順， 合境平安。現場參加者需要額外購買祈福水燈 (港幣$38)。
【INFO】 《水燈晚會》 日期：2025年3月8至12日 時間：18:30至21:30 （30分鐘為一個時段） 地點：鴨脷洲公園足球場
洪聖傳統文化節活動 | 5. 賀誕巡遊表演
賀誕巡隊伍將會由鴨脷洲洪聖廟出發， 穿越鴨脷洲大街， 以鴨脷洲公園為終點， 遊走整個鴨脷洲， 屆時除咗有舞龍舞獅表演之外， 仲有中國民族舞、小學生鼓隊以及海洋公園表演隊等，相當熱鬧。
【INFO】 《賀誕巡遊表演》 日期：2025年3月16日（星期日） 時間：下午1:30 - 5:00 地點：鴨脷洲洪聖古廟、鴨脷洲洪聖廣場、鴨脷洲海濱公園、鴨脷洲街道、鴨脷洲公園足球場
洪聖傳統文化節活動 | 6. 小戲棚–傳情達意戲中尋
文化節亦特別增添多項互動體驗，除咗有5日連場嘅神功戲之外，戲棚旁仲特設小戲棚， 可穿上戲服， 頭飾與道具， 化身戲中角色走進粵劇的世界親身感受傳統粵劇文化並拍攝留念，親身體驗粵劇～
【INFO】 《小戲棚》 日期：2025年3月8 - 12日（星期六至三）、15 - 16日（星期六、日） 時間：3月8日（星期六）：下午 4:30 - 10:00；3月9-12日 （星期日至星期三）：下午1:00 - 10:00；3月15 - 16日（星期六、日）：上午11:00 - 下午5:00 地點：鴨脷洲公園足球場
洪聖傳統文化節活動 | 7. 醒獅體驗班
除咗粵劇之外，大家仲可以喺現場玩醒獅體驗班，嘗試擔當唔同嘅角色， 學習基本舞獅動作，了解呢門武藝與傳統文化結合嘅獨有藝術！
【INFO】
《醒獅體驗班》
日期：2025年3月8日至10日（星期六至星期一）
地點：鴨脷洲公園足球場
報名連結：請按此
洪聖傳統文化節活動 | 8. 南區洪聖市集
【INFO】 《南區洪聖市集》 日期及時間：3月8日下午4:30 - 晚上10:00；3月9-12日 下午1:00 - 晚上10:00；3月15-16日｜上午11:00 - 下午5:00 地點：鴨脷洲大街公園足球場
洪聖傳統文化節 | 9. 集體花牌製作工作坊
大家成日喺戲棚竹架上見到一個個色彩鮮豔、圖案繁複嘅花牌，除咗係本地獨有嘅民間技藝之外，仲係香港嘅非物質文化遺產之一。製作過程需要高超嘅手工藝技能，包括寫大字、摺花、製作配件和上棚等。花牌象徵著傳統嘅祝福和美好願望，而南區洪聖市集特設一場「集體花牌製作工作坊」，等參加者共同體驗1比1花牌的製作過程，感受傳統文化嘅魅力！活動只限即場報名，名額10位，先到先得！
【INFO】 《集體花牌製作工作坊》 日期：2025年3月8日 時間：上午10:30 - 12:00 地點：鴨脷洲公園足球場 費用：全免
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
