海南雞推薦 | 香港7大人氣海南雞飯 前酒店廚師主理！去骨粉嫩滑雞/惹味油飯雞湯

海南雞推薦 | 相信好多香港人都鍾意食海南雞飯，啖啖肉充滿油香，非常開胃，而Facebook上更特別出現「香港海南雞飯關注群組」，搜羅香港多間抵食好味嘅海南雞飯店，唔使飛去外地都可以品嚐到惹味海南雞飯！小編就為大家介紹香港7大人氣海南雞飯店，跟住以下指南去搵食啦！

圖片來源：金雞去骨海南雞專門店、勇記海南雞、Openrice @Bunnytummy.hk、Openrice @eatgoodwest_foodie、Openrice @shan66332200、Openrice @honq、Openrice @Foodastics、Openrice @為食MoJil | 撰文：Icy

香港海南雞飯 | 1. 金雞去骨海南雞專門店

擁有四間分店嘅金雞去骨海南雞專門店，每逢午飯時間都吸引大量客人大排長龍。招牌去骨海南雞飯只睇賣相已經好吸引，以瑤柱上湯浸煮海南雞，外皮充滿光澤感，雞肉食落嫩滑入味，配上加入秘製香料嘅油飯，難怪多年嚟一直收穫大量好評。

【INFO】
金雞去骨海南雞專門店
地址：荃灣昌泰街3-5號富榮大廈地下2號舖/佐敦白加士街85號地舖/九龍城衙前圍道84號地下B號舖/西貢福民路34號地舖
營業時間：星期一至日 12:00-00:00（荃灣）/星期一至日 11:00-22:00（佐敦）/星期一至日 10:00-22:00（九龍城）/星期一至日 11:00-20:00（西貢）

香港海南雞飯 | 2. 勇記海南雞

位於紅磡嘅勇記海南雞，由前君悅酒店廚師主理，每日開店前已經開始出現人龍，通常下午前就已經售罄，想食都唔係咁容易！招牌去骨海南雞飯會附送清甜椰子雞湯，內有片片椰子肉，真材實料。海南雞皮滑肉嫩，一啲都唔肥，再點上特製酸甜醬汁，撈飯一流～

【INFO】
勇記海南雞
地址：紅磡馬頭圍道23-35H號隆基大樓地下29L號舖/上環蘇杭街102號江寧大廈地舖
營業時間：星期一至六 12:00-19:30（紅磡）/星期一至六 11:30-19:30（上環）

香港海南雞飯 | 3. 全日雞實驗所

於深水埗起家，後來搬到北角嘅全日雞實驗所，主打即日製作嘅新鮮海南雞飯，店主更自家研發機器浸雞，精準控制湯汁溫度，確保每啖雞肉都鮮嫩多汁。每個海南雞飯套餐都會附送無味精椰子雞湯、清爽醬油青瓜、以及秘製醬汁，香口油飯則選用有嚼勁嘅金鳳米，可謂每個細節都花盡心思～

【INFO】
全日雞實驗所
地址：北角和富道21-53號和富地庫B50-51號舖和富美食廣場C1及C2號舖
營業時間：星期一至日 12:00-20:45（逢星期三休息）

香港海南雞飯 | 4. 蘇山雞飯

位於長沙灣嘅蘇山雞飯主打各款高質素星馬風味菜式，當中嘅招牌走地海南雞飯，仲會配上帶有淡淡藥材味嘅白胡椒肉骨茶，啱晒鍾意食星馬菜嘅朋友。半啫喱狀嘅雞皮食落爽口，充滿骨膠原，而雞肉口感鮮味滑嫩，一啲都唔嚡口！

【INFO】
蘇山雞飯
地址：長沙灣元州街411號義華大廈地舖
營業時間：星期一至日 11:00-22:00

香港海南雞飯 | 5. 水門泰式海南雞飯專門店

西灣河太安樓係眾所周知嘅美食集中地，當中嘅水門泰式海南雞飯專門店，主打各款抵食泰式餐點。招牌「唔正宗去骨海南雞飯」會配上比較特別嘅沙薑汁，酸辣開胃。雞肉份量十足，嫩滑無腥味，而雞飯咬落粒粒分明好有口感，配上薑蓉以及片片清爽青瓜，味道豐富多層次～

【INFO】
水門泰式海南雞飯專門店
地址：西灣河筲箕灣道57-58號太安樓地下A38號舖
營業時間：星期一至日 11:30-21:00

香港海南雞飯 | 6. 雞仔去骨海南雞專門店

位於長沙灣嘅雞仔去骨海南雞專門店，主打嘅招牌海南雞飯十分足料，雞肉皮光肉滑，充滿油香而不膩，配上開胃嘅三色醬汁以及爽口涼拌青瓜，飽肚又惹味～飯餐仲會附送無味精靚雞湯，加入南瓜、青紅蘿蔔等材料熬製，清甜又滋潤。

【INFO】
雞仔去骨海南雞專門店
地址：長沙灣元州街493號靄華大廈地下1號舖
營業時間：星期一至日 11:00-22:30

香港海南雞飯 | 7. 好時沙嗲

位於尖東嘅好時沙嗲開店已有30多年，主打香口沙嗲串燒，但當中嘅去骨海南雞飯亦十分馳名。雞件選用新鮮三黃雞，望落去充滿光澤感，食落啖啖肉，彈牙爽口。再配上爽脆椰菜絲、開胃三色醬、以及粒粒油飯，用料豐富，難怪多年來備受支持～

【INFO】
好時沙嗲
地址：尖沙咀麼地道63號好時中心1樓144-148號舖
營業時間：星期一至日 11:30-22:00