香港Glamping｜依家越嚟越多人鍾意露營！你都想跟上潮流，但又怕天氣熱、蚊蟲多？咁不如試吓 Glamping 豪華露營？既滿足到你想親親大自然嘅願望，又可以歎住冷氣瞓覺、有獨立洗手間，甚至有唔同主題！等編輯即刻為你介紹7個香港Glamping營地，咁你嘅週末/假期活動、週年紀念日就有著落啦！
圖片來源：長沙海邊民園官方網站、Facebook@星園 Galaxy Garden、Park Nature Hillside 官方網站、Instagram@wecamp.hk、 北歐精靈村官方網站、JK Club官方網站、Instagram@minglefarm｜撰文：Tiffany
香港Glamping｜1. 長沙海邊民園 My Seaside Park
長沙海邊民園 My Seaside Park 喺2022年全新開幕，位於有「港版夏威夷」之稱嘅大嶼山下長沙泳灘旁邊，勁有外國feel！呢到主要提供4-5人鑽石觀星營，入住套票仲包咗自動充氣地墊、睡袋、充氣枕頭、營燈、小型桌子、Cook Set、裝飾串燈、卡式爐頭、復古煤氣燈、睡袋等設備，仲有搭拆帳篷服務，你絕對可以兩手空空咁去Glamping！
My Seaside Park 仲有衝浪課程畀你選購，由具備多年衝浪經驗嘅專業教練教授，等你可以喺衝浪板上盡情感受大自然！
【INFO】 《長沙海邊民園 My Seaside Park》 地址：大嶼山長沙下村55號民園農場 價錢： 1. 4-5人觀星營具紮營趣：星期日至四 $1,600/位、星期五至六 $2,100/位、公眾假期 $2,500/位 2. 自攜營帳紮營趣（最少2人起）：星期日至四 $270/位、星期五至六 $350/位、公眾假期 $420/位 （*1歲或以下小童免費入住、1歲以上小童按成人收費） 交通方法： 1. 東涌巴士總站轉乘大嶼山11、23或A35號巴士，於「長沙麗濱別墅」站下車 2. 梅窩乘搭橫水渡後轉乘1、2、A35或4號巴士，於「長沙麗濱別墅」站下車 網站：https://bit.ly/4bWeUzI
香港Glamping｜2. 星園 Galaxy Garden
星園 Galaxy Garden 位於大嶼山貝澳，而營地坐落於5萬呎嘅大草地中，喺到Glamping真係勁舒服！星園主打充氣泡泡營，仲特別設有透明「天花板」，除咗影相打卡夠晒靚之外，夜晚仲可以舒舒服服咁喺「室內」觀星！
營內有床位、冷氣、風筒，仲有獨立洗手間、USB充電位、Wi-Fi等等，一應俱全！仲想夜晚BBQ？無問題！營地設有燒烤爐，畀大家自己帶食物入去燒。或者可以預早向營地訂購燒烤套餐，夠晒方便，就算係Glamping新手都無嘢需要擔心！
【INFO】 《星園 Galaxy Garden》 地址：新界離島區大嶼山貝澳牛坳園48號 價錢：小型星空帳幕 $1,180 起、大型星空帳幕 $1,780 起、全透明星空帳篷 $1,350 起 交通方法：東涌巴士總站轉乘3M或A35號巴士，於「散石灣中蘆」站下車後步行即至 網站：https://bit.ly/451DXPu
香港Glamping｜3. Park Nature Hillside
位於世外桃源（蓮麻坑）嘅 Park Nature Hillside 喺2023年全新開幕，以太空為主題，仲係TVB劇集《香港婚後事》嘅取景地！營地佔地10萬呎，大把地方畀你玩！一共提供3款露營屋，包括豪華銀河艦艇、閃閃星球屋、寵物露營車，可以容納2至6人，無論係家庭樂、情侶拍拖，定係朋友聚會，都完全無問題！
最受歡迎嘅一定係豪華銀河艦艇，觀景大玻璃勁吸引！仲有獨立嘅豪華淋浴間，而且有齊雪櫃、電視、微波爐等等，絕對係酒店式設備。如果想帶埋主子嚟都無問題！寵物露營車可以容納2至4人、再加2隻寵物，掂晒！營地仲有提供BBQ爐具、煮食爐畀大家租用，照顧大家嘅餐飲需要。
【INFO】 《Park Nature Hillside》 地址：新界北區打鼓嶺香園圍口岸蓮麻坑路 價錢：$1,599起，詳情可 WhatsApp +852 9690 7171 查詢 交通方法：於「上水廣場」小巴站乘搭59K號小巴，於「蓮麻坑」站下車後步行即至 網站：https://bit.ly/4bFjrXp
香港Glamping｜4. WE CAMP
WE CAMP位於元朗逢吉鄉新村，提供多款Camping選擇，包括豪華印第安露營區、野外露營區，更特別設有專屬汽車露營嘅營區。大家可以向WE CAMP預約車輛，盡情體驗車中泊或車頂露營！每個營區都有各自嘅主題及景色，大家可以因應自己嘅喜好揀返想去嘅營地。
同樣地，營地嘅設備都相當齊全，有獨立廁所、冷氣等等，亦可以加錢購買睡袋、冰箱、甚至麻雀呢類型設備。魚塘周圍仲有一大片草地畀大家野餐、睇日落，甚至係唔少人選擇求婚嘅熱門地點嚟！
【INFO】 《WE CAMP》 地址：元朗逢吉鄉新村三軍外展中心場地內 價錢：由$1,400起，詳情可致電 +852 6896 9309 查詢 交通方法：於元朗鳳翔路公共小巴總站，轉乘603號專線小巴，於總站下車後，沿馬路步行約15-20分鐘即至 網站：https://bit.ly/4e4za3S
香港Glamping｜5. Nordisk Alfheim 北歐精靈村
想搵個與世隔絕嘅地方，靜靜地同摰愛Glamping？Nordisk Alfheim 北歐精靈村可能會係你嘅最佳選擇！位於紅花嶺景盛農場，位置相對上較偏遠，有種世外桃源嘅感覺。有一大片草地之餘，北歐精靈村更採用丹麥品牌 Nordisk 嘅白色科技棉帳為帳篷，夠晒高質！
除咗帳篷之外，其他露營裝備都好講究，以自然、舒適為主調，搜羅自日本、台灣、歐美多個地方，就係為咗令客人有種踏入精靈小村莊嘅感覺！而套票已經包括2人入場、一個私家車泊位，以及以下設備：天幕、露營桌、露營椅、炊具/燒烤爐、餐具、調味料、冰桶、營燈、氣氛燈、移動冷氣、桌上遊戲，一應俱全。
【INFO】 《Nordisk Alfheim 北歐精靈村》 地址：沙頭角公路石涌凹段39號Autocamper紅花嶺景盛農莊 價錢：優惠期內 $1,580 起，詳情可 WhatsApp +852 6930 4334 查詢 交通方法：於上水站公共小巴總站，乘搭55K號小巴，於「鹿頸路」站下車步行即至 網站：https://bit.ly/3R7wY1R
香港Glamping｜6. JK Club
如果係Glamping新手，可以考慮位於大嶼山貝澳嘅 JK Club。一個價錢就包晒帳幕、枕頭、地墊、睡袋等露營用品，仲連埋BBQ晚餐套餐及第二日嘅早餐，夠晒方便！場地仲有24小時嘅浴室、洗手間，同時亦係寵物友善營地，可以帶埋你嘅寵物一齊體驗戶外生活！
想親親大自然？呢到附近仲有個迷你動物園，畀大家餵吓羊、兔仔，甚至有兒童彈床區、復古老爺車打卡區，啱晒一家大細喺放假嘅時候過嚟Glamping！仲想睇埋日落的話，營地隔離就係堪稱「港版天空之鏡」嘅貝澳沙灘，你點可以錯過？
【INFO】 《JK Club》 地址：大嶼山貝澳老圍村20D 價錢：$799 起 交通方法：於東涌乘搭大嶼山巴士3M號，於「新圍村」站下車步行即至 網站：https://bit.ly/3wVRDix
香港Glamping｜7. 名樂漁莊
名樂漁莊位於元朗流浮山，佔地60萬平方呎！提供多款Glamping住宿，例如露營車、吹氣營帳、透明波子營，全部有晒冷氣暖氣，可供2至10人入住。最特別嘅一定係全透明嘅波子營，夜晚可以360度無阻礙咁觀星，浪漫到爆！如果擔心私隱度，亦可以選擇半透明嘅波子營，咁透明度就無咁高啦。
吹氣營帳就最適合小朋友住，內籠色彩繽紛，感覺就好似住咗喺遊樂場入面咁，小朋友一定超級開心！如果係情侶入住的話，就可以揀豪華露營車。入面有一張雙人床、獨立洗手間、廚房、冷暖氣、電視、私家燒烤區，可以話係麻雀雖小、五臟俱全！
【INFO】 《名樂漁莊》 地址：元朗流浮山上白泥稔灣路樂逍遙漁場旁 價錢：星期一至四 $1,300 起；星期五至日及公眾假期 $2,200 起 交通方法：於西鐵「天水圍」站乘搭705號輕鐵，於「銀座」站下車步行即至 網站 (Instagram)：https://bit.ly/3yGLW8E
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
