自拍館 | 近年嚟韓式自拍館相當流行，人生四格相絕對係大家去旅行嘅時候必影！就算唔飛韓國，香港亦都有唔少韓式自拍館選擇，適合大家出街嘅時候同朋友影相留念，一齊紀錄低重要嘅時刻！大家更可以帶埋寵物影相，隨時捕捉到毛孩可愛嘅一面！
圖片來源：Instagram@snapio.io、photoofu_official、photoism_hk_mongkok、flashhk_、fotojujuhk、snappystudio_hk | 撰文：Hedy
香港韓式自拍館 | 1. SNAPIO自拍館
相信就算冇影過相，大家都會認識SNAPIO自拍館，首間引入自拍亭四格相嘅香港品牌，喺香港共有28個唔同嘅自拍亭地點，就連澳門以及台灣都可以見到！每逢唔同節日，SNAPIO嘅本地設計團隊都會設計出特別相框，為大家增添節日氣氛！大家都可以喺度影到卡通人物相框例如Sanrio角色等，超可愛。就連演唱會應援相框都做到，適合各位fans們！SNAPIO為大家提供平拍、高炒、低炒、半身平拍4種自拍亭，咁就可以影多種風格嘅相，每張大概$60起！
【INFO】 《SNAPIO自拍館》 價錢：港幣$60起 地址：https://bit.ly/3WOVxUW
香港韓式自拍館 | 2. PHOTO OF U韓式自拍館
對於唔識擺Pose但又想同朋友一齊影靚相，小編就推薦大家可以去PHOTO OF U韓式自拍館。店入面有唔少頭箍同公仔畀大家免費選擇，有道具幫手咁就唔怕影相會尷尷尬尬咁～場內更有提供化妝鏡同埋直髮夾畀大家扮靚，咁就唔怕影出嚟個樣唔靚啦！大家都可以選擇唔同嘅相框，就連最新嘅韓式透明相紙都有。每款都係$60，加印一張就要畀多$40，所有嘅相都會免費贈送埋電子檔以及縮時影片！
【INFO】
《PHOTO OF U韓式自拍館》
價錢：港幣$60起
地址：葵芳葵涌廣場3146鋪 (24小時開放) / 旺角T.O.P商場414鋪 (14:00-21:00) / 屯門華都商場1樓31C鋪 (6:00-24:00)
香港韓式自拍館 | 3. Photoism
熱愛K-POP嘅大家絕對要去韓國朝聖Photoism人生四格，不過近日Photoism終於進軍香港啦，每款相框入面藝人都會預先擺好Pose等大家一齊影相，咁就可以同深愛嘅偶像擺Pose合照啦，一齊畀愛心以及摸頭等動作都有機會影到，一定令大家相當心動！
【INFO】
《Photoism》
價錢：港幣$100（明星相框）
地址：旺角新之城2樓262舖
香港韓式自拍館 | 4. FLASH自拍館
除咗同朋友去影相之外，相信有唔少愛寵之人都希望可以帶埋寵物，紀錄低佢哋嘅成長時間，咁就絕對要嚟FLASH自拍館，用埋低炒機影相咁就可以影到超可愛嘅肉掌，仲有毛孩專用相框！店入面除咗有提供道具畀大家之餘，亦有寵物頭套以及飾物等，咁就可以即場幫毛孩扮靚！如果大家帶寵物影相就比較推薦大家去銅鑼灣分店，同時旺角以及尖沙咀都有分店！
【INFO】
《FLASH自拍館》
價錢：港幣$60起
地址：旺角兆萬中心214號鋪、銅鑼灣希雲街3號地下、尖沙咀K11購物藝術館222B號舖（12:00至23:00）
香港韓式自拍館 | 5. Fotojuju復古自拍館
Fotojuju旺角美式復古自拍館分別有2間分店，新之城主打美式復古風設有紅色高炒機，好景商業中心就主打甜美少女風，啱晒唔同風格嘅朋友！2間鋪頭嘅每一個角落都相當適合大家打卡，大家亦都可以善用店舖入面嘅道具影相，當中有眼鏡、頭箍以及頭套等。
【INFO】
《Fotojuju復古自拍館》
價錢：港幣$60起
地址：旺角新之城2樓260鋪（10:00至24:00）/ 旺角好景商業中心地下2號（10:00至04:00）
香港韓式自拍館 | 6. SNAPPY韓式自拍館
位於旺角嘅SNAPPY韓式自拍館，喺同區設有4間分店，除咗有多款道具以及公仔提供之外，亦有哈利波特衫可以免費借嚟影相。店舖設有復古高炒機，等大家選擇唔同角度嘅拍攝，再加上透明相紙，喺陽光下睇相當特別又夠靚！所有相都會免費贈送電子檔，咁就唔怕會唔見啦！
【INFO】
《SNAPPY韓式自拍館》
價錢：港幣$60起
地址：旺角中心2樓S50、S54&S57 (11:15至23:15) / 新之城1樓130 (10:00至00:00)
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
