日本環球影城 | 去日本除咗要去迪士尼樂園之外，喺今年更加要去日本環球影城(USJ），超級任天堂世界自2021年開幕以嚟，都深受大家嘅歡迎！而今年將會擴建第二期園區，打造全球首個Donkey Kong（咚奇剛國度)，即刻睇下新一年環球影城有咩新設施玩！
圖片來源：X@USJ_Official | 撰文：Hedy
1. 咚奇剛國度
超級任天堂世界進行擴建，並會加入全球首個新園區「咚奇剛國度」，預計將會於今年春季完成擴建，其佔地面積將會為依家嘅1.7倍，到時大家就可以喺Mario世界同咚奇剛見面！
新園區將會以居住喺熱帶叢林入面嘅嘅咚奇剛為主題，當中率先透露最新嘅設施為「咚奇剛的瘋狂礦車」，體驗乘坐式遊樂設施，喺遊戲過程中，乘客將會喺砲彈木桶出發，並將會於叢林中奔馳，途中更會跳過不同破碎嘅軌道上，要盡力咁將黃金香蕉保護！設施擺脫以往過山車嘅束縛，將會令你體驗豐富嘅視覺效果以及刺激體驗，亦加入「智慧型手機連動式體驗」，可以跟隨咚奇剛一樣調動全身嘅跳躍！
除咗有驚險刺激嘅過山車之外，更有一系列咚奇剛嘅周邊發售，當中包括超可愛嘅頭箍同吊飾等，以猩猩為圖案嘅餅乾，玩得開心之餘又可以帶畀人做手信！
2. 《名偵探柯南》常規遊樂設施
漫畫《名偵探柯南》喺今年將會迎來發行30週年，而喺今個春季，《名偵探柯南》將會成為常規遊樂設施，更會加入密室逃脫以及餐廳等期間限定活動！
-
名偵探柯南4-D現場表演秀～星空的寶石～
呢款常規遊樂設施將會喺3月22日正式開放，大家可以透過寬40米巨幕放映3D影像，結合音響、燈光、水花以及煙霧嘅配合，跟隨柯南同安室透穿梭喺怪盗基德設下嘅完美陷阱中搵出解謎線索，帶大家喺360度五感全開嘅沈浸式場域中體驗。相信大家一定會睇到心跳加速同超興奮！
-
名偵探柯南 The Escape
喺某個熱門嘅猜謎節目錄影現場中被發現安裝了炸彈，而大家將有機會體驗《名偵探柯南》的世界，更要運用自己頭腦同雙腳，一齊同真實登場嘅人物柯南合作解謎，要及早將炸彈拆除，當中怪盜基德更加有機會現身！身為《名偵探柯南》嘅粉絲更加必定要去，因為園區入面將會原汁原味呈現動畫作品嘅世界，更有超華麗動作場景展現！
-
名偵探柯南×好萊塢美夢‧乘車遊
「好萊塢美夢乘車遊」喺大阪環球影城嘅人氣設施之一，共有9節車廂。而是次則透過與名偵探柯南結合，以角色講故事嘅方式再配搭上刺激嘅過山車，令大家有全新嘅體驗。同時你亦會發現怪盜基德出現喺鈴木財閥搬運寶石嘅私人噴射飛機上，更因為咁噴射飛機更遭遇引擎故障，畀你體驗倒立及快速落下嘅感覺，究竟你可唔可以喺呢場極限嘅空中之旅平安逃生？
-
名偵探柯南Mystery Restaurant
除咗推出全新嘅玩樂設施之外，更有合作推出主題餐廳，直接將美食、音樂以及推理三方面嘅體驗，當中更有平次與和葉、紅葉所展開嘅三角關係！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
