日本花火大會 | 相信近排好多人都兌換定日圓，打算放假時去日本旅遊。而踏入春夏季節，日本各個城市都會陸續舉行傳統盛事「花火大會」。今次小編就為大家介紹8大日本花火大會，唔單止免費入場，附近仲有多個景點，即睇以下推介同絕佳景觀攻略啦！
圖片來源：東京旅遊官方網站、日本國家旅遊局、柏崎市海上花火大會官網、岐阜觀光官網、Facebook @諏訪湖の花火、琵琶湖大津觀光協會、熱海市觀光協會、 | 撰文：Icy
日本夏日花火大會 | 1. 東京足立煙火大會
東京足立區每年7月都會喺荒川河岸地舉辦「東京足立煙火大會」，於一小時內發放達15,000發煙花。荒川河岸地寬廣遼闊，景觀開揚，任何角度都可以無阻礙地觀賞煙花，但建議大家坐喺堤防斜坡上，輕鬆抬頭就欣賞到燦爛嘅煙花喇！
【INFO】 東京足立煙火大會 地址：東京足立區荒川河岸 日期：2024年7月20日 時間：19:20-20:20 前往方法：由新宿站出發，可乘搭JR山手線往「西日暮里」站，轉乘東京Metro地鐵千代田線往「北千住」站
日本夏日花火大會 | 2. 隅田川花火大會
每年七月最後一個星期六，鄰近淺草嘅東京隅田川沿岸都會舉辦「隅田川花火大會」，係最接近市中心嘅花火大會之一，吸引達數十萬觀眾觀賞煙花。同場仲會有多個遊戲及美食攤檔，為遊人提供豐富嘅娛樂性節目活動。
【INFO】 隅田川花火大會 地址：日本東京都東京隅田川 日期：2024年7月27日 時間：19:00-20:30 前往方法：第一會場 - 乘搭都營地下鐵於「淺草站」落車，再步行15分鐘；第二會場 - 乘搭都營地下鐵於「藏前站」落車，再步行5分鐘
日本夏日花火大會 | 3. 祇園柏崎祭海上煙火大會
每年7月26日，柏崎市西港町中央海岸都會舉辦「祇園柏崎祭海上煙火大會」，發放約15,000發煙花，寬度達600米，十分壯觀。由於煙花會面向海發放，就算喺免費觀賞席，大家都可以享有廣闊視野，或者可以購買付費觀賞席，輕鬆坐喺階梯式座位上欣賞無死角嘅煙花。
【INFO】 祇園柏崎祭海上煙火大會 地址：新潟縣柏崎市西港町中央海岸 日期：2024年7月26日 時間：19:30-21:10 前往方法：乘坐JR信越本線，於「柏崎站」下車，然後步行20分鐘
日本夏日花火大會 | 4. 岐阜長良川花火大會
2024年8月10日，岐阜長良川河畔將會舉辦「岐阜長良川花火大會」，以金華山為背景，綻放絢麗嘅煙花。由於岐阜並無太多高樓大廈，所以觀眾可以無阻擋咁欣賞煙花。另外附近仲有一間長良川鵜飼博物館，提供洗手間，欣賞煙花前可以順便去遊覽一下博物館。
【INFO】 岐阜長良川花火大會 地址：長良川河畔長良橋下流至金華橋上流 日期：2024年8月10日 時間：19:30-20:45 前往方法：於JR「岐阜站」或「名鐵岐阜站」乘搭公車至長良橋站落車
日本夏日花火大會 | 5. 諏訪湖祭湖上花火大會
長野縣諏訪市將會於2024年8月15日舉辦「諏訪湖祭湖上煙花大會」，燃放達40,000個煙花，加上四周群山環繞，形成煙花於山間迴響嘅壯麗畫面！由於湖邊有一大片草坪，大家可以免費於草坪上觀賞煙花，或者於立石公園俯瞰諏訪湖，獲得較佳嘅景觀。
【INFO】 諏訪湖祭湖上花火大會 地址：長野縣諏訪市湖岸 日期：2024年8月15日 時間：19:00-21:00 前往方法：乘搭JR中央本線至「上諏訪站」落車，步行約8分鐘
日本夏日花火大會 | 6. 琵琶湖大花火大會
「琵琶湖大花火大會」同樣會喺廣闊嘅湖面上綻放達10,000發煙花，視野開揚無遮擋，煙花更會倒映喺湖水上，景色美不勝收。大家可以選擇喺湖畔旁邊觀賞煙花，或者購買付費觀賞席。如果想免費觀賞煙花，就記得要預留至少6個鐘去霸位喇！
【INFO】 琵琶湖大花火大會 地址：大津市濱大津港一帶 日期：2024年8月8日 時間：19:30-20:30 前往方法：乘搭JR琵琶湖線至「大津站」落車，步行約15分鐘
日本夏日花火大會 | 7. 關門海峽花火大會
「關門海峽花火大會」係日本第二大嘅海上煙花表演，發放達15,000發煙花，每年都會吸引約100萬名觀眾。煙花會喺海峽兩側、達300米高嘅海峽浮橋上點燃並發射，非常震撼！另外大家可於門司港懷舊地區側， 或者山口縣下關側欣賞煙花～
【INFO】 關門海峽花火大會 地址：福岡縣北九州市門司區西海岸埋立地 日期：2024年8月13日 時間：19:40-20:40 前往方法：乘搭JR鹿兒島本線至「門司港站」，步行約5分鐘
日本夏日花火大會 | 8. 熱海花火大會
「熱海花火大會」喺日本靜岡縣熱海市每年都會舉辦嘅盛事，當晚會喺海上發放大約3,000發煙花，閃耀嘅煙花倒映喺海上，非常壯觀。除咗喺沙灘上睇煙花，建議大家仲可以從熱海港口或熱海城遺址等位置觀賞煙花。而花火大會附近會有購物街道，多個小食攤檔會販售日本特色美食，記得睇煙花之前去醫飽個肚喇！
【INFO】 熱海花火大會 地址：靜岡縣熱海市 日期：2024年7月26日、8月5、8、18、23日 時間：20:20-20:45 前往方法：由東京站或新宿站乘搭東海道本線或東海道新幹線，於「熱海站」落車，步行約15分鐘至熱海海灘
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
