轉眼又到中秋，夜晚想出門散下步、影下靚相？灣仔藍屋已經準備好最震撼嘅花燈燈海！今年適逢藍屋活化邁向十週年，規模更加盛大，成條街都被暖黃燈光包圍，氛圍感十足！
圖片來源：SAUCE編輯部｜撰文：Sharon
今次集結咗超過700盞獨一無二嘅手繪花燈，全靠50位本地插畫家、灣仔街坊、社區大眾甚至寵物主人親手繪製，璀璨燈海一路由藍屋建築群延伸至石水渠街、吉安街、慶雲街、景星街同皇后大道東，將老香港唐樓嘅藍色牆身襯託得格外溫馨。其實藍屋掛花燈呢個傳統背後仲有一段暖心故事，起源要追溯到5年前疫情期間，當時有街坊希望借鑑大澳花燈節嘅意念，透過唐樓串起嘅點點暖光凝聚人心，背後全憑無數義工同街坊由正午到傍晚辛苦懸掛，大家先可以見到咁靚嘅花燈。
除咗漫步賞燈之外，現場仲有相當豐富嘅周邊活動同驚喜體驗！同場設有「藍屋歇後語里 Memes Lane」展覽，將傳統文化結合廣東話趣味，打卡一流！花燈展期由即日起至2026年10月14日，每晚6點至9點半準時亮燈。地點位於灣仔石水渠街72A號藍屋建築群、欄杆、空地及周邊小店巷弄。
小編建議大家可以安排傍晚6點前到達，先欣賞舊唐樓嘅建築線條與街區風貌，再等6點一到亮燈，欣賞絕美嘅花燈燈海！今個中秋不妨約埋朋友或另一半，一齊去灣仔感受呢份專屬香港舊區嘅溫暖人情味啦！
【INFO】 《灣仔藍屋中秋花燈》 地點：灣仔石水渠街72A號藍屋建築群 日期：即日起至2026年10月14日 時間：1800 - 21:30
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
