中秋好去處｜每年嘅中秋節絕對係同屋企人團聚嘅好機會，一起食住月餅賞月，享受溫馨時光～仲未諗到今個中秋節去邊玩？小編已經幫大家整合咗香港各個中秋好去處，即入內文睇詳情喇！
圖片來源：官方圖片 | 撰文：Hedy
1. 國際中秋綵燈匯 —— 維多利亞公園
今年中秋節，香港旅遊發展局將首度喺維多利亞公園舉辦「國際中秋綵燈匯」，除咗引入嚟自南京秦淮嘅大型燈組，更首次加入嚟自世界各地嘅節慶綵燈，打造香港獨有「世界綵燈大街」。大家可以睇到大型主題綵燈樹影流光，由南京秦淮綵燈創作團隊設計及製作嘅約8米高大榕樹燈組，融合非物質文化遺產嘅細膩手藝、亮麗色彩與現代燈光效果，將歷史悠久嘅傳統工藝帶到香港。巨型榕樹綵燈以團圓為主題，可供360度欣賞！另外，更有世界綵燈大街，雲集20個國家嘅節慶綵燈首度登場。更有中秋主題綵燈，呈現靈動躍升嘅錦鯉同荷花簇擁嘅團圓滿月等。絕對係今個中秋必去！
【INFO】 《國際中秋綵燈匯》 日期：2026年9月17日至27日 亮燈時間： 18:30至晚上23:00 *中秋節正日（9月25日）延長亮燈至午夜12:00 地址：香港島銅鑼灣興發街1號維多利亞公園
2. 大坑舞火龍
想感受大坑舞火龍呢個香港著名嘅國家級非物質文化遺產魅力，就一定要嚟！呢項傳統可追溯至19世紀，當時居民以插滿線香嘅火龍驅趕疫症。時至今日，由300多位健兒引領一條點滿12,000枝長壽線香，全長67米嘅火龍，以及由小朋友舞動嘅LED小火龍，會穿梭大坑嘅大街小巷，祈求合境平安。而今年嘅大坑舞火龍盛會將會係9月24日至26日於香港銅鑼灣大坑浣紗街及鄰近街區舉行。
【INFO】 《大坑舞火龍》 日期：2026年9月24日至26日 時間：每晚約20:15至22:30 地址：香港島銅鑼灣大坑浣紗街至銅鑼灣道（正日延伸至維多利亞公園）
3.「彩燈·迎月」 —— 灣仔利東街
由即日至10月19日，利東街盛大呈獻 「彩燈·迎月」，喺200米嘅林蔭大道上，懸掛起超過800盞糅合傳統與創新嘅璀璨燈籠。今年，利東街更首度以細膩嘅剪紙風格圖案演繹千年中秋民間傳說與地道節慶習俗，呈現於特色宮廷燈籠之上。細緻到連嫦娥奔月、玉兔搗藥，甚至現代一家人食湯圓嘅溫馨畫面都有，絕對係滿滿嘅節日氣氛！另外，喺中秋正日（9月25日）闊別一年震撼回歸嘅「LED火龍舞鼓賀中秋」絕對係必睇！長達18米嘅LED火龍以炫彩燈光取代傳統煙火，配合LED醒獅及鼓樂演出，重新演繹香港非物質文化遺產「舞火龍」。
【INFO】 《利東街中秋呈獻「彩燈‧迎月」》 日期：即日至2026年10月19日 時間：10:00至23:00（每日17:00亮燈） *中秋節正日（9月25日）亮燈時間將延長至晚上12時 地點：灣仔利東街 《LED火龍舞鼓賀中秋》 日期：2026年9月25日（星期五） 時間：20:30至21:15 地點：灣仔利東街
4. 藍屋中秋 —— 灣仔石水渠街
灣仔藍屋絕對係大家必定會去打卡嘅地方～今次集結咗超過700盞獨一無二嘅手繪花燈，全靠50位本地插畫家、灣仔街坊、社區大眾甚至寵物主人親手繪製，璀璨燈海一路由藍屋建築群延伸至石水渠街、吉安街、慶雲街、景星街同皇后大道東。呢度打卡超靚啊，不過大家去影相嘅時候都記得要放輕聲量，自己帶返走自己嘅垃圾～
【INFO】
《灣仔藍屋中秋花燈》
日期：即日起至2026年10月14日
亮燈時間：18:00至21:30
地點：灣仔石水渠街72、72A、74、74A號、景星街8號、慶雲街2-8號藍屋建築群及附近社區街舖
5. 丙午年中秋綵燈會 —— 維多利亞公園 / 香港文化中心露天廣場
丙午年(2026)中秋綵燈會以「賞心‧樂事‧悅遊園」為題，綵燈設計意念以展現香港嘅獨特風情為主軸，當中包括維肖維妙嘅大型美食同綻放嘅花朵展現香港地道美食文化和寓意香港繁榮昌盛。同場更特設《心語寄月 綵燈映照》大型綵燈裝置，展示由學生同殘疾人士創作嘅綵燈作品。同場更有中秋創意市集、舞火龍、傳統手工藝示範、自助猜燈謎等活動，等大家一齊感受中秋節嘅氣氛。
【INFO】
中秋綵燈會（2026年9月17日至27日）
中秋光影裝置（2026年9月17日至10月11日）
亮燈時間：18:30至23:00
*中秋節正日（9月25日）將延長亮燈時間至凌晨12點
地點：
中秋綵燈會（維多利亞公園）
中秋光影裝置（香港文化中心露天廣場）
6. 香港仔中秋火龍盛會
香港仔將舉辦火龍盛會，舞火龍隊伍將由香港仔一路巡遊至華富邨，隊伍中仲有夜光龍、LED龍、滾軸腳舞龍、英歌隊、雜耍隊、海南民族隊、燈籠隊等。大家可以近距離觀賞到，更隨火龍一起巡遊起舞，沿途與大家同賀佳節，最後午夜時分在瀑布灣公園以「龍歸滄海」儀式作結。
【INFO】 《香港仔中秋火龍盛會》 日期：2026年9月25日 時間：20:00至00:00 地點：香港島香港仔中心及華富邨 費用：免費入場
7. 薄扶林村中秋火龍盛會 —— 薄扶林村
每逢農曆八月十五號夜晚，薄扶林村居民都會舉辦中秋節舞火龍。插滿香枝嘅龍身煙霧繚繞，數十名居民帶領火龍遊動全村街頭巷尾，為村民祈求合境平安。
【INFO】 《薄扶林村中秋火龍盛會》 日期：2026年9月25日 時間：18:00至24:00
8. 饒宗頤文化館 —— 荔枝角
饒宗頤文化館第四屆美孚饒館花燈節，懸掛高達1,500個由市民親手繪製嘅花燈並打造出壯觀嘅浪漫燈籠海，更將會喺9月19日夜晚正式亮燈，啱晒大家過嚟行市集之餘仲可以打卡！
【INFO】 《第四屆美孚饒館花燈節》 日期：2026年9月19至20日及9月25至26日 時間：14:00至21:00 地址：美孚青山道800號美孚饒宗頤文化館
9.「Moonlight Dreamers」—— 大埔Lake House
大埔Lake House聯乘人氣原創角色家族「FF FAM」，由即日起至9月27日期間，推出中秋活動「Moonlight Dreamers」！現場有5米粉紅巨月、寵物賞月打卡位、Le Vow IP 造型月餅工作坊夢幻登場，當中唔少得全港唯一湖畔許願水燈體驗！四大夢幻主題區域：
1. Le Vow（月之殿堂） ：懸掛嘅型月亮標誌超震撼！進入餐廳內部，由2米高Snowberry毛絨雕塑帶嚟專屬視覺效果，可愛爆燈！仲有限定「中秋月餅工作坊」，可以親手製作角色造型月餅。
2. Billow（月影露台） ：露天位置設有5米高巨型粉紅月亮，配合浪漫燈籠陣，非常適合寵物打卡！
3. Oasis Garden（綠洲花園） ：穿過月亮花圈與發光蝴蝶，沿途設有「青蛙家族花朵穹頂」、Peachy「月亮船」及「雲朵鞦韆」，以白鷺湖為背景，帶出滿滿中秋氛圍感。
4. Waterfront（湖中木橋） ：沿著紅燈籠，於湖畔遠眺水上巨型浮動月亮，可以體驗許願水燈，將許願水燈放入湖中，感受最極致嘅湖畔中秋浪漫！
【INFO】 《Lake House x FF FAM「Moonlight Dreamers」》 日期：即日起至2026年9月27日（限定活動時段 17:30 - 22:00提供免費接駁車服務） 地點：大埔滘紅林路2號Lake House 門票資訊 入場門票：標準門票 HK$40｜餐飲顧客優惠價：免費（憑即日收據） 許願水燈：標準價 HK60｜餐飲顧客優惠價：HK50（立減 HK$10） 活動查詢：5544 4401 (WhatsApp) 注意：Le Vow餐廳將於9月25日（中秋節正日）晚市餐飲及全日工作坊均暫停開放。
10. JCCAC 懷舊中秋夜．藝術村綵燈展
JCCAC藝術村由9月19日至27日期間，將會舉辦「懷舊中秋夜．藝術村綵燈展」，現場展出超過100盞由學生與駐村藝術家匠心繪製嘅特色燈籠，每盞燈都畫上咗滿滿心意！同場更設有傳統燈謎與眾同樂，亦特別邀請金囍光影打造「懷舊酒吧」造景打卡區，感受濃厚復古情懷！
【INFO】 《藝術村綵燈展及燈謎互動》 日期：2026年9月19至27日 時間：10:00至22:00 （每晚6時起亮燈） 地點：賽馬會創意藝術中心中央庭園 合辦單位：香港青少年知行書院 《金囍光影「懷舊港式酒吧」 打卡區》 日期：2026年9月19日至27日 時間：14:00至15:30
11. CHIIKAWA中秋燈會 —— 啟德AIRSIDE
今個中秋，Chiikawa一眾角色將會換上節日新裝登場！「CHIIKAWA ARTIVERSE 中秋燈會限定活動」由即日起至10月4日登陸啟德 AIRSIDE，以別具香港情懷嘅「中秋燈會」為主題，將傳統節日嘅溫馨回憶注入CHIIKAWA可愛世界。限定活動將帶來全新「中秋燈會」系列主題紀念品，以及重新打造嘅2D《CHIIKAWA迴旋木馬》打卡位，以一系列充滿節日氣氛嘅限定體驗，同大家共度中秋。活動將會喺9月26日起至10月4日期間開放畀公眾，大家可以直接前往 AIRSIDE 2樓現場排隊入場，與 Chiikawa 及好友一同感受充滿香港情懷嘅中秋節日氣氛！
【INFO】 《「CHIIKAWA ARTIVERSE 中秋燈會限定活動」》 日期：即日起至2026年10月4日 時間： 12:00至21:00 (最後入場時間為 20:45)｜即日起至2026年10月3日 12:00至20:00 (最後入場時間為 19:45)｜2026年10月4日 地點：啟德 AIRSIDE 2樓中庭及 Shop L210 & L222
12. 大澳水鄉花燈節
每年最期待嘅「大澳水鄉花燈節」又返嚟喇！過百個由居民與地區組織親手繪製嘅手繪紙燈籠，掛滿喺街道上面超壯觀～現場更有巨型月亮裝置，啱晒大家嚟打卡～
【INFO】
《大澳水鄉花燈節》
日期：即日起至2026年10月4日
亮燈時間：18：00 至 22：00（視乎天氣情況而定）
地點：大澳街道及水道一帶
13. 「Mega Sky中秋光影盛宴」MegaBox
佔地約3萬平方呎嘅Mega Sky空中花園呈獻「Mega Sky中秋光影盛宴」，由即日起至9月27日，兩大中秋主題光影秀「月光下的海洋世界」以及「與毛孩溫馨共度佳節」將於每晚夢幻上演，結合優美樂章、璀璨夜色及270度遼闊天際景觀，為大家締造浪漫又難忘嘅中秋體驗。人氣哥基「Mochi麻糬」更化身10米高巨型打卡裝置，在Mega Sky與大家一齊賞月！
【INFO】 《「Mega Sky中秋光影盛宴」》 日期：即日起至2026年9月27日 時間：19:00至22:00 地點：MegaBox L18 Mega Sky空中花園 費用：免費入場
14. 「怪奇料理」鍾情局 | 嘉年華市集 —— Airside
中秋點少得行市集！啟德AIRSIDE由9月24日至10月4日，一連兩個週末呈獻「怪奇料理」鍾情局 | 嘉年華市集，由30多個本地特色美食檔主炮製過百款怪奇fusion期間限定美食。星級焦點包括Circle Bakery 全港獨家迷你章魚小丸子蛋糕、鹹魚瑤柱曲奇；Milk Pattisserie 全城罕見嘅話梅曲奇及土匪雞翼曲奇；Cake For You嘅腐乳千層及地獄麻婆香蕉船；流心撻專家 Casabakehk嘅粟米肉粒撻及雙重花生湯圓流心撻；爆紅屋邨人氣烘焙店「麵包空間」嘅玫瑰忌廉芝士牛角酥及芫荽芝士 Ciabatta；由藝人唐詩詠主理、主打日式麵包工藝香港品牌33cubread嘅日本紅豆麻糬鹹蛋黃骰仔牛角酥；perseverecake嘅海苔肉鬆麻糬 Bagel同剝皮辣椒芝士 Bagel；以及 kai’s Gourmet 嘅意式芝士鹹香火腿 Gelato 等，款款衝擊視覺與味蕾！另外，AIRSIDE地下露天廣場於9月22日至10月11日，更有直徑達5米嘅限定巨型發光月球裝置。
【INFO】 《「怪奇料理」鍾情局 | 嘉年華市集》 日期：2026年9月24日至10月4日 時間：12:00至20:00 地點：AIRSIDE 地下露天廣場 | AIRSIDE 3樓及4樓走廊（9月24-27日）
15.「Meowlit Dreamland」星光夢花園 —— apm
Apm首度同香港本地創作人氣貓咪IP「KingyoNeko」攜手呈獻大型節日主題裝置「Meowlit Dreamland星光夢花園」。商場中庭打造成一座充滿奇幻色彩嘅星光夢花園，由逾5米高巨型Kiyo坐鎮花園中央，五大夢幻美景，帶大家投入一場浪漫溫馨嘅秋日奇遇。而喺9月25日中秋節當晚嘅「apm潮玩中秋派對夜」更有一連串精彩活動，包括世界搖搖大賽2026雙手回旋花式組別冠軍得主陳俊熙，展開包括魔術、雜技、K-Pop舞蹈、兒童合唱團演出等。apm L2 Garden更化身「戶外星空電影院」，齊齊睇由呂爵安、金燕玲、鍾雪瑩主演嘅爆笑窩心電影《金多寶》。
【INFO】 《apm × Kingyo Neko Meowlit Dreamland星光夢花園 大型中秋主題裝飾 日期：即日起至2026年11月1日 時間：11:00至23:00 地點：apm大堂層中庭（港鐵觀塘站A出口）
16. 「豚」圓月夜花燈庭園 —— 黃金海岸商場
黃金海岸商場以本地原創插畫角色「豬粒」為主角，呈獻「豚」圓月夜中秋活動。由即日起至2026年10月4日期間，「豬粒」更化身1.8米高充氣花燈於長達120米掛滿彩燈嘅海濱長廊，更有掛滿過百個中式花燈嘅花燈長廊迎接大家。
【INFO】 《「豚」圓月夜中秋主題裝置》 日期：即日起至2026年10月4日 時間：10:00至22:00 地點：黃金海岸商場中庭
17. 「中秋．航天夢」航天主題節慶裝置 —— 油塘大本型
今年大本型以「中秋．航天夢」為概念，將傳統神話故事，連繫香港人對太空探索嘅想像。地下中庭已經換上全新航天主題節慶裝置，包括由熟悉嘅中國文化意象出發嘅傳統中式牌樓 ；由神話傳說轉化為現代航天嘅太空人以及月球；令人一秒進入探索宇宙模式嘅太空艙打卡位；宇宙浩瀚，穿梭古今兩個世界嘅星空及星球元素。
【INFO】 《「中秋．航天夢」航天主題節慶裝置 》 日期：即日起至 2026 年 10 月 4 日 地點：大本型地下中庭
18. 「普濟香江中秋綵燈晚會」—— 嗇色園黃大仙祠
今年適逢國慶77周年同嗇色園105周年紀慶，黃大仙祠準備咗超多精彩活動！祠內同黃大仙廣場設有多組大型主題花燈，包括106隻嗇色園生日羊仔同香港首位女太空人。大家仲可以參與中秋 DIY 工作坊、遊園猜燈謎、天文觀星賞月。另外每晚6:00pm 後入園（9/17開幕夜為 6:30pm 後），即送「發光小禮物」乙份，更會快閃派雪糕！而喺黃大仙師寶殿前將會有精彩嘅夜光龍巡遊，大家記得唔好錯過喇～
【INFO】 《「普濟香江中秋綵燈晚會」》 日期：2026年9月17日至10月4日 時間： 星期一至五：開放至21:00 星期六、日及公眾假期：開放至22:00 中秋節正日（9月25日）：特別延長至23:00(最後入場時間為關園前 1 小時) 地點：嗇色園黃大仙祠及黃大仙廣場 費用：免費入場
19.「嶼月高昇‧處處是景」—— 東涌
今年東涌海濱花燈節，由5米高嘅月兔帶上楊桃燈，帶大家由海濱長廊出發，穿梭光映互動裝置，沉浸式快閃體驗大嶼山名勝、傳統文化及珍貴生態。
【INFO】 《「嶼月高昇‧處處是景」》 日期：即日起至2026年10月5日 時間： 東湧東海濱長廊｜18:00至22:00 *9月25日至27日將延長亮燈時間至00:00 東湧東海濱長廊 2.0｜18:00至00:00 *9月25日至27日將亮燈時間延長至02:00 地點：離島東涌海濱路；東涌東海濱長廊及東涌東海濱長廊2.0
20. 彩兔迎月慶中秋 —— 屯門市廣場
屯門市廣場「彩兔迎月慶中秋」，4樓戶外空間tmtp commons特設6米高巨型月球、中秋彩燈、七彩星星及月兔等打卡裝置。每晚戶外空間更變身浪漫賞月地方～
【INFO】 《「彩兔迎月慶中秋」》 日期：即日起至2026年9月27日 亮燈時間：19:00至22:00 地址：4樓tmtp commons 戶外空間 (可經3樓 GREENHOUSE 扶手梯直達)