新手行山路線 ｜趁秋涼，又喺時候去行山放鬆一吓身心喇！今日小編會同大家介紹5條新手行山路線，只需1小時就可以輕鬆登頂賞盡大自然靚景，仲可以飽覽埋日落美景，沿途又可以搵到無盡嘅打卡位添！想輕鬆行山睇靚景兼打卡？以下呢5條新手行山路線，你絕對唔可以錯過！
圖片來源：IG@bluepongpong、_alyciac、ywy0108、amyku_ku、fatfatpeoplevivian、hikegps、kkkatkkk｜撰文：Claire
5條新手行山路線 ｜1 – 西高山
位於山頂廣場嘅西高山，全程長約1.2公里，乘坐巴士至山頂廣場，步行前往夏力道起點。
夏力道沿途以平路為主，唔需要太大體力負擔，就可以舒舒服服欣賞迷人風景！大約步行18分鐘後就會到夏力道和盧吉道環迴步行徑，怕攰嘅朋友仔仲可以坐喺附近涼亭稍作休息，補充體力繼續進發！休息後，按路牌指示繼續前往西高山觀景台，沿途雖然要經過500級樓梯，但梯級唔算陡峭亦唔太難行，回望山下仲可以遠眺香港島西部及南部嘅豪華靚景，絕對值得。步行約15至30分鐘就可以登頂，登頂後除咗可以俯瞰整個海天一色嘅維港全景，如果撞啱日落時間，仲可以睇埋日落黃昏美景添！
【INFO】 路線：山頂廣場 ➡ 夏力道 ➡ 西高山 難度：★★☆☆☆ 前往起點方法：乘坐交通工具至山頂廣場，步行前往夏力道起點
5條新手行山路線 ｜2 – 菠蘿壩自然教育徑
位於菠蘿壩自然教育徑，乘坐公共交通工具前往即可，非常易行，絕對適合新手！
沿著教育徑，你可以穿越綠樹成蔭嘅小徑，秋季更可觀賞紅色楓香，仲可以感受到新鲜自然嘅空氣、草香花香撲面而來，感覺即刻冇晒壓力！教育徑沿途仲有好多資訊牌，同埋特別嘅動植物，可以了解唔同嘅大自然知識，啱晒親子遊樂，同小朋友嚟個互動式學習大自然知識。沿路會經過白千層樹林，最後會到達絕美嘅湖泊，當水位高仰可以欣賞「水浸白千層」景觀，一棵棵高大挺拔白千層沿水塘邊豎立，一棵棵白千層沿水塘邊豎立，配埋日落景色，簡直係夢幻！
【INFO】 路線：荃灣兆和街/途經「可風中學」站巴士 ➡ 菠蘿壩自然教育徑 難度：★★☆☆☆ 前往起點方法：於荃灣兆和街乘坐82號小巴往「城門水塘菠蘿壩小巴總站」；或乘坐途經「可風中學」站巴士，下車步行約20分鐘便到達菠蘿壩小巴總站
5條新手行山路線 ｜3 – 嘉頓山
想近近地輕鬆行山，以下呢條路線就啱晒你！深水埗嘅嘉頓山位於嘉頓廠旁邊，乘坐巴士至嘉頓山到美荷樓，就可以輕鬆去到嘉頓山嘅入口喇！沿著嘉頓山山徑攀登，先穿越茂密嘅樹林，沿途可以欣賞到山景。當你登上嘉頓山頂，就可以一眼飽覽繁忙嘅城市景色，享受壯麗日落美景！落山之後仲可以去深水埗嘆杯咖啡，過一個悠閑假日！
【INFO】 路線：YHA美荷樓青年旅舍➡嘉頓山 難度：★☆☆☆☆ 前往起點方法：於深水埗港鐵站D1出口，步行10分鐘至YHA美荷樓青年旅舍
【延伸閱讀】香港芒草 | 6大新手輕鬆賞芒郊遊路線！地鐵站步行30分鐘、大片唯美芒草田（附交通方法）
5條新手行山路線 ｜4 – 河背水塘家樂徑
想欣賞芒草，位於元朗嘅河背水塘就啱晒你！元朗市中心乘搭71號小巴至河背村下車，步行大約30分鐘便可到達，全程大部份都係平路，啱晒一家大細去郊遊！
沿途除咗可以欣賞到香港面積最細嘅灌溉水塘，行到家樂徑嘅中段仲會見到一個小竹林，路徑兩旁長滿遮天蔽日嘅竹樹，形成一條竹林隧道，就好似置身於港版嘅嵐山竹林小。而且踏入秋季，沿途仲可以欣賞到金黃芒草，畀你靜靜欣賞大自然美景！最後去到堤壩就可以稍作休息，觀賞開揚景致之餘影相留念，紀錄美好時光。
【INFO】 路線：河背村➡河背水塘➡河背水塘家樂徑➡河背村 難度：★☆☆☆☆ 前往起點方法：乘坐交通工具至西貢市中心至元朗，並於元朗市中心乘搭71號小巴至河背村下車，步行大約30分鐘
5條新手行山路線 ｜5 – 牛湖墩
每逢秋天，除咗可以喺西頂北潭凹嘅牛湖墩露營，仲可以輕鬆行吓山，盡情享受大自然！
位於西頂北潭凹嘅牛湖墩，於西貢市中心乘搭94號九巴或7號小巴便可到達，全程大部份都係平路，仲要少人靚景多，絕對係一條舒適冷門行山及露營路線！如果你想於牛湖墩露營，大約從北潭凹走15分鐘平路，見到北潭凹營地的指示牌，上樓梯約5分鐘即可到達營地，啱晒初次體驗露營嘅朋友仔。而如果你想於牛湖墩行山，於營地後方有一條小路上山，大約行15分鐘就可以到達標高柱，除咗可以一眼望盡山頂景觀，仲可以坐喺高柱與藍天白雲打打卡添！
【INFO】 路線：北潭凹➡北潭凹營地 ➡牛湖墩 難度：★★☆☆☆ 前往起點方法：乘坐交通工具至西貢市中心，並於西貢市中心乘搭94號九巴或7號小巴，於北潭凹下車，步行約15分鐘
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
YouTube – @saucemediahk
