渣打香港馬拉松2026喺1月18日舉行，各位選手準備好未呢？到咗比賽前唔夠12小時，心情難免會緊張，呢個時候體力同心理質素係非常重要㗎！究竟馬拉松賽前3件必做嘅事係咩？賽前1小時應該食啲咩？即睇內文！
圖片來源：網絡圖片｜撰文：Sharon
1. 剪腳甲與修補「易磨損」部位
好多人會忽略腳甲嘅長度，如果腳甲太長，腳趾不斷撞擊鞋頭，極容易造成「黑趾甲」甚至脫落。建議大家要修剪腳甲至適中長度，並檢查雙腳是否有死皮需要清理。溫馨提示，可以喺平時練習會磨損嘅地方，搽一搽凡士林，有需要要準備好防水膠布！
2. 檢查好所需裝備
檢查清楚有冇帶齊號碼布、跑鞋、襪、能量 Gel、賽後更換嘅乾爽衣物同毛巾等物品。建議前一晚前就要將號碼布扣喺比賽嘅衣服上，避免朝會出現早手忙腳亂嘅情況。另外，記得要預留起跑前2至3小時起床，等身體有充足時間「開機」！
3. 高碳水晚餐與極速補水
馬拉松賽前一晚最好係食「熟食、高碳、易消化」嘅食物，碳水化合物如白飯或清湯麵都係其中一個選擇！唔建議大家食刺身、生蠔或未洗淨嘅沙律，避免出現腸胃炎風險；酒精雖然有助睡眠，但有機會導致身體脫水，所以比賽前一晚都要戒絕酒精！最後，建議大家晚餐要喺晚上7點前完成，令腸胃有足夠時間去消化，以免影響睡眠。
祝各位選手順利完成比賽！！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
