12蚊店產品 | 相信12蚊店絕對係大家必行嘅地方，無論係為屋企添置唔同嘅家庭用品或者廚房用具等，一個地方就買齊晒所有嘢，應有盡有！不過12蚊店有咁多產品，近期又有咩大熱好物推薦啦？即刻睇睇小編有咩推介啦！
圖片來源： jp.daisonet、amazonjapan、網上圖片、Facebook@Daiso Hong Kong、大創 DAISO JAPAN | 撰文：Hedy
12蚊店產品推薦 | 1. 吹髮神梳（折疊版）
小編超建議長頭髮嘅女士們絕對要入手呢款吹髮神梳，透過其特殊骨架設計通風，可以輕鬆加速頭髮變乾嘅時間，吹頭從此快一半！今次仲要係折疊版，就算帶出街或者去旅行用都相當方便。呢款梳仲附有有迷你便利清潔棒，方便大家清潔留喺上面嘅髮絲～
12蚊店產品推薦 | 2. Gel甲油
如果唔想每個月都用咁多錢出去Gel甲，簡簡單單搽指甲油都已經可以轉換你嘅造型，小編就推薦大家可以平平地去12蚊店買指甲油搽，性價比相當高，而且顏色都超多選擇！最近Tokyo Girls Collection同Daiso聯乘嘅2024春夏系列Gel甲油更已經登陸香港，不過由於Gel甲油數量有限，售完即止。大家見到心水嘅顏色就記得要買啦！
12蚊店產品推薦 | 3. 貓貓晾衫夾
貓奴必備！相信大家平時晾衫嘅時候都用緊普通嘅晾衫夾，當收衫嘅時候隨時都會見到印！如果本身已經係貓奴嘅你就一定要入手呢款貓貓衣架，晾衫後就會見到超得意嘅貓貓掌印留喺件衫到，超可愛呀，見到心情都開心晒！
12蚊店產品推薦 | 4. 涼感坐墊
每逢夏天嘅時候相信大家都好易出汗，如果想舒舒服服咁坐喺凳上面，就一定要試吓呢款涼感坐墊，用落去涼涼地好舒服，而且唔會容易令你隻腳嘅位置出汗～無論擺喺Office定屋企都啱！
12蚊店產品推薦 | 5. 吊飾收納盒
唔知大家平時又有冇買開唔同嘅可愛吊飾呢？除咗可以掛落袋之外，亦可以將所有嘅吊飾收納埋一齊，望落去相當治癒之餘，又唔怕第時要用搵唔到啦！小編相當推薦大家入手！
12蚊店產品推薦 | 6. 公仔影相神器
當買咗好得意嘅公仔，大家都一定會想幫公仔影相，呢個時候除咗可以叫朋友幫你攞住之外，都可以用公仔影相神器！呢個神器可以將你心愛嘅公仔撐起身，咁你就可以直接攞住影相，超方便！
12蚊店產品推薦 | 7. 雪糕匙羹
夏天熱辣辣一定要食雪糕解暑，再加上好多雪糕杯本身都冇附有匙羹，就算有都未必好用，所以小編就建議大家可以去12蚊店買返支雪糕匙羹！除咗更方便𢳂雪糕之外，仲可以輕易咁攞住佢，唔使食得咁辛苦！款式有北極熊同企鵝之外，亦有貓貓等動物選擇，大家記得要去12蚊店尋寶！
延伸閱讀：【香港DAISO必買7大好物、大熱化妝扭扭筆+旅行必備神器！】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
