12蚊店好物 | 唔知大家平時又有冇行開12蚊店尋找好物呢？隨時發掘到又平又好用嘅物品～小編就推薦7款DAISO必買好物，平平地買返屋企試都唔會心痛，即刻睇睇有咩平靚正之選！
圖片來源：網上圖片、Facebook@大創 DAISO JAPAN | 撰文：Hedy
12蚊店好物 | 1. 化妝扭扭筆
近期大熱好物絕對係呢款化妝扭扭筆，依家就連香港都買到啦！對於要化妝嘅女士嚟講絕對係恩物， 只要扭開個蓋之後，放入液態嘅化妝品例如粉底以及遮瑕液，甚或放護膚品都非常適合，填滿容器之後再扭實手柄就可以使用。入面仲附有筆頭等大家搽上皮膚，細細支超適合帶出街用，甚或去旅行都啱晒！
12蚊店好物 | 2. 旅行壓縮袋
對於去旅行一定要襯衫嘅人士，就絕對會帶好多套衫，甚至有機會逼爆篋。呢個時候就一定要買旅行壓縮袋，可以幫你將衣物厚度減少50%，只需要將拉鍊拉起就會自動壓縮，超方便，旅行一定要帶多幾個傍身。
12蚊店好物 | 3. 行李固定帶
去旅行大家絕對會瘋狂購物，如果用手攞隨時會手痛，但如果就咁擺行李箱上面，隨時會喺左右兩邊跌走。而DAISO亦有賣旅行必備嘅神器，呢條行李固定帶可伸縮之餘，又可以調整鬆緊度，咁就可以將袋輕易固定喺行李上面，咁就唔怕會跌落嚟啦！
12蚊店好物 | 4. 環保袋肩帶
唔係款款環保袋都咁好攞，有時帶太短可能會手抽得唔舒服，再加上同一時間攞太多嘢喺身，當搭交通工具嘅時候就會好唔方便，隨時都會阻到身邊嘅人。呢款環保袋肩帶就可以畀大家扣落去，即刻就變成一個可以上膊嘅袋，咁自然就可以真正解放雙手啦。
12蚊店好物 | 5. 快乾髮梳
相信大熱天時，女生們都會對吹頭髮感到痛苦，每晚都要用好長時間先吹乾到。日本網民就推薦大家一定要入手呢款快乾髮梳，透過特殊骨架設計通風，可以輕鬆加速頭髮變乾嘅時間，吹頭時間隨時減一半！底部更附有迷你便利清潔棒，方便大家清潔留喺上面嘅髮絲～
12蚊店好物 | 6. 貼紙移除劑
每次滿心歡喜將物品買返嚟之後，再見到後面癡咗價錢牌，撕走嘅時候竟然留低貼紙漬，影響觀感之餘，又會黐笠笠。呢個時候只要大家去12蚊店買「liquid label remover」，一抹再輕輕刮走，就可以輕鬆去除貼紙漬！
12蚊店好物 | 7. 叮菜盒
為咗健康唔少人都會自製飯盒，而呢款叮菜盒就相當推薦大家入手，唔洗每朝煮定蔬菜，只需要叮嘅時候加入水，等多陣就已經食得，絕對係懶人必備。唔單只可以攞嚟叮菜，亦有人會將點心放入去叮，咁就可以輕鬆做早餐！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
