停產童年零食 | 相信大家童年嘅時候絕對食過唔少零食，當大個想搵返嘅時候先發現已經停產，好多零食已經漸漸消失，再都買唔返啦～小編為大家整合咗9大零食，唔知大家又最懷念邊款零食呢？
圖片來源：網上圖片 | 撰文：Hedy
童年零食 | 1. 雀巢四方果啫喱
第一款歡呼聲最高嘅絕對係雀巢四方果啫喱，除咗有黑加侖子味、青檸味、荔枝，更有獨特嘅忌廉梳打味等。識食嘅一定要用埋飲管啜先最好味，最啱放學嘅時候邊行邊食～四方果早喺2014年停產，當時停產嘅原因係希望淘汰較多人造色素嘅產品，所以大家都唔會再食到啦，小編真係好懷念呀！
童年零食 | 2. 奇趣杯
相信大家細個嘅時候都會好期待食雪糕，奇趣杯上層係雪糕，下層就有唔同嘅卡通角色例如Keroro軍曹、Super Mario以及Hello Kitty等。想要將玩具成功攞出嚟，就一定要用較剪剪開，過程雖然辛苦，但見到玩具之後就會好開心！一次過滿足小朋友食雪糕同時又有玩具收嘅心願。
停產童年零食 | 3. Kinder出奇蛋（舊版）
Kinder出奇蛋一次過滿足你3個願望！除咗有朱古力食有玩具，入面仲有新奇好玩嘅嘢。當細個食朱古力嘅時候，就好似經歷拆禮物又期待又開心嘅過程，雖然每次都會食到成手朱古力，但絕對係小朋友最鍾意嘅零食之一！依家係市面上都可以見到佢嘅蹤影，但已經唔再係以前嘅包裝同味道，變成只有朱古力同沾醬，玩具分開包裝。
童年零食 | 4. Lam Lam脷雪條
Lam Lam脷雪條包裝古怪吸引，當咬開出面黑加侖子之後，入面就係軟心啫喱，口感好得意，睇落真係好似一條脷咁！
童年零食 | 5. 笨NANA雪條
笨NANA雪條外型就好似一條香蕉咁，仲可以同香蕉一樣剝皮食，認真搞怪！外皮為啫喱口感，入面就係牛奶味雪條，口感同普通嘅雪條唔同，當時絕對係深受小朋友歡迎！相信就算重新推出，已經唔係細細個食嘅價錢！
童年零食 | 6. 綠寶橙汁
綠寶橙汁絕對係80後及90後嘅回憶，大家都會記得橙色同綠色嘅包裝，當年廣告嘅賣點更係主打「不含汽，鮮橙汁」，仲有半島嘅廣告都令人印象深刻，不過去到2000年嘅時候，綠寶已經逐漸消失喺香港市場。依家喺市面上見到嘅已經喺由泰國所代理嘅綠寶橙汁。
童年零食 | 7. 茶字典
茶字典主打冰爽口感，飲落去冰涼之餘，亦都可以飲到唔同嘅茶味，小編就最鍾意飲青檸味，不過依家市面上就已經再都搵唔到讀書時期必飲嘅茶字典啦。
童年零食 | 8. Qoo果汁（芒果味）
細個大家都一定飲過Qoo果汁，就連食麥當勞開心樂園餐嘅時候，都可以揀嚟飲。Qoo係可口可樂旗下嘅品牌，當時推出係針對小朋友同青少年，主打添加鈣及維他命C嘅稀釋果汁，並以健康為賣點。不過當時卻被質疑其營養價值，糖分過高影響小朋友健康，其後就變得冇咁普及。雖然依家有出返低糖版配方，但就好似冇再生產芒果味～
童年零食 | 9. CHELSEA彩絲糖
明治喺今年3月嘅時間宣布CHELSEA彩絲糖停售，終結53年嘅歷史。外觀為黑色花花盒嘅糖，有奶油味、乳酸味及咖啡等味，唔少人都趁停售之前把握機會囤貨！如果大家想食嘅話，其實都有機會。北海道「道南食品」公司推出咗北海道限定版「Chelsea奶油糖」，將會喺新千歲機場賣，而9月3日起亦都會喺全北海道嘅伴手禮店正式上架！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
