以為郵票淨係拿嚟貼信？法國郵政 La Poste 近期又搞新意思，推出咗一款叫做「Splendour florale」嘅特色郵票，最特別嘅係呢款郵票居然自帶淡淡嘅水仙花香！
圖片來源：官方圖片｜撰文：Sharon
今次呢套郵票搵嚟藝術家Christelle Guénot操刀設計，全套一本共有12張。最有趣嘅地方係啲圖案並非各自獨立，只要你整本打開，就會發現花草枝葉會自然延伸相連，無縫拼湊成一幅極有藝術感嘅花海畫作！加上郵票滲出嘅清新水仙花香，等大家貼郵票或者拆信嗰陣，雙眼睇落賞心悅目之餘，鼻尖仲可以順便享受多重香氣體驗。
其實法國郵政出名意頭多，之前就曾經發行過帶有法式長棍麵包香、牛油牛角包味嘅郵票，今年仲同香水名牌Fragonard合作過橙花香味，今次簡直係直接將烘焙店搬咗去花園！呢套花香郵票已經喺9月7號正式開售，一套12張賣18.24歐元，適用於20克以內嘅法國本土郵件。咁有儀式感嘅設計，各位文青同郵票迷睇到係咪好想買返套收藏呢？
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
