深圳麥當勞博物館 | 相信麥當勞喺唔少人心中都有一個好重要嘅地位，細個每次食兒童樂園餐嘅時候都好期待有啲咩新奇嘅玩具！依家大家大個咗之後仲可以去深圳麥當勞博物館免費參觀，尋找返兒時嘅回憶！同場仲有超多巨型打卡位，即刻入內文睇詳情啦！
圖片來源：小紅書@深圳麦门掌门人、不二姑娘在深圳、Czy1013、小漠漠、拉薯薯、晴方在地球hiking、manzb、半斤羊 | 撰文：Hedy
中國首間麥當勞博物館「麥麥博物館」，為全球第4間麥當勞博物館，位於下梅林地鐵站，除咗有多個巨型打卡位之外，仲可以見到過往嘅聯乘系列，包括Sanrio、Snoopy以及Pokemon等等，每款都超可愛，大家細個嘅時候又有冇收藏呢？
深圳麥當勞博物館打卡位 | 1. 麥當勞叔叔長櫈
當大家一嚟到門口嘅時候，就會見到一整棟嘅麥麥博物館，有成5層樓高，成座博物館都會見到以超搶眼嘅黃色同紅色做配色，仲有麥樂雞吹氣裝飾懸掛外牆同樓梯，望落去超可愛！而喺樓梯前面仲有麥當勞叔叔長櫈等緊大家，大家仲可以坐低同佢影相。
深圳麥當勞博物館打卡位 | 2. 時光隧道
同完麥當勞叔叔打卡之後，大家就可以行上樓梯，，呢個時候就會見到一條時光隧道。隧道嘅兩邊都展示咗唔同年份嘅麥當勞標誌，就好似帶你穿越返去唔同嘅年代一樣，體驗唔同年代麥當勞嘅變化！
深圳麥當勞博物館打卡位 | 3. 麥麥玩具牆
大家細個嘅時候又會唔會為咗玩具而去食開心樂園餐呢？而喺博物館入面，大家仲可以睇到限量玩具牆，當中有唔少早期聯乘嘅產品，當中包括Sanrio、Snoopy、Pokemon以及多啦A夢等等，超多可愛又懷舊嘅玩具都可以喺度搵到！
深圳麥當勞博物館打卡位 | 4. 復刻生日派對屋
喺麥當勞舉辦生日派對絕對係唔少小朋友夢寐以求嘅事，而博物館入面就完美還原咗復刻生日屋，除咗有橙色沙發之外，仲有漢堡凳以及打卡公仔，開生日Party一定超級熱鬧～
深圳麥當勞博物館打卡位 | 5. 經典四格相
除咗有得打卡之外，大家臨走前記得要去影埋超可愛嘅麥當勞主題四格相，相框仲有漢堡神偷以及麥樂雞圖案，好值得留念！
深圳麥當勞博物館 | 預約方法
有興趣入場參觀嘅朋友，就只需要打開麥當勞App或微信小程序，進入「麥麥商城」，選擇¥28「麥麥博物館套餐」，再預約自己心水嘅日期同時間，咁就可以極速入麥麥博物館參觀。同時大家入場嘅時候仲可以獲得一份美食套餐，記得去影埋人生四格相，仲有100%中獎嘅抽獎活動玩！
【INFO】 《麥麥博物館》 日期：即日起至另行通知 營業時間：10:30至20:00 地址：深圳市福田區下梅林梅麗路9號【A PARK L2-09】
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
