日本戀愛神社 | 到日本旅遊，除咗影靚相同盡情吃喝玩樂之外，無論單身定拍緊拖嘅朋友仔，都不妨順便去戀愛神社求籤。今次小編為大家推介日本8大超靈驗戀愛神社，一齊祈求有好嘅桃花運啦！
圖片來源：東京大神宮官方網站、東京旅遊官方網站、今戸神社官方網站、赤坂冰川神社官方網站、神田神社官方網站、日枝神社官方網站、日本島根官方觀光導覽網站、Facebook @貴船神社 | 撰文：Icy
日本戀愛神社1. 東京大神宮
東京大神宮被譽為最強戀愛神社，唔好睇佢外表樸實，其實佢主要祭祀「造化三神」，即係掌管天地萬物、男女結緣嘅生成化天之御中主神、高御產巢日神、以及神產巢日神，地位超然，好多年輕女士都會特此參拜，祈求神明賜予良緣。
東京大神宮嘅戀愛籤同繪馬造型百變，例如有日本詩歌主題、人形娃娃、花卉等等，更為唔識日文嘅遊客準備英文籤。現場仲有由巫女掌管嘅傳統抽籤木攤，大家由籤筒搖出木籤後，巫女就會親手將相應嘅籖詩交俾大家喇！
【INFO】 東京大神宮 地址：東京都千代田區富士見2-4-1 開放時間：星期一至日 06:00-21:00 前往方法：由JR「飯田橋站」西口步行約5分鐘
日本戀愛神社2. 代代木八幡宮
位於澀谷嘅代代木八幡宮地理位置非常方便，主要祭祀鎮護國家、開運厄除嘅「八幡神」。相傳如果伴侶之間感情出現摩擦或者變淡，係代代木八幡宮參拜之後，感情就會馬上升溫，就算去旅行同伴侶有爭拗都唔怕！就算係單身嘅朋友，都可以祈求來年桃花朵朵開～
代代木八幡宮特別販賣呈月牙狀嘅紅水晶「縁結び守り」，據說紅水晶可以淨化人嘅心靈，激發內心深處嘅能量，大大提升戀愛運，吸引有魅力嘅對象！
【INFO】 代代木八幡宮 地址：東京都澀谷區代代木5-1-1 開放時間：星期一至日 09:00-17:00 前往方法：由東京地鐵千代田線「代々木公園駅」步行約5分鐘
日本戀愛神社3. 今戸神社
鍾意招財貓嘅貓奴，就一定要bookmark以招財貓為主題嘅今戸神社喇！今戸神社周圍都擺放滿滿嘅招財貓，象徵吉祥好運，相傳只要摸摸正殿前嘅一對招財貓，同招財貓合照之後，再將合照設定為手機桌布，就可以實現願望！
今戸神社嘅戀愛御守同繪馬上都有可愛嘅招財貓圖案，有多款造型、顏色同姿勢。如果單身朋友想出pool，可以就咁買普通招財貓嘅款式。當成功搵到另一半之後，記得返嚟還願，買返個和服版招財貓嘅繪馬，感謝招財貓大神賜你好姻緣～
【INFO】 今戸神社 地址：東京都台東區今戸 1-5-22 開放時間：星期一至日 09:00-17:00 前往方法：由東京metro銀座線「淺草站」步行約15分鐘
日本戀愛神社4. 赤坂冰川神社
赤坂冰川神社位於綠意盎然嘅地區，擁多年歷史，雖然曾經歷過關東大地震、東京大空襲等災難，但仍然屹立不倒，因此有平安祝福嘅寓意，深受市民信仰。
赤坂冰川神社嘅御祭神「奇稲田姫命」，能為大家祈求良緣，唔單止係伴侶之間，亦可以祈求喺人際關係、事業、家庭等方面有好運，據說相當靈驗！
【INFO】 赤坂冰川神社 地址：東京都港區赤坂6-10-12 開放時間：星期一至日 06:00-17:30 前往方法：由東京地鐵千代田線「赤坂車站」步行約8分鐘
日本戀愛神社5. 神田神社
神田神社擁有達1300年歷史，曾經係關原之戰時期保佑戰事旗開得勝嘅神社。當中嘅主要御祭神「大國主大神」為日本最大嘅石造神像，管理土地及婚姻關係，對祈求姻緣十分靈驗，所以吸引無數當地人及遊客前往參拜。
由於神田神社鄰近動漫聖地秋葉原，所以神社內唔難搵到動漫元素，例如動漫人物主題繪馬、扭蛋求籤機、動漫主題活動等等，增添趣味性～
【INFO】 神田神社 地址：東京都千代田區外神田2-16-2101-0021 開放時間：星期一至日 10:00-16:00 前往方法：由JR中央線「御茶之水站」步行約5分鐘
日本戀愛神社6. 日枝神社
日枝神社為日本明治維新嘅皇室守護神社，西側入口嘅紅色鳥居隧道，顏色非常鮮艷奪目，感覺好似京都伏見稻荷神社千本鳥居，影相一流。
日本人將猴子視為御祭神「大山咋神」嘅使者，能夠帶來平安同驅除魔障，所以神社內放有神猿像，據說對於戀愛良緣十分靈驗！大家可購買以猿為設計主題嘅御守同繪馬，造型非常可愛趣致～
【INFO】 日枝神社 地址：東京都千代田區永田町2-10-5 開放時間：星期一至日 06:00-17:00 前往方法：由「溜池山王車站」步行約3分鐘
日本戀愛神社7. 出雲神社
出雲神社係日本最古老嘅神社之一，充滿神話傳奇色彩。神社主要拜祭管理土地及婚姻關係嘅「大國主大神」，又被國民稱為結緣之神，好多人都會特意前來參拜，希望能夠牽紅線結良緣。
出雲神社拜殿內有日本最大嘅注連繩，長達13米，由烘乾嘅稻草編織而成，傳聞呢種守護繩結可以避邪同開運，景象非常壯觀！如果想脫單，記得做齊出雲神社獨有嘅參拜步驟，雙手合十鞠躬2次，然後拍手4次，許願後再鞠躬1次，咁就會萬試萬靈～
【INFO】 出雲神社 地址：島根県出雲市大社町杵築東195 開放時間：星期一至日 06:00-19:00 前往方法：由JR「出雲市站」搭乘一畑公車，於「出雲大社站」步行約1分鐘
日本戀愛神社8. 貴船神社
位於京都嘅貴船神社係日本繪馬嘅發源地，相傳以前人們為求天氣好轉，係貴船神社供奉「祈雨之神」時，會以馬型狀嘅木板代替活馬作為獻品，所以大家可以係神社內見到寫上「繪馬發祥之社」嘅告示牌！
想增加戀愛運，就要體驗由水神掌管嘅「水占卜」，大家先抽選屬於自己嘅本命籤，再於神池向水神詢問問題，然後將紙籤放到水面上，籤詩就會慢慢浮現，掃一掃隔離嘅QR code就可以睇到詳細籤詩解說！
【INFO】 貴船神社 地址：京都府京都市左京区鞍馬貴船町180 開放時間：星期一至日 09:00-16:30 前往方法：乘搭京都巴士33號，於「貴船駅」落車步行約5分鐘
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
