日本自駕遊攻略 | 港人周不時都會去日本旅行，一家大細去旅行嘅話最方便就係自駕遊，無論想去日本唔同嘅縣市都冇問題～如果第一次自駕遊，小編已經幫大家整合咗11大注意事項，就算第一次租車都唔使驚！
圖片來源：網上圖片、toyata、政府新聞處 | 撰文：Hedy
日本自駕遊注意事項 | 1.申請國際駕駛執照
想去日本自駕遊之前，就算本身已經擁有香港正式駕駛執照，都一定要事先申請國際駕駛執照先可以喺日本當地租車～只要你持有香港身份證以及有效或逾期唔超過3年嘅香港正式駕駛執照持有人（以申請日期為準），就可以喺網上預約申請，申請費用為$80。如果唔想網上進行申請，你亦都可以透過郵寄方式遞交申請，運輸署會喺接獲申請後10個工作天入面，就會將新嘅國際駕駛許可證以掛號形式寄至你屋企～國際駕駛執照由簽發日期起1年內有效，可多次使用，到期之後可再次申請。
日本自駕遊注意事項 | 2. 選擇租車公司
去日本嘅時候，可以根據你租車日數以及取車及還車地點去選擇～當中比較熱門嘅日本租車公司包括Budget、Toyota、Times、Nippon以及ORIX等，如果人數較為少就可以選擇輕型車或者係小型車，一家人旅行嘅話就可以選擇休閒車以及家庭車等，較為方便。大家可以先比較唔同平台上租車嘅價錢，仲要留意埋會唔會有其他嘅附加費！以下係日本觀光旅遊局提供嘅24小時無里程上限嘅平均價格參考：
| 尺寸 | 日圓／天 |
| 超小型 (1,000-1,300cc) | 5,000 – 11,100 |
| 小型 (1,500-1,800cc) | 9,000 – 13,500 |
| 中型 (2,000cc) | 14,000 – 30,000 |
| 標準型 (3,000cc) | 29,500 – 31,000 |
日本自駕遊注意事項 | 3. 日本租車保險
租車公司嘅費用入面已經包括咗汽車損害賠償責任險，或汽車損害保險等基本保險。當不幸發生意外事故，當中造成汽車或人身傷害，保險公司都會支付賠償費用。而當中亦有自付額部分需要由大家自行繳付。租車嘅時候都可以加購CDW保險，咁就可以唔需要畀該自負額。
日本自駕遊注意事項 | 4. ETC卡租借
租車嘅時候店鋪都會問你需唔需要連ETC卡一齊租借，由於日本高速公路大多都會收取通行費，如果預先租借嘅話就可以直接通過唔同嘅收費站，就好似香港嘅易通行一樣，只要喺還車嘅時候用現金或信用卡等方式就可以一次過繳付費用。
日本自駕遊注意事項 | 5. 冬天必備加裝雪胎嘅車
如果選擇冬天去自駕遊嘅時候，一定要揀選配備雪胎嘅車，如果係去北海道以及東北地方等容易積雪嘅地區就更為必須，雪胎抓地力以及排水性較好，以防打滑嘅情況，等你喺雪地駕駛嘅時候更為安心。
日本自駕遊注意事項 | 6. 了解日本交通規則
趁仲未出發之前，大家都應該要留意日本當地嘅交通規則，大致其實都同香港差唔多，相信睇一次就已經好易上手。日本嘅車輛係靠左行駛，大家都一定要留意！即使係綠燈駕車右轉嘅時候，對向直行車優先行駛，先可以再右轉。而無論任何時候日本都係以遵守行人優先為原則，當左右轉時若果有行人喺斑馬線上過馬路，都一律需要停車畀行人優先～揸車嘅時候都要留意地區時速限制，記得唔好超速～
日本自駕遊注意事項 | 7. 取車檢查
攞車當日記得要喺指定時間攞車，並要帶齊所有租車文件及國際駕駛執照。當中一定要檢查車身本身有冇刮花嘅痕跡，最好就係影低紀錄。當職員講解車內設備嘅時候亦都要仔細留意，睇下車頭燈以及水潑等係咪正常可用。當全面咁確認車嘅狀況後，先好簽署「車輛損傷確認表」。同時亦都要向租車公司索取聯絡資訊，如果遇到緊急狀況嘅時候，可以通知車行。
日本自駕遊注意事項 | 8. 高速公路付款方法
日本嘅高速公路入口設有一般車道以及ETC專用車道，如果本身已經租借咗ETC卡，就可以將卡插人ETC機入面，咁就可以直接通過ETC專用車道。如果冇申請ETC卡都唔緊要，大家就可以選擇行一般車道，咁就可以用現金或者信用卡付款。
日本自駕遊注意事項 | 9. 停車場資訊
由於日本揸車嘅時候，唔可以隨便喺路邊泊車，咁就要去附近嘅停車場泊車。日本停車場大部份分為「通行型」以及「自助型」。「通行型」只需要喺停車前撳掣攞停車券，離場嘅時候才插入票卡，就可以支付停車費。「自助型」只要自己搜尋空位泊車，離開嘅啊時候喺收費機上面輸入自己嘅停車格號碼，再支付相關費用即可。
日本自駕遊注意事項 | 10. 還車前需入油
還車錢大家都要去還車營業所附近嘅加油站入滿油，通常租車公司都有提供相關嘅地址畀大家，同時亦都要睇清楚汽車加油嘅種類。日本加油站分為代客以及自助兩種類型，一種就有員工幫大家入油，一種就需要自己親手入油。臨走嘅時候記得要攞返相關收據！如果唔記得入油，租車公司就會再收附加費，記得要預留時間入油！
日本自駕遊注意事項 | 11. 還車程序
還車絕對要準時，如果唔係隨時都會畀多一日錢，一定要喺預約嘅時間去到還車嘅地方。只要將租車合約同車匙歸還，再等職員檢查車輛後，就可以攞齊個人物品離開。走之前都記得要繳付返高速公路費，如果有押金都可以一次過攞返～
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
