日本甜品推介2024 | 去日本旅行除咗要瘋狂影相打卡之外，都要食盡呢度嘅甜品！小編就為大家推介13大東京甜品，當中包括人氣冬甩以及每日限量發售Pancake，錯過咗就絕對會後悔！
圖片來源：官方圖片 | 撰文：Hedy
東京甜品 | 1. I’m donut? —— 東京人氣冬甩！
東京爆紅嘅「I’m donut? 」，鍾意冬甩嘅人士絕對唔可以錯過！無論係平日定係假日，開店之前就早已大排長龍，想試到最多口味就一定要早啲嚟排隊！I’m donut ? 係福岡人氣麵包店 Amam Dacotan嘅品牌，喺東京有4間分店包括澀谷、原宿、表參道同中目黑，每間分店都有獨特嘅冬甩口味。食落去麵團嘅口感相當柔軟，當中喺因為製作過程中，除咗加入牛油揉製之餘，亦都將帶皮嘅南瓜加入麵糰，再用高溫油炸而成。食落去鬆軟得嚟又帶有口感，配合埋如朱古力、開心果以及抹茶等口味，簡直係入口即溶！
【INFO】
《I’m donut?》 澀谷店
營業時間：早上11:00至晚上20:00
地址：東京都渋谷区渋谷2-9-1
《I’m donut?》 中目黑店
營業時間：早上09:00至晚上19:00
地址：東京都目黒区上目黒1-22-10
《I’m donut?》 表參道店
營業時間：早上11:00
地址：東京都港区北青山3-5-18
《I’m donut?》 原宿店
營業時間：早上10:00
地址：東京都渋谷区神宮前1-14-24
東京甜品 | 2. Beniduru紅鶴 —— 限量60份Pancake
位於淺草嘅「紅鶴」每日都只係會整限量60份Pancake，所以唔少人都會選擇喺8:30之前過嚟排隊，成功攞籌畀訂金後就可以根據指定時間翻嚟，咁就唔洗吹風啦～老闆更會喺你面前即叫即整，大概15分鐘就會整好兩份，都要啲時間～除咗有最基本嘅蜂蜜Pancake之外，亦有煙肉蛋鬆餅，親自喺你面前製作，由整麵糊到加入鬆餅、蛋、煙肉以及唔同嘅醬料等步驟，令味道層次相當豐富！
【INFO】
《Beniduru紅鶴》
營業時間：早上10:00至下午16:00
地址：東京都台東区西浅草2-1-11
東京甜品 | 3. Botta Coffee —— 一試難忘士多啤梨蛋糕
Botta Coffee以人氣嘅士多啤梨蛋糕最為出名，不過只有士多啤梨季嘅時候會供應，依家就有TIRAMISU期間限定供應。睇落好普通嘅士多啤梨海綿蛋糕，其實每一層嘅Cream都係當日新鮮製作完之後，再當場抹上去，咬落去每啖都食到士多啤梨，食落唔會太甜，味道啱啱好！再嘆埋被拉花咖啡就啱啱好～
【INFO】
《Botta Coffee》
營業時間：上午11:00至晚上19:00
地址：東京都渋谷区神宮前3-39-5 青山ウエスト 1F
東京甜品 | 4. Afternoon Tea LOVE & TABLE —— 限定櫻花士多啤梨千層蛋糕
日本人氣蛋糕店Afternoon Tea LOVE & TABLE都會根據季節，推出唔同嘅時令水果蛋糕～適逢士多啤梨季，更推出櫻花士多啤梨千層蛋糕以及朱古力士多啤梨榛子千層蛋糕，睇落就已經好吸引！每層千層蛋糕都夾滿士多啤梨同忌廉，超足料，就連打卡都一流！
【INFO】 《Afternoon Tea LOVE & TABLE》澀谷店 營業時間：上午10:00至晚上19:00 地址：東京都渋谷区神宮前4-3-2 《Afternoon Tea LOVE & TABLE》新宿店 營業時間：上午11:00至晚上21:00 地址：東京都新宿区西新宿1-1-5ルミネ新宿1 4階
東京甜品 | 5. THE STAND Ginza Corridor Cannele —— 人氣可露麗
行到可麗露專賣店THE STAND Ginza Corridor Cannele門前，入面有4個木箱，入面一排排整齊嘅迷你可麗露，再加上佢酥脆嘅外皮，絕對已經令大家心動！店員幫你用紙袋裝好之後，更會再加上紅色小木夾，超有質感！
【INFO】
《THE STAND Ginza Corridor Cannele》
營業時間：早上11:00至晚上23:30
地址：東京都千代田区有楽町2-9-1
東京甜品 | 6. あずきとこおり Azuki to Kouri—— 預約制刨冰
夏天食一碗刨冰，絕對可以助你消暑～あずきとこおり Azuki to Kouri 除咗係由米芝蓮認證嘅法式甜品師傅所經營之外，餐廳同時採用預約制度，去之前一定要預約好！當中最人氣嘅一定係chiboust系列，將刨冰面層嘅蛋白霜火炙，入面更有醬汁以及唔同口味嘅餡再加生果，食落去刨冰夠軟綿，口感亦都相當豐富！
【INFO】
《あずきとこおり Azuki to Kouri 》
營業時間：早上11:00至晚上19:00
地址：東京都渋谷区代々木1-46-2 グランデュオ代々木 1F
預約網址：https://bit.ly/3U5ecZE
東京甜品 | 7. Patisserie Parola—— 泡芙+可麗露
法式甜品店Patisserie Parola，當中最受歡迎嘅係可麗露，而最近泡芙都一樣被大讚超好味！泡芙除咗夠大之餘，上層嘅酥皮再加上滿滿嘅Cream，食落去口感好順滑，夠晒香濃！一間鋪頭可以食到泡芙同可麗露，超滿足！
【INFO】
《Patisserie Parola》
營業時間：早上11:00至晚上21:00
地址：東京都千代田区内幸町1-7-1 HIBIYA OKUROJI
東京甜品 | 8. ICHIBIKO Strawberry Cafe —— 各款士多啤梨甜品
鍾意食士多啤梨嘅人士，就絕對要嚟ICHIBIKO Strawberry Cafe，一間專埋士多啤梨甜品嘅鋪頭！有齊士多啤梨蛋糕、三文治、雪糕以及飲品等等，每一款都相當吸引！
【INFO】
《ICHIBIKO Strawberry Cafe》
營業時間：早上11:00至晚上21:00
地址：東京都世田谷区太子堂4‐18‐1 エコービル 1F
東京甜品 | 9. Daiwa Ebisuダカフェ—— 人氣水果三文治
Daiwa Ebisu為人氣水果三文治店舖，除咗三文治入面有滿滿嘅時令水果之外，又有超豐富嘅奶油，咬落去每啖都多汁香甜！同時亦有唔同口味嘅可麗餅選擇～
【INFO】
《Daiwa Ebisuダカフェ》
營業時間：早上06:30至晚上18:00
地址：東京都渋谷区恵比寿南3-11-25 プリンススマートイン恵比寿 1F
東京甜品 | 10. IPPUKU&matcha —— 宇治抹茶專賣店
如果大家有行過東京車站嘅時候，不妨試試呢間宇治抹茶專賣店，店舖堅持使用京都宇治嘅抹茶為原料！當中深受大家歡迎嘅係抹茶布甸，濃厚嘅抹茶醬淋滿成個布甸，再加上柔滑嘅口感，令人感到幸福！你亦都可以選擇加上抹茶雪糕係布甸上面，體驗多種抹茶嘅味道。
【INFO】
《IPPUKU&matcha》
營業時間：早上11:00至晚上20:00
地址：東京都中央区日本橋室町2-1-1 日本橋三井タワー 1F
東京甜品 | 11. TEA SALON & BOUTIQUE —— 富士山甜品
去日本自然就會聯想起富士山，就算睇唔到真實嘅富士山，大家都可以去小楽園 TEA SALON & BOUTIQUE，體驗六款山菓子！店舖入面裝滿住華麗嘅裝修，山菓子亦都係由日本知名山岳所改變而成，將超精緻嘅富士山甜品呈獻畀大家。
【INFO】 《TEA SALON & BOUTIQUE》 營業時間：中午12:00至下午19:00 地址：東京都渋谷区元代々木町10-9
東京甜品 | 12. ひみつ堂——爆紅刨冰
呢間位於東京嘅刨冰店相當出名，老闆更特意選擇嚟自日光嘅上等冰，然後再用手動刨冰機去製作而成。根據唔同嘅季節亦會轉換削冰方式，同時亦會用自家製無添加糖漿，再配上時令水果，令大家都可以食到超好味嘅刨冰！
【INFO】
《ひみつ堂》
營業時間：上午10:00至晚上18:00
地址：東京都台東区谷中3-11-18
東京甜品 | 13. GARIGUETTE —— 招牌夾心法式千層酥
喺香港雖然都可以食到自家創作嘅千層拿破崙 Mille-pressé，不過價錢就差好遠啦！如果想試試招牌夾心法式千層酥，就相當推薦大家喺日本試試，每季更會推出期間限定水果口味。
【INFO】
《GARIGUETTE》
營業時間：中午11:00至晚上19:00
地址：東京都港区北青山3-7-2 FPG links OMOTESANDO2 1F
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
