日本櫻花2024 | 嚟緊準備去旅行嘅大家，記得要留意定日本櫻花開花時間，Plan定賞櫻行程！根據日本氣象新聞公司（Weathernews）以及日本氣象株式會社最新公布，由1月開始到5月都有櫻花睇，即睇最新日本櫻花2024年各地賞花時間！
圖片來源：一般社団法人本部町観光協会、河津桜まつり、日本國家旅遊局、北海道官方旅遊網站 | 撰文：Hedy
日本櫻花2024 | 1月 沖繩緋寒櫻
根據日本氣象新聞公司（Weathernews）公布2024年日本櫻花開花預測，沖繩為最早開花嘅地方，宮古島已經喺1月7日開花，之後陸續開到那霸、名瀬、石垣島以及沖南大東島。緋寒櫻為沖繩最常見嘅櫻花，亦都被稱為琉球緋寒櫻，呈現出深粉色。隨住櫻花逐漸喺沖繩開放，沖繩本島北部更會舉辦各種櫻花祭，等大家賞櫻之餘又能一同體驗櫻花祭！
- 宮古島預計開花時間：7/1
- 那霸預計開花時間：17/1
- 名瀬預計開花時間：21/1
- 石垣島預計開花時間：25/1
- 沖南大東島預計開花時間：26/1
推薦沖繩賞櫻地點1 : 本部八重岳櫻花祭
無論係一家大細定係同情侶遊沖繩，都相當推薦大家參與本部八重岳櫻花祭，沿著小徑慢慢散步嘅同時，更可以欣賞到7000株櫻花樹同時綻放嘅美景，相當浪漫！
日期：2024年1月20日至2024年2月4日
地點：八重岳櫻之森公園
資訊：請點擊此處
推薦沖繩賞櫻地點2 :今歸仁城櫻花祭
想令旅程變得更加難忘？小編推薦大家到訪今歸仁城櫻花祭，喺日頭可以欣賞櫻花，夜晚更可以參與櫻花晚櫻彩燈，觀賞五光十色嘅燈光點綴櫻花！
日本櫻花2024 | 2月 靜岡縣河津櫻
東京地區一般櫻花嘅花期都會喺3月底左右，唔想喺呢個時間人逼人賞櫻，不妨率先到訪位於靜岡縣嘅河津町，沿路更有多達8000棵櫻花樹任你影，令你置身於浪漫嘅粉色花海中！而今年嘅「河津櫻花祭」將於2月1日至29日舉行，期間每晚嘅6點至8點更會點燈，邊打卡之餘更設有不同攤檔，讓你體驗日本祭典嘅樂趣同熱鬧！
推薦靜岡縣賞櫻地點1 : 河津櫻並木
河津町每年都會舉辦河津櫻祭典，而當中最為出名嘅賞櫻地點就位於河津櫻並木，道路長4公里，兩邊種滿河津櫻，當櫻花盛開嘅時候就會形成壯觀嘅櫻花隧道，相當吸引！
推薦靜岡縣賞櫻地點2：今井濱海岸車站
日本櫻花配搭大海，一種唯美又浪漫嘅影像，絕對可以喺今井濱海岸車站實現。今井濱海岸車站為到達河津前嘅一個車站，一片無際嘅大海再加上電線桿以及櫻花，絕對令你嘅影像更上一層樓！
日本櫻花2024| 3月 東京、大阪、京都、福岡等地
每年3至4月為欣賞日本櫻花嘅旺季，根據日本氣象株式會社最新的預測，3月將會有多達9個地區嘅櫻花陸續開花，當中包括東京、大阪、京都、福岡及等地。
推薦東京賞櫻地點1：目黑川
堪稱為東京最佳賞櫻地點嘅目黑川，只需要喺澀谷搭乘火車，到目黑站或中目黑站下車，便能抵達目黑川。兩邊有多達800棵櫻花樹，入夜後更會有燈火點綴，無論係日頭定夜晚都適合大家嚟日本觀賞櫻花。
推薦東京賞櫻地點2：都立代代木公園
一年四季中，代代木公園不僅能令你觀賞到紅葉，你亦可以從中欣賞櫻花，體驗四季變化不同嘅美。同時公園鄰近原宿車站和明治神宮，相當方便直達，令你直接被花海圍繞！
日本櫻花2024 | 4月至5月 仙台、青森、札幌
由1月開始到5月，只要大家去日本旅遊都可以一直賞櫻，喺5月頭嘅時候更可以觀賞到札幌開滿花嘅情況！而仙台、青森及札幌等地將會於4月至5月盛開櫻花，記得要把握時間喇！
推薦札幌賞櫻地點1：松前公園（松前町）
松前公園被選為「日本百大賞櫻勝地」，內有10,000多棵櫻花樹，種類更多達250種，不同花期嘅櫻花都將會在不同時間輪流開花綻放！
推薦札幌賞櫻地點2：北海道神宮
北海道當中最知名神社之一「北海道神宮」，種滿櫻花同梅花，畀你參拜之餘，更可以令你欣賞櫻花之美。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
