澳洲筍工 | 唔知大家做過最特別嘅工作係啲咩呢？如果想去世界各地體驗唔同嘅奇趣工作，就一定留意最近由澳洲塔斯馬尼亞旅遊局所釋出嘅10個夢幻工作機會，每朝只需要叫醒袋熊散步，超新奇有趣！
圖片來源：官方圖片 | 撰文：Hedy
雖然香港而家相當炎熱，不過位於南半球嘅澳洲就正值冬季，喺東南部嘅塔斯馬尼亞（Tasmania）氣溫大概喺3度至11度之間，旅客到訪嘅意欲亦大大減少，係當地旅遊嘅淡季。為咗增加遊客數量，塔斯馬尼亞旅遊局提供10個奇趣嘅工作體驗，相信大家喺日常生活中絕對體驗唔到，即刻睇睇有咩咁特別！
澳洲筍工推薦 | 1. 洞穴指揮員
平時如果有玩開音樂嘅大家就絕對唔可以錯過！當大家行入Gunns Plains Caves後，可以沉醉喺現場動聽嘅音樂入面。洞穴除咗有鴨嘴獸同埋大龍蝦等生物，洞入面仲有一條流動嘅溪流，當流水聲以及音樂家嘅演奏交織一齊，簡直就係帶畀你終生難忘嘅地下音樂體驗！而大家更可以成為演奏嘅一份子，喺洞穴入面體驗全新嘅音樂。
澳洲筍工推薦 | 2. 牡蠣採集者
鍾意食肥美牡蠣嘅人士有福啦～除咗可以畀大家盡情享用新鮮嘅牡蠣之外，由採摘到剝殼等過程都可以一試，辛苦完一輪之後仲可以享用，再配埋當地美味嘅葡萄酒，簡直就係一大享受！帶你免費體驗最新鮮嘅牡蠣！
澳洲筍工推薦 | 3. 超自然現象調查員
只要你夠大膽就可以做，呢份工作就係帶大家體驗塔斯馬尼亞鬧鬼之旅，將會喺眾多鬧鬼嘅地方舉辦鬼魂同超自然之旅！旅程入面大家將會了解到過往遊客令人不寒而慄嘅經歷，更會帶你探索景點入面嘅隱藏秘密。每一次遊覽都係經過精心策劃同細心安排，你又會唔會好奇？隨著黑夜嘅降臨，伴隨著冷風，輕易令你毛骨悚然！
澳洲筍工推薦 | 4. 蒸汽火車
平時如果對火車或歷史有興趣嘅，就可以體驗西海岸荒野鐵路，由Lynchford Express到Carswell Park，再去Queenstown station以及Lynchford Station等地方，大家都可以乘坐ABT蒸汽火車，感受沿途壯麗嘅景色同魅力。
澳洲筍工推薦 | 5. 崖邊桑拿
只需要浸泡喺冒熱氣嘅浴缸入面體驗桑拿，再喺蒸汽環繞嘅懸崖浴室入面欣賞令人驚嘆嘅冬季海景同日落美景，絕對係一個難忘嘅經歷！
澳洲筍工推薦 | 6. 浴鹽匠人
大家將會喺Little Things Farm入面開展農場之旅，除咗要學識同山羊相處之外，亦要製作出浴鹽！當中超出名嘅山羊奶肥皂同護膚產品都係由當地嘅山羊所提供嘅牛奶製成！
澳洲筍工推薦 | 7. 追星者
平時如果係夜貓子嘅大家，相信絕對可以捱眼瞓勝任呢份工作～只需要喺夜晚嘅時候體驗塔斯馬尼亞嘅夜空，幫助唔同嘅天文學大師進行天體觀測及調整望遠鏡，大家仲有機會同佢地一齊共進晚餐！
澳洲筍工推薦 | 8. 松露獵人
松露絕對係不可或缺嘅人間美食之一，大家只要穿著獵人鞋之後，就可以喺松露入面漫步。除咗可以發掘所有松露嘅元素之外，亦都要幫手訓練狗狗烹調松露大餐！
澳洲筍工推薦 | 9. 葡萄酒語者
葡萄酒就飲得多，但今次大家除咗可以參觀葡萄園之外，仲可以親手體驗修剪葡萄嘅過程，見證葡萄酒嘅生長過程。你更可以喺度免費飲葡萄酒，簡直就係令你大開眼界。
澳洲筍工推薦 | 10. 袋熊步行者
由於可愛嘅袋熊喺冬天往往都缺乏運動，所以為咗幫助袋熊維持身心健康，就需要一位袋熊散步員！除咗每朝都要叫醒佢哋之外，亦都要帶佢哋佢散步，避免袋熊喺散步期間追逐鳥類或者被其他動物分散注意力，確保佢哋唔會蕩失路！由於當地旅遊局禁止遊客主動接觸袋熊，就連袋熊步行者收工之後都唔可以同佢哋接觸，所以絕對係一份難忘嘅工！
僅限一類人申請
雖然以上嘅工作睇多都相當吸引，就算大家可以接受到冇人工，提供交通同食宿費，都未必申請到！因為呢啲奇趣嘅工作目前僅開放畀成年嘅澳洲居民申請，同時亦都要寫上50字理由點解想申請，唔知之後大家又會唔會有機會可以申請呢？小編絕對願意每朝叫醒可愛嘅袋熊一齊散步！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
