咒術迴戰東京 | 日本人氣漫畫《咒術迴戰》喺早前終於正式完結，結束6年半嘅連載，相信有大部分嘅粉絲都相當唔捨得！如果大家咁啱去日本旅行，就一定要到訪東京晴空塔睇《咒術迴戰》展覽，仲有超吸引嘅燈光騷以及一連串周邊及Cafe等，即睇10大亮點！
圖片來源：X@skytreeofficial | 撰文：Hedy
日本東京晴空塔與《咒術迴戰》合作，等大家都可以喺高空上面同心愛嘅角色打卡，當中更有10大打卡位、主題Cafe以及周邊等。當中小編覺得大家一定要預留時間睇主題燈光表現！
咒術迴戰展覽 | 1. 天望穿梭電梯
當大家乘搭天望穿梭電梯嘅時候，將會帶大家重溫《咒術迴戰》第一季以及第二季嘅場景，回顧唔同角色嘅咒術高專嘅劇情，為展覽揭開序幕！
咒術迴戰展覽 | 2. 角色立牌打卡位
無論係日頭定夜晚嚟打卡都可以影到絕美嘅景色，加埋為活動特製嘅角色立牌，包括虎杖悠仁、伏黑惠、釘崎野薔薇、五條悟以及夏油傑等，直接橫跨過去同現在嘅時間線！連埋東京日夜嘅街景，打卡一流！
咒術迴戰展覽 | 3. 天望迴廊
由445樓到450樓嘅天望回廊入面，大家可以觀賞到多位《咒術迴戰》嘅角色人物，再加上佢哋嘅經典台詞，令你重新投入場景入面！
咒術迴戰展覽 | 4. 天望回廊打卡位
當行到去天望回廊嘅打卡位，大家就會見到五條悟、虎杖悠仁、伏黑惠以及釘崎野薔薇4大角色，每個都換上私服，擺放喺逾400米高空隔離同大家影相！
咒術迴戰展覽 | 5. 巨大牆打卡
喺呢幅巨大牆壁入面，大家可以見到咒術迴戰入面嘅唔同角色，再配搭埋佢哋所使用嘅武術，型格得嚟又啱晒粉絲打卡！
咒術迴戰展覽 | 6. 晴空佳境
抵達450樓後，大家就可以見到動畫入面經典嘅「澀谷事變」重現喺眼前，用螢幕投放出每個經典場面！
咒術迴戰展覽 | 7. 迷你打卡位
相信有唔少粉絲都會將唔同嘅周邊以及公仔等帶過嚟打卡，而呢度亦有迷你打卡位，呈現出「帳」嘅氣氛。
咒術迴戰展覽 | 8. 限定合照
如果想一次過同《咒術迴戰》角色以及東京美麗嘅日夜景影相，就可以畀1,700日圓（大概港幣$92）獲得合照以及卡片，總共更有29個款式選擇！帶返屋企留念相當值得！
咒術迴戰展覽 | 9. 燈光表演
燈光表演絕對係最值得睇！官方為活動特別設計咗4種燈光，包括「帳」、「黑閃」、「咒力」以及「虛式 茈」，將會喺3分鐘輪流播放，相當震撼～
【INFO】 《燈光表演》 日期：2024年10月5日、10月12日、10月19日、10月26日、10月31日、11月2日、11月9日、11月16日、11月23日、11月30日、12月7日、12月14日以及12月21日 時間：18:15至24:00（10月5日、12日）；17:45至24:00（10月19日、26日、31日；17:30至24:00（11月、12月）
咒術迴戰展覽 | 10. 主題Cafe
現場除咗可以畀大家好好欣賞同打卡之外，位於晴空塔340樓嘅「SKYTREE CAFE」，將分別以「澀谷事變」及「懷玉‧玉折」為主題，推出唔同餐飲，仲有一系列周邊商品畀大家購買！
【INFO】 東京晴空塔 x 《咒術迴戰》展覽 日期 : 即日起至2024年12月22日 時間 : 9:00至21:00 收費：入場免費；部份展覽場館或需另行收費 官方網站：https://bit.ly/4eo54IH
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
