秋冬最怕天氣乾燥,搞到喉嚨乾涸甚至咳到停唔到!最近日本Threads有款便利店潤喉糖瘋傳,連當地網民都瘋狂掃貨,仲大讚「食兩粒即止咳」!

圖片來源:Threads@chomo_no_ouchi|撰文:Sharon

講緊嘅就係日本朝日集團食品喺今年10月5日全新改版推出嘅 「MINTIA +VOiCE 檸檬生薑味潤喉糖」(每盒30粒/20g)!呢款主打「日常護嗓」同「滋潤聲音」嘅新產品,一推出就獲得日本知名聲優事務所「I’m Enterprise」嘅專業認證,專為成日要開聲講嘢、或者想隨時隨地保養喉嚨嘅人士而設,難怪連專業配音員都力撐!

MINTIA +VOiCE 檸檬生薑味潤喉糖。(圖片來源:Threads@chomo_no_ouchi)

呢款潤喉糖之所以咁受歡迎,全因網民實測真係超有感!有日本網民分享原本只係抱住「求個安心」嘅心態買嚟看門口,點知搭電車嗰陣突然喉嚨痕到想大咳,即刻隨手含兩粒落口,喉嚨唔舒服嘅感覺竟然極速舒緩!

好多人都怕傳統潤喉糖陣藥味太重,或者薄荷涼到「乸喉」,但呢款就完全無呢個問題!佢用咗清新檸檬配微暖生薑,涼感得最溫和嘅「1級」,食落順喉唔嗆鼻,就算平時唔食得薄荷或者抗拒藥味嘅人都一定接受到;入面更藏住秘密武器,將潤喉糖碎粒直接壓入糖錠,再配合漢方護喉嘅桔梗精華同維他命C,邊含邊融出雙重滋潤感,難怪咁多網民一試愛上!下次去日本行便利店記得留意吓啦~

——————————————————
Follow 我哋睇更多最新情報!
Facebook – SAUCE – 為生活加一點味道
Instagram – @sauce.media.hk
YouTube – @saucemediahk