深圳地鐵13號線一期於2024年尾正式通車喇！沿線總共設有7個地鐵站，以後市民通關後轉乘至其他地區就會更方便～今次小編就為大家介紹深圳地鐵13線嘅沿線7大打卡及購物熱點，包括公園、大型商場、文創園區等等，睇下有咩深圳放假好去處啦！
圖片來源：小紅書 @软软der、@梨梨梨梨花、@土豆、@小王同学、@Panda去旅行、@深圳漫游记、@栗子陈Chess_M、@NN吃不饱、@saul archiman、@叮洛涵、@ShenzhenLOOK、@Sun_foto、@深圳生活研究所、@Eser、@边南LEVART | 撰文：Icy
深圳地鐵13號線一期全長約22.4公里，沿線共有16個車站，而2024年開通嘅南段共有7個車站，以深圳灣口岸為起點，途經人才公園站、後海站、科苑站、粵海門站、深大站及高新中站。營運時間為上午6時30分至晚上11時，方便市民來回香港及深圳。
深圳地鐵13線好去處 | 1. 深圳灣公園
位於深圳灣口岸站嘅深圳灣公園，空間非常廣闊，臨近海濱及紅樹林自然保護區，景觀優美，空氣亦十分清新，啱晒一家大細一齊吹住海風散散步。公園內有多個主題景點，包括濕地公園、白鷺坡書吧、流花山公園、彎月山谷、日出劇場、觀橋公園、大草坪等等，各有特色，有足夠空間讓小朋友放電，喺蔥鬱茂密嘅環境之下亦好適合打卡！
【INFO】 深圳灣公園 地址：深圳市南山區（深圳灣口岸站A出口） 開放時間：每日10:00-20:00
深圳地鐵13線好去處 | 2. 深圳人才公園
同樣位於深圳灣口岸站附近嘅深圳人才公園，佔地面積共77萬平方米，其中湖體面積達30萬平方米，為市民提供舒適廣闊嘅休憩空間。公園內設有多個創新藝術品、小型圖書館、學習空間及科普互動裝置，向市民推廣文化創意；另外亦配備各項先進嘅運動及遊樂設施，鼓勵市民鍛鍊身體。
【INFO】 深圳人才公園 地址：深圳市沙河西路與沙河立交交界處（深圳灣口岸站B出口） 開放時間：每日06:00-23:00
深圳地鐵13線好去處 | 3. 海岸城購物中心
一家大細出遊，最方便就係行大型商場。位於后海站嘅海岸城購物中心，佔地面積達30萬平方米。當中匯聚多間商店及餐廳，例如喜茶、探魚、奈雪生活、極上萬膳．自助放題、蟹一品．蟹黃面、粵菜館小炳勝、城市密碼夾公仔機店、室內遊戲館等等，吃喝玩樂一應俱全，難怪會成為香港人嘅放假熱門好去處！
【INFO】 海岸城購物中心 地址：深圳市南山區文心五路33號（後海站D出口） 開放時間：星期日至四10:00-22:00 / 星期五及六10:00-22:30
深圳地鐵13線好去處 | 4. 深圳灣萬象城
深圳灣萬象城係深圳市內最豪華嘅購物中心之一，商場面積非常大，達55萬平方米，集購物、旅館、辦公室及娛樂等一身。商場匯聚多元化嘅人氣店鋪，無論服飾、化妝品、運動用品等都應有盡有。餐廳種類繁多，包括燒肉、咖啡廳、日本菜、台灣菜、特色甜品店等等。場內亦設有多個休閒空間，就算行到攰都好容易就搵到休息嘅地方～
【INFO】 深圳灣萬象城 地址：深圳市南山區科苑南路2888號（後海站G出口） 開放時間：每日10:00-22:00
深圳地鐵13線好去處 | 5. 後海匯
後海匯為深圳首個青年文化商業區，面積約7.2萬平方米，為新世代提供放空及漫遊嘅場所。除咗匯聚多間潮流品牌店、寵物主題店及特色藝術商店，仲有完善嘅餐飲配套，例如燒肉店、咖啡廳、酒吧等等。商場內亦設有多個公共休憩空間，種植綠色植物，亦會定期與漫畫家合作，舉辦藝術展覽，各位文青必去啊！
【INFO】 後海匯 地址：深圳市南山區後海濱路恒裕深圳灣北側（後海站A出口） 開放時間：星期日至四10:00-22:00 / 星期五至六 10:00-22:30
深圳地鐵13線好去處 | 6. 萬科雲城設計公社
另一個文青好去處就係萬科雲城設計公社，將大自然環境、藝術創意及文化合而為一，為市民提供一站式嘅購物及遊玩空間。當中迷宮式城市公園讓人猶如置身於城市綠洲中，穿梭於廊橋上，更可以將整座園區嘅景觀盡收眼底。公社設有多個餐飲及運動休閒品牌，例如雪糕店、露營風咖啡店、網球、自助桌球、藝術家居體驗館等等。另外亦會定期舉辦藝術展覽及市集，推廣深圳文化産業！
【INFO】 萬科雲城設計公社 地址：深圳市南山區西麗街道創科路與留光路口東北側（留仙洞站A出口） 開放時間：每日10:00-20:00
深圳地鐵13線好去處 | 7. 大沙河生態長廊
大沙河生態長廊全長約13.7公里，佔地面積達95萬平方米，被譽為深圳最靚嘅生態長廊。附近種滿綠植，環境寧靜，沿途設有行人步道，非常適合吹着微風散步。入夜後更可觀賞燈火通明嘅城市景觀，夜景好迷人好適合打卡～另外長廊周邊設有衛生間、母嬰室、淋浴房、座椅、遊客服務中心、茶室等公共設施，為市民提供人性化嘅服務，啱晒一家大細嚟遊玩！
【INFO】 大沙河生態長廊 地址：深圳市南山區18東南方向130米（高新北站D出口） 開放時間：每日06:00-23:00
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/
