日本繡球花 | 每年踏入6月至8月，日本多個地區都會盛開色彩繽紛嘅繡球花，形成花團錦簇嘅美妙景色。繡球花嘅花語寓意為「希望、團聚、幸福」，所以吸引唔少人去打卡朝聖，祈求來年幸福美滿。今次小編就為大家推介8大日本繡球花景點，仲會提供開花預測日期及繡球花景點前往方法，大家快啲bookmark定啦！
圖片來源：Weather News、Instagram @tsurugaoka_official、Another Kyoto官方旅遊網站、有珠善光寺官網、Instagram @ns1947、日本觀光網、江東區觀光協會、福岡縣香港事務所 | 撰文：Icy
日本繡球花開花預測日期
日本各個地區嘅繡球花開花時間都有所不同，根據日本氣象新聞公司Weather News所提供嘅開花預測日期，最早5月尾已於東京地區開花，預計直至7月中都能夠欣賞繡球花！
日本繡球花景點 | 1. 鶴岡八幡宮
位於鎌倉站附近嘅「鶴岡八幡宮」以神社寺院外嘅花手水而聞名，日文中嘅「花手水」意指人們喺神社參拜時，以花草植物嘅自然露水，淨化身體及靈魂，從而感受花鳥風月之自然美。喺繡球花季期間，粉紫色嘅繡球花會漂浮喺手水缽上，散發出淡雅清新嘅感覺～
【INFO】 鶴岡八幡宮 地址：日本神奈川縣鎌倉市雪之下 開放時間：08:00-21:00（全年無休） 費用：免費入場 前往方法：由江之電「鎌倉站」出發，步行約10分鐘
日本繡球花景點 | 2. 神奈川明月院
同樣位於鎌倉嘅「神奈川明月院」，係一座臨濟宗建長寺派嘅寺院，亦都以寺內嘅繡球花庭園而深受遊客歡迎。每年踏入6月，庭園小道兩旁都會種滿粉藍色嘅繡球花，數量達2,500朵，猶如童話裏嘅世外桃源咁，景色份外怡人～
【INFO】 神奈川明月院 地址：神奈川縣鎌倉市山ノ內 開放時間：09:00-16:00 費用：每人$300日圓（6月份為$500日圓） 前往方法：從東京乘搭橫須賀線至JR「北鎌倉站」，再步行約10分鐘
日本繡球花景點 | 3. 柳谷觀音楊谷寺
位於京都長岡京嘅「柳谷觀音楊谷寺」，同樣以花手水為名，據說對於患有眼睛疾病嘅參拜者特別靈驗。身為花手水嘅發祥地，廟方每年都會依照唔同花季而為手水缽更換鮮花，展現京都四季之美。寺院內仲有一條唯美嘅繡球花迴廊，種有約5,000株繡球花，非常適合打卡！
【INFO】 柳谷觀音楊谷寺 地址：京都府長岡京市淨土谷堂之谷2 開放時間：09:00-16:00（全年無休） 費用：每人500日圓（高中生以下免費） 前往方法：於阪急電車「西山天王山站」轉搭阪急巴士至「奥海印寺站」落車，再步行約40分鐘或搭乘的士約10分鐘
日本繡球花景點 | 4. 飛鳥山公園
若果想方便咁喺日本市區欣賞繡球花，就要朝聖位於王子地區嘅「飛鳥山公園」喇～公園內有一條約350米長嘅繡球花小徑，種植達1,000多株繡球花，附近嘅鐵軌仲不時會有火車駛過，好有日劇氛圍～
【INFO】 飛鳥山公園 地址：東京都北区王子1-1-3 開放時間：24小時 費用：免費入場 前往方法：由JR京濱東北線「王子站」出發，步行約1分鐘
日本繡球花景點 | 5. 舊忠川水邊花園
另一個喺市區附近嘅繡球花賞花熱點，就係位於東京江東區舊忠川橋樑下嘅「舊忠川水邊花園」。呢度每年六月開始都會盛開達2,000株繡球花，色彩繽紛嘅繡球花佈滿河岸邊，打卡時仲能夠以東京晴空塔為背景，令畫面更為豐富～
【INFO】 舊忠川水邊花園 地址：東京都墨田區東墨田1-11 開放時間：24小時 費用：免費入場 前往方法：由總武本線「平井站」出發，步行約15分鐘
日本繡球花景點 | 6. 有珠善光寺
位於北海道嘅「有珠善光寺」擁過千年歷史，係北海道最為古老嘅寺院。由於四季都會盛開唔同品種嘅花卉，例如櫻花、繡球花，為呢個古老建築添上繽紛色彩，因此被人們譽為「花之寺」。
【INFO】 有珠善光寺 地址：北海道伊達市有珠町124 開放時間：09:00-17:00（全年無休） 費用：免費入場 前往方法：由JR「洞爺站」出發，步行約10分鐘
日本繡球花景點 | 7. 太宰府天滿宮
位於日本福岡縣太宰府市嘅「太宰府天滿宮」，除咗擁有壯麗嘅御本殿、達數百年歷史嘅鳥居外，仲廣植樹木，將古韻猶存嘅建築物融入大自然之中，令人心曠神怡。每逢踏入6月，神社內嘅手水缽都會化身成「繡球花手水」，放有達700株繡球花，為前來參拜嘅人送上祝福。
【INFO】 太宰府天滿宮 地址：太宰府市宰府4-7-1 開放時間：06:00-19:00 費用：免費入場 前往方法：由西鐵太宰府線「太宰府站」出發，步行約5分鐘
日本繡球花景點 | 8. 下田公園
位於伊豆嘅下田公園占地達33公頃，每年6月都會開始綻放超過100種品種、約300萬朵繡球花。雖然位置比較偏遠，但勝在免費入場，空間亦非常廣闊。大家可以置身於花海之中，欣賞滿山滿谷嘅繡球花，仲能夠俯瞰下田港，將下田港嘅景色盡收眼底～
【INFO】
下田公園
地址：靜岡縣下田市3-14-30 415-0023
開放時間：24小時
費用：免費入場
前往方法：從東京出發，可乘搭JR特急踊子至伊豆急下田車站，再乘搭巴士於下田水族館落車
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
