【深圳好去處】嚟到深圳除咗食同買，仲有好多好地方去！位於深圳市寶安區嘅「深圳前海華發冰雪世界」預計將於10月正式開幕，室內滑雪場佔地10萬平方米，同時係全球最大室內滑雪場，以後想去滑雪嘅朋友唔使去到咁遠啦～
圖片來源：官方圖片｜撰文：Sharon
唔少人一到秋冬就鍾意飛到日韓滑雪，「深圳前海華發冰雪世界」預計將於10月正式開幕！除咗室內滑雪場，仲有33米深潛水館、五星級JW萬豪酒店及多元娛樂設施。
室內滑雪場佔地10萬平方米，相當於11個標準足球場，設有5條專業賽事級滑雪道，單條雪道長達441米，垂直落差達83米，就算係初學者都唔使擔心，總有一條滑雪道啱你！場內提供14項冰雪遊樂設施，包括雪上卡丁車、搖擺雪圈道、極地探險之旅及冰雕藝廊。
另外，同場設有「超感公園」，提供33米深的室內潛水池、28攝氏度恆溫人工造浪池及攀岩場。當然唔少得5萬平方米嘅極光主題商業街區，涵蓋零售商店、餐飲、寵物友善空間及親子互動區，做完運動仲可以去附近行街食嘢，非常方便！至於深圳華發五星級JW萬豪酒店更進駐華發冰雪世界，以冰雪為主題，提供352間客房。去快閃嚟個3日2夜之旅嘅朋友可以考慮一下！
【INFO】 《深圳前海華發冰雪世界》 地址：深圳市寶安區沙井南環路
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
