Delta模擬器 | 唔知大家喺童年嘅時候又有冇玩過Game Boy或者NDS嘅遊戲呢？而最近終於都可以喺iPhone或者iPad上面用遊戲模擬器，重新玩呢啲遊戲，令大家重拾童年回憶！有興趣想知點做嘅大家就要碌落內文睇更多啦！
圖片來源：SAUCE編輯部 | 撰文：Hedy
Apple最近允許全球地區嘅開發者可以上架「遊戲模擬器」APP至App Store，當中由Riley Testut開發嘅「Delta」遊戲模擬器上架後，就可以令大家玩到NES、SNES、GBA、NDS等懷舊遊戲！唔單止可以用手機玩，仲可以連結藍芽用埋手把一齊玩，超方便呀！
Delta模擬器 | 步驟1：開啟App Store
想重拾翻童年回憶，首先就當然要去App Store到下載「Delta-Game Emulator」，只要喺iOS14或以上嘅版本就可以下載到！大家都可以喺度玩Game Boy Color、NES、SNES以及Nintendo 64等主機嘅遊戲，仲可以更改主機嘅外觀。
Delta模擬器 | 步驟2：獲取遊戲ROMs
下載完Delta後，大家喺呢度都冇辦法直接玩到遊戲，反而我地要先將遊戲嘅檔案匯入到Delta先玩到！如果本身自己擁有遊戲卡帶嘅，就可以將相關遊戲檔案備份做ROMs就可以。就算冇嘅話大家都應該要自行獲取合法嘅ROMs文件，先好開始玩～
Delta模擬器 | 步驟3：解壓檔案
當你下載完成後，就可以喺網站左下角位置，搵返「下載項目」，再點擊項目就會去檔案位置所在。呢個時候只要再撳一下，就會自動解壓！解壓完成後，就可以將檔案直接搬去「我的iPhone/Delta」File入面，咁到時搵檔案嘅時候就一目了然！
NDS模擬器 | 步驟4: 打開「Delta-Game Emulator」 App
重新打開App後，只要點擊右上「+」符號，再揀選Files，喺「我的iPhone/Delta」File入面搵返相關嘅遊戲，最後撳「開啟」就成功開到遊戲玩！如果呢個時候見到「Missing Required Ds Files」嘅提示嘅話，就可以搵返你所缺少嘅檔案再下載，然後再逐一「Import Files」，相信大家就可以順利玩到遊戲喇！
