2000年初期互聯網發展尚未成熟，遊戲都以比較簡單嘅網頁遊戲為主。其中就有一款當時風靡萬千港人嘅驚嚇Flash Game ─《猛鬼大廈》，成為當時八九十後嘅共同回憶。隨著互聯網唔再支援Flash，呢個遊戲亦正式成為歷史遺物。今次就有本土開發商希望向經典致敬，以同名《猛鬼大廈》推出全新電腦遊戲，比大家有機會再次體驗香港地道嘅驚嚇主題遊戲！
圖片來源：Facebook@Genuine Studio、Steam｜撰文：Long
向經典Flash遊戲《 猛鬼大廈 》致敬
近日，來自香港本地嘅遊戲開發商Genuine Studio （傅真）於 Steam 上發布遊戲《猛鬼大廈》。遊戲以香港公共屋邨作為背景，希望向二十年前經典初代香港Flash遊戲《猛鬼大廈》致敬。除咗復活港人嘅集體回憶之外，亦加入更多劇情及背景故事，添加大量香港都市傳說及歷史等元素，希望在回憶舊時味道之餘，能夠令遊戲更加豐富以及帶來全新嘅遊戲體驗。
- 遊戲畫面（圖片來源：Genuine Studio）
先帶大家回顧一下遊戲背景。1999年香港網上出現史上第一隻以香港為背景的Flash遊戲 – 《猛鬼大廈》，玩家以第一身視角於一棟樓高九層嘅大廈內單獨探索，途中可以進入大廈多個房間。玩家一路探索時，會觸發唔同地方及房間內嘅大小機關，出現畫面及聲效，例如「地獄之旅」、「小鬼電子賀卡」、「講鬼故」和「靈異照片」等不同項目及小遊戲。值得一提嘅係，雖然當年網站設計簡單，但有部份房間每次打開都有唔同效果，加上音效非常逼真，令到遊戲可玩性極高，不少網民表示每次玩嘅時候都被嚇餐飽。
- Flash Game猛鬼大廈（圖片來源：香港網絡大典）
《 猛鬼大廈 》遊戲簡介
根據官方介紹，新版《猛鬼大廈 – 一樓鎖匠》都係以一位探索者嘅角度進入遊戲，但就為背景加上更多香港元素，豐富遊戲嘅故事成份。遊戲背景係一座公共屋邨，玩家扮演一位新上任保安員，負責到屋邨內嘅昌榮大廈維持秩序。在故事中，昌榮大廈係一棟已被政府回收並準備重建嘅大廈，但因為大廈內仲有數戶人家拒絕搬遷，玩家喺維持治安之餘，更需要解決住戶間嘅深層矛盾，令住戶簽下搬遷同意書，順利搬出去。
-
遊戲介紹影片畫面（圖片來源：Genuine Studio）
以香港真實事件為基礎 充滿本土特色
遊戲以文字冒險模式推進劇情，透過同不同地方嘅住戶交換情報，了解談話內容並去收集更多故事和線索，以應對不同場景。整個遊戲亦分為不同單元，每個單元當中設有獨立故事去引導玩家了解更多有關昌榮大廈所發生嘅人事及影響，以及進一步了解不同人物及角色背後嘅經歷。有趣之處在於，遊戲中所有故事都係以香港真實發生嘅事件及都市傳說為基礎，並在故事中加入恐怖元素，令玩家能夠更加投入，透過遊戲感受香港舊時代嘅獨特氛圍。
- 遊戲畫面（圖片來源：Genuine Studio）
玩家必須要解決所有住戶問題，先能夠完成任務，令大廈重新恢復平靜。探索過程中，會出現來自不同地方嘅鬼怪襲擊，玩家必須要小心應對，保留性命以繼續遊戲。更加會遇上不同神秘事件，例如奇怪聲音、幽靈出沒等等，玩家需要逐步解決問題，同時在過程中收集不同道具去應付情況，例如符咒或照明工具等道具去消滅鬼怪，保護自己安全。
- 遊戲畫面（圖片來源：Genuine Studio）
個別單元會觸發唔同嘅劇情同變化，影響單元結局甚至整體故事發展。因此，玩家可以重複體驗遊戲，以觸發不同結果的故事，令遊戲可玩性進一步提高。最驚喜嘅地方莫過於玩家會喺探索過程中，逐漸了解到作為保安員嘅自己與昌榮大廈嘅人和事有著某種密切關連。主角出現喺昌榮大廈當中，事情並不如想像之中單純，背後嘅故事就留待讀者玩遊戲時慢慢去感受啦。
- 遊戲畫面（圖片來源：Genuine Studio）
在背景及代入感當中，Genuine Studio亦在細節上花費不少心機。遊戲不但播放著舊時代嘅識樂，亦出現懷舊嘅綠白相間地磚、尼龍帆布床、碌架床等充滿本土情懷嘅物件，相信會勾起唔少玩家嘅回憶，亦有助玩家產生更強代入感！
隨著科技進步，見到全新《猛鬼大廈 – 一樓鎖匠》雖然同名，但兩者在安排同設計上有更大分別，同樣地加入大量故事元素去增加可玩性。目前為止以香港為主題嘅驚嚇遊戲真係廖廖可數，如果之前有玩開台灣赤燭遊戲開發嘅《返校》同《還願》，又點可以錯過呢個以香港做主題嘅恐怖遊戲呢？
INFO 《猛鬼大廈》 開發： Genuine Studio Steam：https://bit.ly/3R3Skwg
