今個萬聖節，以《怪誕城之夜》為主題嘅萬聖節期間限定店「Freaky Halloween Party怪誕狂歡哈囉喂」登陸銅鑼灣時代廣場！今次由三位人氣角色—— 阿Jack、史迪仔及三眼仔為主題，帶嚟超過300款商品！fans萬勿錯過！
圖片來源：官方圖片｜撰文：Sharon
萬聖節期間限定店「Freaky Halloween Party怪誕狂歡哈囉喂」將於2026年10月15日至11月4日期間登陸銅鑼灣時代廣場！超過300款以阿Jack、史迪仔及三眼仔為主題商品，仲有超過50款會場限定萬聖節主題商品，從潮玩盲盒、夜光服飾、實用時尚袋款到家居精品一應俱全！
場內設有1.2米高阿Jack歡迎立牌、經典畫廊牆，以及「Oogie Boogie’s Secret Glow」等特色打卡位，帶領大家正式踏入《怪誕城之夜》嘅世界，一覽阿Jack喺怪誕城嘅收藏品！期間限定店帶來一系列《怪誕城之夜》主題收藏級商品，當中更有全港限量200套嘅阿Jack珍藏幣扣飾及全角色夜光襟章套裝。店內同時發售多款會場限定商品，包括阿Jack公仔擺設、公仔匙扣、棺材亞加力匙扣等。
至於三眼仔及史迪仔今次齊齊換上萬聖節造型！場內有一系列萬聖節造型史迪仔實用生活周邊，包括夜光金屬襟章連磁扣套裝、木乃伊及骷髏骨夜光T恤，以及夜光盲盒公仔等，將小惡魔造型融入日常穿搭及生活用品之中。除此之外，史迪仔更以兩款特別版造型登場：亮黑金屬感、帶點小惡魔壞心思嘅Stitch Devil，以及白金高雅、手持號角的Stitch Angel，極具收藏價值。
店內一次過集合超過40款唔同種類嘅盲盒及扭蛋，包括迪士尼萬聖節夜光毛絨公仔、Hot Toys 2026萬聖節盲盒、迪士尼萬聖節隨機亞加力鑰匙扣，以及美國直送萬聖節擺設等。
【INFO】 《「Freaky Halloween Party怪誕狂歡哈囉喂」期間限定店》 地點：銅鑼灣時代廣場地庫1樓 日期：2026年10月15日至11月4日 （首日將於6時開放） 時間：上午11時30分至晚上9時
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
