SPY×FAMILY電影 | 動畫《SPY×FAMILY間諜家家酒》一度掀起熱潮，安妮亞可愛趣怪嘅一面深深吸引大家。早前日本已上映劇場版電影《Spy×Family CODE: White》，由原作者遠藤達哉監製嘅全新故事劇情，其票房成績相當亮眼！大家期待咗好耐嘅SPY×FAMILY電影，香港幾時先會上映呢？小編即刻話你聽，當中更要留意呢6大看點！
圖片來源：Twitter@spyfamily_anime | 撰文：Hedy
SPY×FAMILY電影看點一：全新原創故事
劇場版電影《Spy×Family CODE: White》由漫畫原作者遠藤達哉，親自擔任角色設計同埋監製全新嘅原創故事。劇本則由大河內一樓編寫，其知名作品包括《機動戰士鋼彈 水星的魔女》以及《反叛的魯路修》等。相信今次嘅SPY×FAMILY電影都會帶畀大家滿滿嘅驚喜同反轉，真係好期待呀！
SPY×FAMILY電影看點二：劇情簡介
電影描述執行緊任務嘅洛伊德佛傑「黃昏」，突然收到「行動代號梟」換人嘅通知。而安妮亞就喺學校準備迎接料理實習堂，聽講課堂中嘅優勝者更可以獲得星星為獎勵。為咗獲得星星可以繼續執行任務，洛伊德佛傑就提議安妮亞可以整一款深受審查委員校長鍾意嘅點心。為咗尋找呢款點心嘅味道，一家人更決定帶埋彭德，展開第一次嘅家庭之旅！
然而展開呢趟充滿冒險嘅旅程中，安妮亞係火車上誤食咗一粒朱古力，呢粒朱古力竟然隱藏住天大秘密，當中更係攸關東西兩國嘅和平，甚至令安妮亞惹嚟殺身之禍？究竟呢一家人會點樣努力維護世界和平？
SPY×FAMILY電影看點三：粵語預告片段
熱愛SPY×FAMILY嘅大家一定好期待電影上映，不過都要等多半個月先有得睇，所以不妨睇住預告片段先喇！大家可以選擇睇粵語版或者日語版嘅前導預告以及正式預告，咁就可以喺入場前更加投入喇！
SPY×FAMILY電影看點四：OFFICIAL HIGE DANDISM演唱主題曲
電影主題曲請嚟人氣搖滾樂隊OFFICIAL HIGE DANDISM編唱，佢哋亦曾為第一季電視動畫中演唱主題曲。而今次電影嘅主題曲取名為「SOULSOUP」，意指「靈魂之湯」，透過豐富嘅旋律同節奏，帶動一家人遇上充滿危機同刺激嘅旅程！聽住音樂相信能令大家更投入電影嘅劇情同當中情感嘅變化。
SPY×FAMILY電影看點五：日本戲院限定爆谷桶
如果近期有去日本又諗住睇電影嘅大家，不妨到附近戲院碰碰運氣，睇下仲有冇機會買到呢個限定嘅爆谷桶！有睇開動畫版嘅大家都應該有見過呢隻奇美拉長官，係其中一款陪伴安妮亞嘅公仔！只要去日本各地嘅戲院就有機會買到，不過爆谷桶限量發售，有可能已經賣晒。希望到時香港上映都有機會有啦！
SPY×FAMILY電影看點六：香港上映資料
隨住日本上映電影之後，相信大家都會相當期待香港幾時上映！據目前資料顯示，劇場版電影《Spy×Family CODE: White》上映日期暫定為2月1號，片長大約為1小時50分鐘。鍾意SPY×FAMILY嘅大家記得要預留時間入場睇喇！
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
