香港魚木花2024 | 相信大家近日行過唔同嘅街道，都會見到魚木花嘅身影，魚木花花瓣呈白色或奶黃色。當魚木花數量眾多嘅時候，就好似綻放出一條黃白花嘅大道，花海更會包圍成個行人天橋，畫面超壯觀得嚟，又夠唯美，相當適合大家打卡！如果想去打卡嘅朋友，就可以去呢5大攝影熱點！
圖片來源及授權：Facebook@Discover Hong Kong、忌廉波 Creamy Ball & Pancake、翁志華、Instagram@elainelingyip | 撰文：Hedy
魚木樹每年都會有2次嘅開花期，分別係3月至5月以及9月至10月，初期嘅時候會慢慢開出白色花朵，逐漸變黃，成為大家依家所見到嘅魚木花。如果大家都想將魚木花唯美嘅景色影低，就可以去呢5大熱門地點影相。
魚木花打卡位 1. 聖德肋撒堂
相信大家都知道影魚木花最靚嘅地方係太子道西聖德肋撒堂，以歐陸風嘅教堂為背景，再加上盛開嘅魚木花，形成一大片壯觀嘅花海，感覺就好似置身於外國咁～無論係影教堂定係魚木花，出嚟嘅效果都相當靚！
【INFO】
《聖德肋撒堂》
地址：香港九龍九龍塘太子道258號
魚木花打卡位 2. 大角咀櫻桃街天橋
大家最常見到嘅藍色天橋同魚木花嘅相，就係喺大角咀行人天橋所拍攝！由於櫻桃街天橋坐落於旺角、奧海城同大角咀中間，所以無論係喺旺角定係奧海城行過去都冇問題。就咁望過去天橋就好似被滿滿嘅魚木花海包圍住，超夢幻呀～
【INFO】
《大角咀櫻桃街天橋》
地址：櫻桃街天橋（奧海城三期對出）
交通：奧運港鐵站D3出口，往奧海城三期行 / 旺角港鐵站C4出口，沿亞皆老街往奧海城方向行
魚木花打卡位 3. 將軍澳南海濱走廊
喺週末嘅時候如果帶小朋友或者寵物嚟將軍澳南海濱走廊放電，不妨抬頭望望附近嘅魚木花，更可以幫小朋友打卡，超靚！就算夜晚食完飯之後，都可以落嚟散步夜賞魚木花，相信會有唔同嘅感受！
【INFO】
《將軍澳南海濱走廊》
地址：香港新界將軍澳南
交通：港鐵康城站A出口
魚木花打卡位 4. 天水圍
無論行去天水圍各處，相信好多街坊一早就已經欣賞到魚木花，當中最特別嘅就係「魚木鐵路」嘅美景，將輕鐵以及魚木花一同拍攝，場面具特色之餘，又不斷令人讚嘆香港嘅景色依舊都係咁靚！推薦大家可以去天水圍龍園影相，魚木花喺江南庭園嘅襯托下，更具古典美。
【INFO】
《天水圍》
地址：天水圍各處（天水圍體育館/天水圍輕鐵/天水圍龍園等）
魚木花打卡位 5. 旺角花墟
旺角花墟固然有唔少嘅鮮花同盆栽售賣，如果離遠少少，大家更可以將旺角花墟以及魚木花一同紀錄，景觀上面相當吸引～
【INFO】
《旺角花墟》
地址：九龍太子花墟
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
