落羽松 | 新一年除咗係新嘅開始之外，1月開始亦係賞花嘅最好時機！除咗之前介紹過嘅紫花風鈴木之外，大家都可以到以下5大推薦地觀賞金黃色嘅落羽松，形成倒影嘅時候，就係最靚嘅天空之鏡！即刻入內文睇詳情啦！
圖片來源及授權：Facebook@Dicky Ng、康樂及文化事務署 | 撰文：Hedy
落羽松2025 | 1. 流水響水塘
講到落羽松，相信大家第一時間都會諗起最熱門打卡地點之一嘅流水響！流水響水塘位於八仙嶺郊野公園入面，更被喻為係「港版輕井澤」，一排排開始轉紅嘅落羽松，呈現出紅、橙、黃、綠嘅色彩，望住湖面上面嘅倒影，就好似一副油畫一樣，夠晒鮮豔奪目！如果想影到絕美嘅「天空之鏡」，就建議大家可以喺上午8至9點左右，當陽光照住落羽松嘅時候，映襯落湖面就會更加清晰。放假嘅時候不妨早啲起身，感受吓大自然嘅美，仲可以順便睇埋紅葉！
【INFO】 《流水響水塘》 地址：香港新界東北八仙嶺郊野公園流水響 交通：於港鐵粉嶺站C出口乘搭52B小巴，於流水響道及鶴藪道迴旋處落車
落羽松2025 | 2. 香港濕地公園
落羽松又名落羽杉，係落葉喬木，適應河邊、沼澤等潮濕生境。樹幹外形堅挺壯麗，呈條形嘅羽狀葉喺秋冬期間會轉為橙黃色！大家可以到訪濕地公園，一邊漫遊「演替之路」，一邊觀賞池塘一帶金黃色嘅落羽松！仲可以帶埋小朋友嚟欣賞唔同嘅動植物，絕對係假日必去嘅好去處！
【INFO】 《香港濕地公園》 門票價錢：成人$30；3歲至17歲小童、全日制學生、殘疾人士、殘疾人士一名同行照料者及65歲或以上長者$15 開放時間：星期一、星期三至星期日、公眾假期 10:00至17:00 （星期二休息） 地址：香港新界天水圍濕地公園路香港濕地公園 交通：https://bit.ly/403gTxR
落羽松2025 | 3. 香港中文大學未圓湖
想欣賞落羽松都唔使去到咁遠，喺香港中文大學未圓湖都可以睇到！一齊感受大學濃厚嘅文化氣息之餘，仲可以一邊欣賞到橙黃色嘅落羽松～食完飯之後都可以圍住湖邊欣賞優美怡人嘅景色，沿住小徑漫步，相當寫意！
【INFO】 《香港中文大學未圓湖》 地址：香港新界沙田香港中文大學未圓湖 交通：港鐵大學站C出口，步行約5分鐘
落羽松2025 | 4. 青衣公園
如果想交通更方便嘅，亦可以到訪青衣公園觀賞，鄰近青衣港鐵站。青衣公園入面嘅人工湖被多棵落羽松包圍，營造出歐陸式庭園風，就好似置身於世外桃源一樣，好啱打卡！當中人工湖對面嘅觀景台，係最佳嘅拍攝位置！
【INFO】 《青衣公園》 地址：青衣青敬路60號 交通：港鐵東涌線青衣站B或C出口
落羽松2025 | 5. 北區公園
位於上水嘅北區公園，大家除咗可以喺度影到落羽松之外，仲可以一次過睇到盛開嘅波斯菊！北區公園中央設有風景如畫嘅人工湖，湖畔種有16棵落羽杉，湖水映照江南園林美景，古色古香！
【INFO】 《北區公園》 地址：新界上水馬會道北區公園 交通：https://bit.ly/4a6tk0s
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
