屯門美食推介2026 |屯門呢個地區充滿住各種隱世小店，無論你係想食到地道嘅街坊風味、高質嘅Cafe，定係充滿驚喜嘅過江龍，屯門都一樣滿足到你！今次為大家搜羅咗多間屯門必食人氣餐廳，有勁有特色嘅米線、邪惡到爆嘅炸雞髀，仲有充滿文青氣息嘅Cafe同超高CP值嘅異國菜，保證由正餐到甜品，都令你食到停唔到口！下次放假唔知去邊，不妨嚟屯門走一轉，保證你滿載而歸！
圖片來源：Openrice@Eating King、@歡歡增肥之旅、@LizzyC、@aa100027、@Elainelingyip | 撰文：Ginger
屯門美食推介 | 1. 雲川
講到屯門嘅名物，相信唔少人都會即刻諗起米線舖「雲川」！呢度最吸引人嘅，係佢哋有足足5款獨特嘅米線湯底俾你揀，包括鮮魚湯、豬骨湯、酸辣湯、麻辣湯、酸麻金湯，仲有熱拌米線同銀針粉套餐。如果你鍾意食辣，可以試吓酸辣湯小鍋米線或者麻辣湯小鍋米線。雲川嘅酸辣湯，辣度比坊間其他米線舖輕，但酸度就啱啱好，飲落開胃又唔會口渴，好順喉！而麻辣湯雖然唔算好濃稠，但麻辣香氣依然好突出，配合質地滑溜嘅米線，真係食到停唔到口。配料方面，每款加$10，CP值好高！最特別係秘製豬頸肉，切成條狀嘅豬頸肉帶有焦香，表面塗咗蜜糖，略帶微甜，非常惹味！
【INFO】
《雲川》
盈豐店
地址: 屯門良德街9號盈豐商場地下A27號舖
營業時間: 10:30 - 21:30
美樂店
地址: 屯門湖翠路2號美樂花園地下46號舖
營業時間: 11:00 - 21:30
虹橋店
地址: 屯門井財街富麗大廈地下F舖
營業時間: 11:00 - 22:30
貝爾特店
地址: 屯門震寰路6號貝爾特酒店地下2D舖
營業時間: 10:30 - 21:30
卓爾店
地址: 屯門石排頭徑1號卓爾廣場3樓316號舖
營業時間: 10:30 - 21:30
NOVO店
地址: 屯門欣寶路8號NOVO WALK地下11號舖
營業時間: 10:30 - 21:30
御海灣店
地址: 屯門海皇路23號御海灣地下10-11號舖
營業時間: 10:30 - 21:30
屯門美食推介 | 2. 很得輝
「很得輝」主打即叫即炸生炸大雞髀，喺屯門同大角咀都有分店，憑住份量十足又炸得外脆內多汁嘅雞髀，成功吸引咗唔少人慕名而來。「很得輝」嘅皇牌生炸雞髀（$34）份量驚人，同成年人手掌差唔多大，而且肉質超厚！雞髀裹上麵包糠後生炸足7-8分鐘，熱辣辣嘅外皮炸到金黃酥脆，咬開仲會見到有雞汁湧出，肉質依然保持滑嫩，口感超有滿足感！
【INFO】
《很得輝》
地址: 屯門仁愛堂街46號金滿閣地下C2號舖
營業時間: 星期一至日 12:30 - 02:00
屯門美食推介 | 3. 嘆甜品
屯門虹橋一帶向來係掃街熱點，而呢間甜品店「嘆甜品」更加係人氣爆燈！呢間小店主打港式甜品，提供多款糖水、窩夫、雪糕同埋鹹食小食，選擇多到你眼花。必試嘅係佢哋嘅招牌甜品焦糖脆脆花生醬甜奶鮮忌廉窩夫配雪糕，窩夫外脆內軟，配上香濃嘅花生醬、甜奶同忌廉，再加埋焦糖脆脆同雪糕，口感同味道都超豐富，食落好有層次感！
【INFO】
《嘆甜品》
地址: 屯門青菱徑3號東威閣地下G02號舖
營業時間: 星期一至日 15:00 - 00:00
屯門美食推介 | 4. Thre3 Concept
喺屯門藍地呢個隱世地方，藏住一間性價比超高嘅Cafe 「Thre3 Concept」！呢度嘅食物水準非常高，好似佢哋嘅全日早餐，份量超豐富，有齊炒蛋、大啡菇、薯餅等等，足夠滿足你嘅胃口。明太子忌廉天使麵滿滿嘅明太子鋪喺面頭，就算撈勻咗，每一啖意粉都食到明太子嘅鹹香，忌廉汁嘅份量又啱啱好，同天使麵完美融合！喺呢個隱世Cafe，可以嘆到咁高質嘅美食，真係超滿足！
【INFO】
《Thre3 Concept》
地址: 屯門藍地大街35號地舖
營業時間:星期一 全日休息，星期二至五 12:00 - 16:30，18:00 - 22:00，星期六至日 11:00 - 16:30，18:00 - 22:00
屯門美食推介 | 5. Parmenara
去開日本名古屋旅遊嘅朋友，相信對日本連鎖意式餐廳 Parmenara 唔會陌生！呢間以親民價格同高質意粉、薄餅聞名嘅過江龍，喺屯門V city 開設香港首間分店，真係屯門人嘅福音！Parmenara 係日本40年歷史餐飲集團Marino旗下品牌，主打新鮮即製嘅手工意粉同手工薄餅。佢哋特別嚴選意大利小麥粉製作食材，務求用最優質嘅材料做到經濟實惠嘅價錢，俾大家用平民價錢就歎到高質意式家庭菜！Parmenara 最特別嘅地方，係佢哋用品牌專利嘅「燉陶鍋」嚟烹煮意粉，據講咁樣可以令意粉更有嚼勁，醬汁更容易掛喺麵條上。
【INFO】
《Parmenara》
地址: 屯門屯門鄉事會路83號V City地下G號舖
營業時間: 星期一至日 11:00 - 23:00
屯門美食推介 | 6. 鳥貴族
嚟自大阪嘅人氣燒鳥居酒屋鳥貴族喺日本已經有超過600間分店，而家喺屯門市廣場都開咗分店，約2,000平方呎，近百個座位，非常適合家庭聚餐或者小型聚會。鳥貴族提供同日本本店一樣嘅餐單，包括各式雞肉部位嘅串燒，好似雞翼、雞肝、雞心、雞腎等等，全部都係劃一價$29.9！可以盡情試多款唔同嘅串燒，超高性價比。佢哋仲特別從日本引入專用烤爐，確保每一串燒鳥都美味多汁，將日本鳥貴族嘅美味秘方帶到香港。除咗串燒，佢哋嘅小食都好出色，好似綿密嘅明太子薯仔沙律，以及香脆惹味、佐酒一流嘅脆炸雞皮，都係必試。
【INFO】
《鳥貴族》
屯門市廣場店
地址: 屯門屯順街1號屯門市廣場1期1樓1108-1111號舖
營業時間: 11:30 - 22:00
屯門美食推介 | 7. 盤子工房
喺屯門良運街嘅盤子工房，係一間充滿胡桃木系田園風嘅文青Cafe，呢度嘅食物同環境都好有質素。「盤子工房」嘅早午餐選擇豐富，Egg Benedict 班尼迪克早餐賣相滿分！用熱香餅做底，配上水波蛋，仲有煙三文魚同埋捲成玫瑰花咁嘅牛油果，口感非常豐富。另外，佢哋嘅意粉都超有驚喜！香辣沙爹牛肉忌廉意粉，沙爹味超濃又唔會太鹹，個醬汁又香又掛麵，牛肉又淋又入味。
【INFO】
《盤子工房》
地址: 屯門良運街3號建生商場地下125號舖
營業時間: 星期一至日 09:00 - 18:00
屯門美食推介 | 8. 屯門咖喱屋
位於屯門彩華花園、有20年歷史嘅「屯門咖喱屋」由印度人主理，食品非常有水準，但價錢只係街坊價，最平$48就有得食，性價比超高！午餐價錢非常合理，一個套餐就包晒湯、飯、烤餅、菜，肉及飲品，凍飲都唔使額外收費！Menu有齊牛、雞、豬、魚、牛舌、蔬菜等各種咖喱套餐選擇。可以用平民價就享受到正宗又足料嘅印度風味！
【INFO】
《屯門咖喱屋》
地址: 屯門彩華花園25號地舖
營業時間:星期一至五 11:00 - 15:00，18:00 - 22:30，星期六至日 11:00 - 22:30
屯門美食推介 | 9. 有料案內所
屯門嘅街坊對呢間位於井財街嘅甜品店「有料案內所」一定唔會陌生！佢哋嘅甜品不但賣相精緻，味道仲非常高質，絕對會令你一試難忘。窩夫擺盤靚，店員仲會喺碟上面畫上可愛嘅貓貓，未食已經好開心！佢哋嘅窩夫做得非常出色，令平時唔鍾意食窩夫嘅人都會改觀。除咗窩夫，佢哋嘅梳乎厘班戟都好受歡迎，入口即溶，質感猶如棉花糖般柔軟，充滿濃郁蛋香！
【INFO】
《有料案內所》
地址: 屯門井財街15號金銘大廈地下3號舖
營業時間: 星期一至日 12:00 - 01:30
屯門美食推介 | 10. DINELAND
喺屯門小區嘅西餐廳DINELAND以灰色為主調，糅合園林同現代風格嘅餐廳，設有室外座位。菜式定價合理，份量又足，CP值非常高！佢哋嘅晚市套餐包晒頭盤、餐湯同主菜。主菜方面，必試龍蝦汁意大利飯配香蒜牛油焗龍蝦尾，龍蝦超大隻，口感爽彈，配埋吸盡龍蝦汁嘅意大利飯，啖啖都充滿龍蝦嘅鮮味！另外，西班牙伊比利亞黑毛豬鞍架都非常推薦，肉味濃郁，厚肉又多汁！食完主菜，記得要試埋佢哋嘅自家製甜品，好似酒味好濃嘅Tiramisu同埋流心不錯嘅心太軟，為你嘅晚餐畫上完美句號。
【INFO】
《DINELAND》
地址: 屯門良德街3號豐連地下1號舖
營業時間:星期一至五 12:00 - 17:00，18:00 - 22:00，星期六至日 12:00 - 16:00，18:00 - 22:00
屯門美食推介 | 11. 秋香
如果你係周星馳電影嘅粉絲，咁你一定會鍾意屯門呢間以《唐伯虎點秋香》為主題嘅中日Fusion居酒屋！呢度嘅店名叫做「秋香」，餐廳設計仲有好多電影元素，好似牆上嘅字畫「別人笑我太瘋癲，我笑他人看不穿」，充滿玩味！秋香主打中日Fusion菜式，特別推介佢哋每日限量供應嘅鹽燒白鱔煲仔飯（$238），白鱔新鮮，厚切得嚟經過鹽燒，外皮香脆，肉質鮮嫩，真係一試難忘！煲仔飯用埋日本米，配上醬油鹹香鮮味十足，煲底仲有少少飯焦，非常高質！
【INFO】
《秋香》
地址: 屯門青善街38號康景花園地下26-27號舖
營業時間:星期一、三至日 12:30 - 22:30，星期二 全日休息
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
