新年好去處 | 就嚟到農曆新年啦，諗好新一年同屋企人朋友去邊未呢？想感受濃厚嘅節日氣氛，就可以去睇多個熱鬧嘅新年活動，當中包括煙花匯演同火車巡遊等等，一齊迎接龍年。即刻睇睇7大新年好去處！
圖片來源：各官方網站 | 撰文：Hedy
新年好去處1. 年宵市場
每年新年都一定會去行年宵市場，今年更有齊乾貨、濕貨同食物攤位，由2月4日到2月10日，一連7日將會係全港15個地方舉辦！當中最大嘅銅鑼灣維多利亞公園，將會設有333個乾濕貨攤位、4個快餐攤位，同埋8個主題攤位。大家可以盡情喺呢15個年宵市場辦年貨同買年花，啱晒一家大細行大運！
【INFO】
《年宵市場》
日期：2024年2月4日至2月10日
地點：銅鑼灣維多利亞公園、界限街花墟公園、長沙灣遊樂場、觀塘遊樂場、黃大仙摩士3號公園、荃灣沙咀道遊樂場、葵青葵涌運動場、元朗東頭工業區遊樂場、屯門天后廟廣場、大埔天后宮風水廣場、沙田源禾遊樂場、上水石湖墟遊樂場、西貢萬宜遊樂場、將軍澳寶康公園、東涌達東路花園
新年好去處2. 龍騰觀塘新春夜市
18區民政事務處聯同區議會，以「日夜都繽紛」為主題，將會喺全港各區舉辦特色活動，當中包括新春夜市及彩燈會等！當中第一項活動為「龍騰觀塘新春夜巿」，結合80個市集攤位、綜合表演同遊戲，絕對啱一家大細去玩！
【INFO】
《龍騰觀塘新春夜巿》
日期：即日起至2月16日
時間：星期一至四（16:00-22:00) ; 星期五、六、日及假日（12:00-22:00）
地點：觀塘市中心自由空間
新年好去處3. 尖沙咀花車巡遊
因疫情而停辦4年嘅《國泰新春國際匯演之夜》再度回歸，將會有多隊國際以及本港嘅表演隊伍喺大年初一遊走於尖沙咀！今年將會有9架花車為大家進行巡遊及表演，由尖沙咀香港文化中心廣場出發，當中途經廣東道、海防道及彌敦道，最後會以香港喜來登酒店外為終點，為大家送上新春祝福。當日下午6點，13個表演團體將率先沿巡遊路線呈獻舞蹈、魔術、音樂及花式足球等多元化表演為現場觀眾熱身！大家都可以喺沿途嘅有利位置免費觀賞，同時電視亦會進行直播，就算唔出街都可以喺屋企溫馨咁同親朋好友一齊欣賞。
【INFO】
《國泰新春國際匯演之夜》
日期：2024年2月10日（大年初一）
時間：20:00至21:45（18:00有街頭熱身派對）
地點：尖沙咀（香港文化中心廣場→廣東道→海防道→彌敦道→香港喜來登酒店）
新年好去處4. 大埔林村許願樹
每逢新年都會有唔少市民到林村許願樹拋寶牒許，而今年將會由2月10日至2月25日喺林村許願廣場舉辦香港許願節。今年以「愛與希望」為主題，除咗有傳統嘅拋寶牒同祈福蓮花燈之外，喺7日至13日期間更設有宗夜光林村許願樹，配合首創發光「心想事成許願寶牒」，供市民拋擲許願。同時亦加設夜間舞台表演及活動，包括夜光舞獅、音樂會及遊戲攤位等。
【INFO】 林村許願廣場 日期：2024年2月10日至2月25日 時間：09:30至19:00（10-13/2、17-18/2）；09:30至18:30（14-16/2、19-24/2） 地點：大埔林村許願廣場
新年好去處5. 維港煙花匯演
自2020停辦以來，終於喺今年復辦農曆新年煙花匯演，並於大年初二喺維港上空上演，歷時23分鐘。當中將會發放23888枚煙花，展現出特色煙花圖案，當中包括金元寶、金色及紅色8字、笑臉以及雙紅心等造型。想睇煙花嘅大家就記得要提早去啦！
【INFO】
《新年煙花匯演》
日期：2024年2月11日（大年初二）
時間：20:00
地點：維多利亞港
新年好去處6. 利東街新春節慶巡遊
利東街特意攜手香港旅遊發展局，闊別七年之後，將會喺2月12日(年初三)舉行「新春節慶巡遊」文化匯演，邀請西班牙歌舞勁旅Golden Dream及來自德國8人踩高蹺團隊Universe of Lights，畀市民近距離欣賞光影舞蹈，觀賞世界級嘅精湛表演藝術！除咗國際性表演之外，本地代表王仁曼芭蕾舞學校將會帶嚟俏皮可愛嘅舞蹈賀新春，同場財神爺更會派賀年糖果同祝福畀大家，新一年為大家傳遞好運！
【INFO】
《新春節慶巡遊》
日期：2024年2月12日（年初三）
時間：17:00至19:00
地點：沿利東街
新年好去處7. 沙田農曆新年賽馬日
想行大運又點少得去沙田馬場？大年初三當日除咗會舉行11場賽事之外，更加有胡楓、薛家燕、吳業坤以及一眾中年好聲音嘅唱將擔任表演嘉賓，為大家獻唱經典名曲以及送上龍年祝福。當日更會有醒獅表演及騎師拜年賀新歲嘅開幕儀式，睇完之後更可以到「財來運起桃花園」裝置打卡，為大家帶嚟滿滿嘅旺氣同祝福！
【INFO】
《農曆新年賽馬日》
日期：2024年2月12日（年初三）
時間：10:30開放入場
地點：沙田馬場
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
