Pizza控真係要尖叫！去名古屋極難book位、喺日本食評網Tabelog攞到成3.69高分嘅人氣手工薄餅店「BBBond」，宣佈今年12月正式踩入香港，喺中環雲咸街開海外首間分店！
圖片來源：官方圖片｜撰文：Sharon
名古屋手工薄餅名店「BBBond」宣佈今年12月正式登陸香港，首間分店選址中環雲咸街！今次呢間真係非一般連鎖店，背後係由東京薄餅名牌Savoy同人氣麵包店Baguette Rabbit兩大巨頭聯乘搞出嚟！簡單講，就係搵頂級麵包師嘅工藝嚟焗拿破崙式薄餅。佢哋最勁係玩高含水量麵糰，落足心機反覆手揉再加長時間發酵，經石窯高溫急烤出爐，批邊烤到焦香微脆、脹卜卜充滿氣孔，但咬落內層係軟糯有嚼勁，仲嗒到好純嘅日本小麥甜香，完全打破咗平時食Pizza嘅口感框架！連蒜頭同蜜糖呢啲配角，都堅持運日本產貨！
主打3款必食Pizza，Formaggi（蜂蜜芝士薄餅），淋上日本蜜糖，芝士嘅鹹香濃郁配埋清甜蜜香，拉絲入口鹹甜交織，超邪惡！仲有常駐薄餅 Marinara（瑪麗娜拉）同經典Margherita（瑪格麗特）都值得一試！餐廳仲不定期出期間限定，好似壽喜燒、沖繩Tacos同照燒雞Pizza，勁有驚喜！
Menu定價同開張日子仲等緊官方公佈詳情，各位Pizza控記得要Bookmark啦～
【INFO】 《BBBond香港店》 地址：中環雲咸街 開幕日期：預計12月開幕
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
