就快到聖誕，想搵個有feel又多嘢玩嘅地方同班friend或者另一半影靚相？今個冬天尖沙咀Mira Place直接將成間80年代經典美式Diner搬咗入商場中庭，搞咗個超有氣氛嘅「Groovy Christmas Town」，成個場掛滿閃爆Disco Ball同復古霓虹燈，氛圍感十足！
圖片來源：官方圖片｜撰文：Sharon
場內一共有8個必影位，由室內影到出室外！一入到中庭就會見到全場最搶眼嘅7.5米高Jukebox聖誕樹，呢棵全港首創嘅復古點唱機聖誕樹掛滿霓虹燈飾，未埋位已經感受到濃濃節日氣氛。再行入啲就可以直接坐上泊喺正中央嘅1:1紅色復古開篷車，仲有聖誕老人坐喺隔離陪住你，大家可以摸住個軚盤Chok樣影相，好似去緊美式公路旅行咁！影完大車就可以行去隔離嘅Mira Gift Shop，除咗有得玩返以前嘅經典彈珠機，仲有一座由舊式電視機砌成嘅聖誕樹，夠晒玩味；再行過少少就係重頭戲Mira Diner，入面設齊紅色卡位梳化、搖滾酒吧同成幅黑膠唱片牆，隨手影都好似拍緊外國復古MV。影完室內記得行出諾士佛臺旁邊嘅Mira Steps，成條階梯換上紅噹噹聖誕新裝，抬頭仲會見到充氣聖誕老人揸住架巨型跑車喺戶外半空，夜晚亮燈之後影相更有feel！
提提大家，中庭每15分鐘仲會有一次光影音樂匯演，頭頂啲Disco Ball會跟住節奏閃燈，現場氣氛直接推到最高點！另外，仲有仲有超多免費聖誕小食同會員著數等緊你！如果你係Mi+會員，指定日子仲可以免費換領暖笠笠香料熱紅酒同脆卜卜西班牙Churros；去到聖誕正日假期（12月24至26日），仲加碼聯乘本地人氣雪糕店「甜筒暉 TEEMTONEfai」派聖誕限定口味雪糕！另外用1,000積分亦可以換到HABITŪ限定聖誕咖啡（冬日榛子熱朱古力／提拉米蘇雪降咖啡）或者3D立體聖誕卡禮盒！
今個聖誕一於約埋班friend去尖沙咀行街食飯，順便落去打卡拎著數啦！
【INFO】 《Mira Place「Groovy Christmas Town」》 地點：尖沙咀彌敦道132號Mira Place中庭、戶外及 Mira Steps 日期：即日起至2027年1月3日
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
