九巴寵物巴士遊 | 放假終於都可以帶毛孩一齊搭公共交通工具去玩啦～九巴與開大旅遊推出「寵物巴士遊」，逢周末同假日都可以同毛孩一齊搭巴士，當中更有5個行程選擇，遊走西九文化區、西貢以及馬灣等地，即刻睇睇點報名啦！
圖片來源：官方圖片、Freepik | 撰文：Hedy
平時放假帶埋毛孩出去玩，交通都未必咁方便！九巴與開大旅遊推出「寵物巴士遊」，設有5個恆常寵物巴士遊行程，由10月13日開始逢周末及公眾假期，大家都可以喺沙田或荃灣出發，往返白石角、西貢、馬灣以及西九文化區，每半個鐘有一班！每張車票只能攜帶一隻寵物乘搭，費用都只係$35！只需要喺出發之前去九巴網店報名，選定日期同時間，就搞掂！如果本身係club1933會員更可專享減$10優惠，記得要登入會員版面領取，結帳時輸入專屬優惠碼，咁就可以用$25報名！
【INFO】 《寵物巴士遊》 費用：$35 日期：2024年10月13日(星期日）開始 行程： 沙田 <-> 荃灣 沙田 <-> 白石角 沙田 <-> 西貢 荃灣 <-> 馬灣 荃灣 <-> 西九文化區 網上報名：https://bit.ly/3Nhk3If
九巴寵物巴士遊 | 帶毛孩搭車有咩條件？
想帶毛孩搭車，都要留意以下守則，所以記得要睇清楚先好報名。無論係狗隻定係貓隻都必須接種有效嘅疫苗，上車前記得要帶埋疫苗注射卡副本，供核實之用。巴士後排位置同上層後排位置(雙層巴士適用)為貓隻優先座位，作為分隔貓隻及其他寵物嘅緩衝區，攜帶其他寵物嘅乘客應就要用其他座位！
-
狗隻守則：
1. 狗隻必須領有有效狗隻牌照、已植入 AVID 晶片，以及已接種預防狂犬病的疫苗、 DHPPiL (1-5) 疫苗及其他漁農自然護理署認為須加預防的其他疾病嘅疫苗。司機有權於乘客登車時要求乘客出示狗隻牌照及疫苗注射卡副本或照片作核實之用。
2. 為安全起見，除非狗隻放置於在寵物籠、袋或箱內，所有狗隻於行車其間必須全程繫上牽引繩及戴上口罩。
3. 格鬥狗隻或其他被歸類在《危險狗隻規例》(香港法例第167D 章)的「已知危險狗隻」必須全程繫上牽引繩及戴上口罩。
4. 乘客應確保寵物戴上的口罩可提供足夠空間讓狗隻喘氣和保持空氣流通，以避免寵物中暑。
-
貓隻守則：
1. 所有登車的貓隻必須已接種有效的 FVRCP 疫苗及其他漁農自然護理署認為須加預防的其他疾病的疫苗。司機有權於乘客登車時要求乘客出示疫苗注射卡副本或照片作核實之用。
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
